Isaiah 49 in Yalunka
1 Ɛ tuli mati n na, fɔxɔ ige tagi bɔxɔn muxune. Yamana makuyene, ɛ ito ramɛ. Benun n xa bari, Alatala bata yi n xili.
2 A bata n dɛɛn lu alo silanfan xɛnxɛna, a yi a yiin nininna ti n xun ma, a yi n findi xalimakuli ɲɔɛ ralemunxin na, a n luxun a xalimakuli saseni.
3 A yi a fala n xa, a naxa, “N ma walikɛɛn nan i ra, Isirayila, n ma binyen luma naxan yi.”
4 Koni n tan yi a fala, n naxa, “N bata n yɛtɛ yixadan fufafu, n bata n fangani kala fuyan, n mi se sɔtɔxi. Koni Alatala n ma kitin sama nɛn. N saranna n ma Ala nan yii.
5 Awa iki, Alatala bata falan ti, a tan naxan n daxi nga kui alogo n xa findi a walikɛɛn na, alogo n xa Yaxuba bɔnsɔnna raxɛtɛ a ma, alogo Isirayila kaane mɔn xa malan a fɛma, n bata binyen sɔtɔ Alatala yɛtagi. Amasɔtɔ n ma Ala nan findixi n fangan na.
6 A bata a fala n xa, a naxa, ‘I findi fena n ma walikɛɛn na alogo i mɔn xa Yaxuba bɔnsɔnna rakeli, i yi Isirayila yamaan muxu dɔnxɛne raxɛtɛ n ma, na xurun. N ni i findima nɛn kɛnɛnna ra siyane xa, alogo n ma marakisin xa makɛnɛn siga han bɔxɔn danne ra.’”
7 Alatala naxan i xunbama, Isirayilaa Ala Sariɲanxina, na nan ito falaxi i xa, i tan naxan naɲaxuxi, i tan naxan yatɛxi muxu haramuxin na yamaan xɔn, i tan naxan findixi kuntigine konyin na, a naxa, “Mangane i toma nɛn, e yi keli, kuntigine i toma nɛn, e yi e xinbi sin i bun ma Alatalaa fe ra naxan tinxin, Isirayilaa Ala Sariɲanxina naxan i sugandixi.”
8 Alatala ito nan falaxi, a naxa, “N ma marafanna waxatin na a li, n ni i yabima nɛn! I rakisin waxatin na a li, n ni i malima nɛn. N na i ramarama nɛn, n yi i findi layiri xidi muxun na alogo yamanan mɔn xa yitɔn bɔxɔn kɛɛ rabeɲinxine mɔn yi yitaxun,
9 alogo a xa fala kasorasane xa fa fala, ‘Ɛ mini!’ e nun naxanye luxi dimini fa fala, ‘Ɛ mini kɛnɛnni!’ E nɔɛ e dɛgɛ nɛn kirane xɔn alo xuruse kuruna, e xuruse rabaden toɛ nɛn geyane birin fari.
10 Kamɛn mi fa e suxuma sɔnɔn, min xɔnla mi e suxɛ. Kuye wolonna nun sogen mi e tɔrɛ mumɛ, bayo naxan kininkininma e ma, na tima nɛn e yɛɛ ra, a yi e xali tigi yirene yi.
11 N na n ma geyane birin findima nɛn kirane ra, n ma kirane mɔn yi yitɔn.
12 E mato, e fama sa keli yire makuyeni, ndee kelima sogeteden kɔmɛnna binni, ndee sogegododen binni, ndee sa kelima Sinimi yamanani.”
13 Kore xɔnna, gbelegbele sɛwani! Bɔxɔ xɔnna, ɲaxan! Geyane, ɛ sɛwa xuini te! Bayo, Alatala a yamaan madɛndɛnma, a kininkininma a tɔrɔ muxune ma.
14 Siyon kaane yi a falama nɛn, e naxa, “Alatala bata nxu rabeɲin, Marigin bata ɲinan nxu xɔn.”
15 Ala naxa, “Ɲaxanla ɲinanɲɛ a diin xɔn ba, naxan xiɲɛn na? A mi kininkininɲɛ a dii barixin ma ba? Hali a tan ɲinanɲɛ a xɔn, n tan mi ɲinanɲɛ i xɔn mumɛ!
16 N bata i xinla kɛrɛndɛn n yiine kui, n na n ɲɔxɔ lu taan makantan yinne xɔn ma waxatin birin.
17 I ya diine xɛtɛma e giyɛ i ma nɛn, i kala muxun naxanye yi i halagima, ne e gima i ma nɛn.
18 I yɛɛ rakoɲin i rabilinni, i ya diine birin bata e malan, e fama i fɛma. Habadan Ala nan n na, n bata n kɔlɔ n yɛtɛni, e findima nɛn i maxidi seen na alo ɲɛrɛna i kɔɛ ra alo ɲaxalandina a maxidima kii naxan yi.” Alatalaa falan nan na ra!
19 Hali taa xɔnne nun bɔxɔ rabeɲinxine nun yire kalaxine to gbo yamanani iki, e sa xurunma ayi nɛn dɔxɔden na i ya yamaan xa. Naxanye yi i halagima, ne makuyama i ra nɛn.
20 E diin naxanye baxi i yii, ne mɔn a falama nɛn i xa, e naxa, “Yireni ito xurun nxu ma, dɔxɔdena nde fen nxu xa, nxu xa ba yigbɛtɛnxi.”
21 Nayi, i a falama nɛn i bɔɲɛni, i naxa, “Nde itoe barixi n xa? Diine yi baxi n yii nun, n yi luxi alo gbantana. N bata yi xali konyiyani, n namɛxin nan yi a ra! Nde diini itoe maxuruxi? N kedenna bata yi lu, koni diini itoe sa kelixi minɛn?”
22 Marigina Alatala ito nan falaxi, a naxa, “N na n yiin maligama nɛn siyane xa, n na n ma taxamasenni tema nɛn yamanane xa, e yi fa i ya dii xɛmɛne ra e yii kanke, e yi i ya dii tɛmɛne maxali e tungunne ma.
23 Mangane nan i ya diine maxuruma i xa mangane ɲaxanle yi i ya dii tɛmɛne balo i xa. E yi e xinbin sin i yɛtagi, e yɛtagin yi lan bɔxɔn ma, e yi i san ma lɔxɔne makɔn. I a kolonma nɛn nayi, a Alatala nan n tan na, naxanye e xaxili tixi n tan na ne mi yagima.”
24 Sofaan seen naxan tongoxi yɛngɛni, na bɛ a yii ba? Ɲaxankata tiina muxu suxin nɔɛ a futuxulɛ ba?
25 Alatala ito nan falaxi, a naxa, “Sofana se tongoxin bama nɛn a yii yati, ɲaxankata tiina muxu suxin yi a futuxulu. N na i yɛngɛfane yɛngɛma nɛn, n yi i ya diine rakisi.
26 Naxanye yi ɲaxu i ra, n yi ne radin e bode ma e balo e bode suben na, e yi e bode wunla min alo manpa nɛnɛna. Nayi, adamadiine birin a kolonma nɛn a Alatala nan n na, i rakisimaan naxan i xunbama, Yaxubaa Ala Sɛnbɛmana.”