Isaiah 48 in Yalunka
1 Ɛ tan Yaxuba yixɛtɛne, ɛ tuli mati ito ra, ɛ tan naxanye xili Isirayila ɛ tan naxanye barixi Yuda bɔnsɔnni, ɛ tan naxanye ɛ kɔlɔma Alatala xinli ɛ tan naxanye Isirayilaa Ala maxandima, koni ɲɔndin nun tinxinyaan mi a ra!
2 Amasɔtɔ ɛ xili saxi taa sariɲanxin nan xun ma. Ɛ yengi saxi Isirayilaa Ala nan ma naxan xili Alatala Sɛnbɛn Birin Kanna.
3 Feen naxanye danguxi, n bata yi ne fala xabu waxati xunkuye. N yɛtɛɛn nan ne ralixi, n yi muxune rakolon ne ra, na xanbi ra, sanɲa ma kedenni, n yi e liga, e yi rakamali.
4 Amasɔtɔ n na a kolon nɛn a yama tengbesenxin nan ɛ ra, ɛ kɔɛni balanxi alo wure gbelemɛna, ɛ tigin xɔdɔxɔ alo sulana.
5 Nanara, n feni itoe fala ɛ xa xabu waxati xunkuye, n yi ɛ rakolon e ra benun e xa liga, alogo ɛ nama a fala, ɛ naxa, “Nxɔ suxurene nan e ligaxi, nxɔ sawurana hanma nxɔ ala wure daxin nan e yamarixi.”
6 Ɛ bata feni itoe mɛ, ɛ yi e birin to rakamalɛ! Ɛ fan mi ɛ tiyɛ e ra ɛ dɛni ba? Iki, n fa ɛ rakolonma fe nɛnɛne nan ma, naxanye luxunxi, ɛ mi naxanye kolon.
7 N baxi e yitɔndeni nɛn, fe fonne mi e tan na. Benun to, ɛ munma yi e sese a fe mɛ nun, alogo ɛ nama a fala, ɛ naxa, “Nxu yi na kolon.”
8 Anu, ɛ mi yi sese mɛxi, ɛ mi yi sese kolon. Ɛ tunla munma yi a mɛ singen waxati danguxine yi. Bayo n yi a kolon a yanfantenne nan ɛ ra. Xabu ɛ yi ɛ nga kui, a yi falama ɛ ma a muxu murutɛxine.
9 N bata n ma xɔlɛni suxu n xinla fe ra. N bata diɲa ɛ ma n tantunna fe ra, alogo n nama ɛ halagi.
10 N bata ɛ rasɛnsɛn tɛɛn na alo gbeti wurena sulun tɛɛni. N mi yi ɛ rasoxi sulun tɛɛn xan yi de, koni n yi ɛ rasoxi ɲaxankata yinla nan na.
11 N bata keli ito ligadeni n yɛtɛna fe ra, n na a ligama n yɛtɛɛn yatin nan ma fe ra! Amasɔtɔ n tinɲɛ di, n xinla yi rayelefu? N mi n ma binyen fiyɛ gbɛtɛ ma.
12 Yaxuba bɔnsɔnna, ɛ tuli mati n na! Isirayila kaane, n naxanye xilixi! N tan na a ra, n tan nan a fɔlɔn nun a raɲanna ra.
13 N tan nan bɔxɔ xɔnna bɛtɛn saxi, n yiifanna yi kore xɔnni fulun. N na e xili, e fama nɛn mafurɛn!
14 Ɛ birin xa ɛ malan, ɛ tuli mati! Nde feni ito falaxi suxurene yɛ? Muxuna nde rafan Alatala ma. Na a waxɔn feene ligama nɛn Babilɔn taan na, a yiini tema nɛn Babilɔn kaane xili ma.
15 N tan nan keden pe falan tixi, n mɔn yi a xili, n yi a rafa. A wanla sɔnɔyama nɛn!
16 Ɛ maso n na, ɛ tuli mati ito ra. Xabu a fɔlɔni, n mi falan ti wundoni. Xabu feni itoe fɔlɔna, n yi be. Iki, Marigina Alatala bata nxu nun a Nii Sariɲanxin xɛ.
17 Alatala ito nan falaxi, naxan i xunbama, Isirayilaa Ala Sariɲanxina, a naxa, “Alatala nan n tan na, i ya Ala, naxan i xaranma i yɛtɛ munanfanna ma, naxan tima i yɛɛ ra, a siga i ra kiraan xɔn naxan lanɲɛ i ma.
18 Xa i yi n ma yamarine ramɛ nun, i ya bɔɲɛ xunbenla yi luma nɛn nun alo baana, i ya tinxinna yi lu alo fɔxɔ igen walanna,
19 i yixɛtɛne yi wuya ayi alo ɲɛmɛnsinna i ya diine yi gbo ayi alo ɲɛmɛnsin xɔnne. I xinla mi bɛ n yɛtagi mumɛ!”
20 Ɛ mini Babilɔn yamanani, Ɛ ɛ gi Babilɔn kaane ma! Ɛ gbelegbele sɛwani, ɛ fa a rali, a xa rawanga! Ɛ a fe raxuya ayi han bɔxɔn danne, ɛ a fala, ɛ naxa, “Alatala bata a walikɛɛn Yaxuba bɔnsɔnna xunba!”
21 Min xɔnla mi e suxuma, a na ti e yɛɛ ra, dangu tonbonni. A igen naminima nɛn fanyeni e xa. A fanyen bɔma nɛn, ige gbeen yi mini keden na.
22 Alatala naxa, “Bɔɲɛ xunbeli mi muxu ɲaxine xa!”