Isaiah 50 in Yalunka

1 Alatala ito nan falaxi, a naxa, “Futu kala kɛdin minɛn n na n mɛxi ɛ nga ra naxan xɔn? Hanma n na ɛ matixi n doli faane ma naxan xɔn? Ɛ matixi ɛ hakɛne nan ma fe ra ɛ nga ramɛxi ɛ matandine nan ma fe ra.

2 N to fa, nanfera muxe mi yi be? N to xinla ti, nanfera, muxe mi n yabi? N yiin dungi nayi ba, a yi muxune xunba? Sɛnbɛ mi n na ba, n yi muxune xɔrɔya? Anu, n baa igen xɔrima, n na n kɔnkɔ a ma, n yi baane findi tonbonna ra, e yɛxɛne yi kun, bayo ige mi na, e birin yi faxa min xɔnla ra.

3 N yi dimin naso kore alo sunu dugina.”

4 Marigina Alatala bata n xaran alogo n xa a kolon n naxan falɛ muxu xadanxine xa, e sɛnbɛn sɔtɔ. A n naxulunma xɔtɔn yo xɔtɔn, alogo n xa a falan namɛ alo a xarandiina.

5 Marigina Alatala bata n tunle rabi, n tan fan mi murutɛxi a ma, n mi xɛtɛxi xanbin na.

6 N na n fanna ti nɛn n bɔnbɔ muxune xa, n yi n dɛɛn ti ne xa naxanye n dɛ xabene matalama. N mi n yɛtagin baxi konbin nun dɛgen bun.

7 Koni Marigina Alatala n mali nɛn, nanara n mi rayarabi. N bata n yɛtagin findi fanyen na, n to a kolon a n mi fama yagideni.

8 Naxan yoon fima n ma, na bata maso. Nde waxi n xun maxidi feni nayi? En kitin yɛba en bode xa! Nde mi tinxi n ma yoon ma? A xa fa n xili ma!

9 Marigina Alatala n malima nɛn. Nayi, nde n yalagima? E birin kalama nɛn alo dugi fonna, kunle yi e don.

10 Nde a tuli matiyɛ Alaa walikɛɛn na Alatala yɛɛragaxun ma? Naxan yo sigan tima dimini, kɛnɛnna dasaxi naxan ma, na xa a yigi sa Alatala yi, a yi a xaxili ti a Ala ra!

11 Koni ɛ tan naxanye tɛɛne soma, ɛ yi tanba radɛgɛxine tongo, nba ɛ sigan ti ɛ yɛtɛna tɛɛ dɛgɛn ma, ɛ tanban naxanye radɛgɛxi. Ɛ fa ito nan sɔtɔma: ɛ faxama sɔxɔlɛn nin.