2 Chronicles 5 in Sunwar
1 मिनु सोलोमनम परमप्रभु यावे आ खिं कली पशो गेय नेल्ल थुमा नोले, आ आफ दाऊदमी परमप्रभु यावे कली गेशो नेल्ल चाक्गा बाक्त। मेको सुन चांदी नु ग्योंब नेल्ल मारेइ मारेइ परमप्रभु आ खिं ङा शोंप वोइक्तीकेमी वोइक्पदा बाक्त। १इतिहास १८:११; १इतिहास २९:२-४
2 मिनु नोले सोलोमनम परमप्रभु यावे आ कबल पशो सन्दोस दाऊद आ सहर सियोन रे चाक्चा कली इस्राएल ङा खाल्पापुकी, इस्राएली आन थर थर ङा ठेयब मुर नेल्ले नु इस्राएली आन खिं खिं ङा ठेयब मुर आन कली यरूसलेममी बुक्चा, दे ब्रेत्तीमी बाक्त।
3 मिनु इस्राएल ङा खुम्सीशो मुर नेल्ल ७ महिना ङा चाड नाक्ती पिप आ ङोंइती जाक्मा बाक्त। लेवी २३:३४
4 मिनु इस्राएल ङा खाल्पा नेल्ल जाक्मानु, लेवीपुकीम कबल पशो सन्दोस कुरमे बाक्त।
5 मिनु चढ़ेबपुकी नु लेवीपुकीम सन्दोस, ग्रुम्तीक ताम्बु नु ताम्बुम बाक्शो ग्योंब परमप्रभु आ मारेइ मारेइ थोव़क कुरशा, इर लदमे बाक्त।
6 मिनु पिप सोलोमन आ ङोंइती बुक्शो इस्राएल ङा मुर नेल्ले मेको कबल पशो सन्दोस आ ङोंइती बाक्शो बाक्मा बाक्त। मिनु मेकोपुकीम हिक्ने मचाप्चा ङा पा शुश ब्यफ नु भेडा चढ़ेमे बाक्त।
7 मिनु नोले चढ़ेबपुकीम परमप्रभु यावे आ कबल पशो सन्दोस आ बाक्तीक परमप्रभु यावे आ खिं आ आगा ङा नेल्ल क्येङा चोव़खो कोठाम चाक्शा करूब आस फ्रां आगाम वोदमे बाक्त।
8 मेको करूब आस फ्रां मेको कबल पशो सन्दोस बाक्तीक आ तारी प्राक्शो बाक्सा बाक्त। मोपा मेको करूब निक्शीमी आस प्राक्शो फ्रांम कबल पशो सन्दोस नु आ कोक्के सुम्शो बाक्सा बाक्त।
9 मेको कोक्के चहिं थम लाइश्शो बाक्तीके नेल्ल क्येङा चोव़खो कोठा रे ठेयब बाक्तीकेम तांइसीशो बाक्माक्त। तन्न मेको लाङगा रे मतांइसीबाक्माक्त। मेको मुल सम्म यो बाक्नीम।
10 मोसामी होरेब डांडाम मेको कबल पशो सन्दोस आगा वोइश्शो फुल्लु निक्शी क्येङा लाक्शा, अरु मारेइ मबाक्माक्त। मेना परमप्रभु यावेमी इस्राएली इजीप्त प्रोंइशा गाक्मानु, कबल पशो बाक्माक्त। ब्यवस्था १०:५; हिब्रू ९:४
11 मिनु चढ़ेबपुकी नेल्ल क्येङा चोव़खो कोठा रे ग्रूमा बाक्त। मेकेर बाक्शो चढ़ेब नेल्ले आन पालो मरिम्थुन परमप्रभु यावे आ ङोंइती जाक्चा कली ठीक सेल्सीशो बाक्मा बाक्त। १इतिहास ८:१४; लूका १:८-९
12 मिनु कुम्सो पाइब लेवी नेल्ल, आसाफ, हेमान, येदुथून नु मेको आन तौपुकी, मेको आन खिं खिं ङा वोंइश मुर नेल्ल रिम्शो पा किरशो श्येले रे प्रोव़शो सुती वा फेक्सीशा बुप्केल, ठेयब नु आइक्च तार पाइश्शो ताप्तीके कुरशा चढ़ेतीक आ पूर्ब गे राम्मा बाक्त। मिनु मेकोपुकी नु सहे का २० जना चढ़ेब यो बाक्मा बाक्त। मिनु मेकोपुकी चहिं तुराही ताप्ब बाक्मा बाक्त। १इतिहास १५:१९; १इतिहास १६:३७; १इतिहास १६:४१-४२
13 मिनु तुराही ताप्बपुकी नु कुम्सो पाइबपुकीम खाल का ङा सेंदा पा “परमप्रभु यावे, गे ठेयब बाक्नीनी। गे रिम्शो पाइब बाक्नीनी” दे कुम्सो पतीक मेको आन गेय बाक्माक्त। मिनु मेकोपुकीम तुराही, बुप्केल नु अरु ताप्तीक ताप्शा, परमप्रभु यावे कली “गे रिम्शो पाइब बाक्नीनी। इन दाक्तीके गेना हना यो लीब” दे कुम्सो पामे बाक्त। मिनु परमप्रभु यावे आ खिं गोस्सुम ब्रीमाक्त। १इतिहास १६:३४; भजन संग्रह १०६:१
14 मिनु मेको गोस्सुम खिं ब्रीतीके चढ़ेबपुकीम गेय पने मचाप्मे बाक्त। मारदे हना परमप्रभु यावे आ खिं आ छेङछेङम ब्रीशो बाक्माक्त। १इतिहास ७:१-३; प्रस्थान ४०:३५