Isaiah 22 in Yalunka
1 Waliyiya falan ni i ra Lankɛnɛmaya Lanbanna xili ma. Yerusalɛn kaane, nanfera ɛ tema banxine xuntagi?
2 Nanfera sɔnxɔ sɔnxɔn bata keli ɛ taani, a yimaxa, sumunna taan naxan yi yɛyɛ? Ɛ faxa muxune mi faxaxi silanfanna ra, e mi faxaxi yɛngɛni.
3 Ɛ kuntigine birin bata e gi, xalimakuli wonle yi e findi kasorasane ra. Ɛ muxune birin bata yi e gi yaxune yɛɛ ra, e yi e birin suxu, e yi e xali.
4 Nanara, n yi a fala, n naxa, “Ɛ yɛɛn ba n na, ɛ n lu na, n xa wuga xɔlɛni. N ma yamaan bata kala, koni hali ɛ mi kata n masabarideni.”
5 Amasɔtɔ to, Marigina Alatala Sɛnbɛn Birin Kanna bata magaxun nun mantɔrɔn nun mayibasanna rafa en ma Lankɛnɛmaya Lanbanni. Taan nabilinna yinna bata kala! Xili ti xuiin minima malina fe ra geyaan ma.
6 Elan yamanan ganle bata xalimakunle tongo e nun yɛngɛ so wontorone nun soone. Kiri yamanan sofane e yɛ masansan wure lefane yitɔnma.
7 Ɛ mɛrɛmɛrɛn faɲine bata rafe yɛngɛ so wontorone ra, soo ragine yitɔnxi e xa yɛngɛn fɔlɔ ɛ taan so dɛɛne ra.
8 Yuda yamanan mi fa makantanxi sɔnɔn. Na lɔxɔni, i yɛɛ raxɛtɛma nɛn yɛngɛ so seene ma banxini naxan xili “Fɔtɔn Yi Banxina.”
9 Ɛ yi yalenne to Dawudaa Taan makantan yinna ma ɛ yi igen namara ige ramarade xurini yɛngɛn yɛɛ ra.
10 Ɛ Yerusalɛn taan banxine yatɛ, ɛ ndee rabira alogo ɛ xa makantan yinna sɛnbɛ so.
11 Ɛ yi ige ramaraden nafala yin firinne longonna ra ige ramarade fonna igen xa. Koni naxan na feene birin xunna ra, ɛ mi ɛ yɛɛ rafindixi na ma. A yi e yitɔnma to mi na ra, koni ɛ mi yi na kanna toma.
12 Marigina Alatala Sɛnbɛn Birin Kanna a falaxi na lɔxɔn nin, a ɛ xa wuga, ɛ gbelegbele, ɛ yi ɛ xunne bi, ɛ yi kasa bɛnbɛli dugine so sununi.
13 Anu, sɛwan nun ɲaxaɲaxan nan be iki! Muxune ɲingene kɔɛ raxabama, e yɛxɛɛne faxama, e suben donma, e manpaan minma. Ɛ a falama, ɛ naxa, “En na en dɛge, en yi en min, bayo en faxan nɛn tila!”
14 N tunla Alatala Sɛnbɛn Birin Kanna falani ito nan mɛxi, a naxa, “Ɛ hakɛni ito mi xafarima han ɛ faxa!” Marigina Alatala Sɛnbɛn Birin Kanna na nan falaxi.
15 Marigina Alatala Sɛnbɛn Birin Kanna ito nan falaxi, a naxa, “Siga, i sa mangana muxuni ito li, Sebena, naxan manga banxina feene xun na, i yi a fala a xa, i naxa,
16 ‘Nanse i xa be? I ya muxun mundun be, i to gaburun gema i yɛtɛ xa be? I matabude dɔnxɛn nafalama i yɛtɛ xa geyaan fari i gaburun ge i yɛtɛ xa fanyeni!
17 I tan sɛnbɛmana, Alatala i wolima ayi nɛn pon! A yi i suxu ken,
18 a yi siga i mafilinfilinɲɛ alo se radigilinxina a i woli yamana gbeeni. I sa faxama mɛnna nin, ɛ nun i ya wontoro faɲine yi lu na, i tan naxan i kanna denbayaan nayagima!’”
19 Ala naxa, “N ni i kedima nɛn i ya walideni, n yi i ba i tideni.
20 Na lɔxɔni, n nan n ma walikɛna Eliyakimi xilima nɛn, Xiliki a dii xɛmɛna.
21 N ni i ya dugine ragodo a ma, n ni i ya tagi xidin xidi a tagi, n ni i sɛnbɛn so a yii. A findima nɛn Yerusalɛn kaane fafe ra Yuda yamaan birin yɛ.
22 N Dawudaa manga banxin dɛɲinna soma nɛn a yii. A na naxan nabi, muxu yo mi nɔɛ a balanɲɛ. A na naxan balan, muxu yo mi nɔɛ a rabiyɛ.
23 N na a bitinma nɛn alo bitin wudina yire kɛndɛni, a yi binyen fi a fafe a denbayaan ma.
24 A denbayaan muxu binyene birin luma nɛn singanxi a ra, alo wudi yiin singanxi a binla ra kii naxan yi, alo goron xunxurine nun baramane nun ige sa seene dɔxɔma e bode fari kii naxan yi.”
25 Alatala Sɛnbɛn Birin Kanna falan ni ito ra, a naxa, “Na lɔxɔni, gbangban wudin talama nɛn naxan yi bitinxi yire kɛndɛni. A kalama nɛn, a yi bira. Nayi, goronna naxan yi singanxi a ra, na yi halagi.” Alatala na nan falaxi.