2 Chronicles 6 in Sunwar
1 मिनु सोलोमनम “परमप्रभु यावे, गे ‘गो थम क्येर गोस्सुम बाक्नुङ’ देंशो बाक्तीनी।
2 गो इन कली गेना हना यो बाक्चा कली थम दारशो खिं का सेल्ता” देंमाक्त।
3 मिनु नोले पिप खुम्सीशो इस्राएली गे हिरशा, नेल्ल आन कली आसीक गेमी बाक्त। मेना मुर नेल्ले राप्शो बाक्मा बाक्त।
4 मिनु मेकोमी “परमप्रभु यावे, इस्राएली आन परमप्रभु, गे ठेयब बाक्नीनी। गे आं आफ दाऊद नु देंशो लोव़ मुल खाप्शो बाक्नीनी।
5 गे आं आफ दाऊद कली ‘गो आं मुर आन कली इजीप्त रागी रे ग्रुंइशा चाक्गुमी रे मुल सम्म आं नें वोइक्चा नु आं खिं सेल्चा कली इस्राएल ङा तेकोइ थर आन सहर मयोव़ङु। मिनु गो आं मुर इस्राएली आन कली सासन पपाइक्चा कली पिप मयोव़ङु।
6 तन्न गो आं नें कली मान पचा, दे यरूसलेम कली योव़ता। मिनु दाऊद कली आं मुर इस्राएली आन पिप दुम्चा कली योव़ता’ देंशो बाक्तीनी।
7 आं आफ दाऊदम परमप्रभु यावे, इस्राएली आन परमप्रभु आ नें कली मान पा खिं का सेल्चा कली थुं पशो बाक्माक्त। २सामुएल ७:२-१३
8 तन्न परमप्रभु यावे, गे आं आफ दाऊद कली ‘गे आं नें कली मान पा खिं का सेल्चा थुं पाप्तीवी। मेको रिम्शो बाक्ब।
9 मो हना यो गे मेको सेल्चा मदुम्नेवे। तन्न इ तौम आं नें कली मान पा खिं का सेल्चा माल्ब’ दे माइश्शो बाक्तीनी।
10 मुल परमप्रभु यावे, गे इन देंशो लोव़ खाप्तीनी। परमप्रभु यावे, गे इन लोव़ खोदेंशो पा गो आं आफ दाऊद आ पा ङा पिप दुम्ती। मिनु गो इस्राएल ङा पिप आ ठेयब नित्तीकेम निश्शो बाक्नुङ। मिनु गो परमप्रभु यावे, इस्राएली आन परमप्रभु, इन नें कली मान पा एको खिं सेल्ता। जकरिया ४:९
11 मिनु गो इन कबल पशो सन्दोस मेको आगाम वोइक्ता। परमप्रभु यावे, इन इस्राएली नु पशो कबल आगाम बाक्ब” देंमाक्त। ब्यवस्था ९:९; ब्यवस्था १०:५
12 मिनु सोलोमन परमप्रभु यावे कली चढ़ेतीक आ ङोंइती नु इस्राएल ङा खुम्सीशो मुर नेल्ल आन ङोंइती राप्शा, आ गुइ निम्फा पोक्गा बाक्त।
13 सोलोमनम ५ कुबीत लाइश्शो, ५ कुबीत ब्रेम्शो नु कुबीत सां ग्येत्थ लाइश्शो कांसा के राप्तीक का सेल्पाइश्शा, लाङगा आ दातेम वोइश्शो बाक्माक्त। मिनु मेको तार राम्माक्त। मिनु नोले खुम्सीशो इस्राएली नेल्ल आन ङोंइती आ पोक्च थेक्शा, आ गुइ सरीङ गे पोक्गा बाक्त। कुबीत का ०.५ मिटर बाक्ब।
14 मिनु मेकोमी “परमप्रभु यावे, इस्राएली आन परमप्रभु, सरीङ नु रागीम इन खोदेंशो सुइ मबाक्नीम। गे कबल खाप्ब बाक्नीनी नु इन कली नेल्ल थुंम खोइक्ब इन वाइल आन कली गे गेना हना यो दाक्नीनी।
15 गे इन वाइल, आं आफ दाऊद कली देंशो लोव़ खाप्तीनी। इन देंशो लोव़ मुलाक्त पाइतीनी।
16 मोपतीके परमप्रभु यावे, इस्राएली आन परमप्रभु इन गेय पाइब, आं आफ दाऊद कली देंशो लोव़ खपीन। मार देंशो लोव़ खपीन देंशा हना, ‘इस्राएली आन कली सासन पचा कली गेना हना यो इ मुर बाक्ब। गे आं ङोंइती गाक्शो खोदेंशो पा इ आलपुकीम आं अरेशो लोव़ पाम्तेक्म हना, इस्राएल ङा ठेयब नित्तीकेम पिप दुम्चा कली गेना हना यो इ मुर का बाक्ब’ देंशो बाक्तीनी। २सामुएल ७:१६
17 मिनु मुल परमप्रभु यावे, इस्राएली आन परमप्रभु, इन गेय पाइब दाऊद कली देंशो लोव़ थमा दुम्पतीन।
18 मिनु मार, परमप्रभु थमा पा मुर नु रागीम बाक्बा ङा? सरीङ नु स्वर्गम इन कली मरिक्ब हना, इन कली सेल्शो खिंम इन कली दोपा रिक्बा ङा? १इतिहास २:५
19 इन गेय पाइब, आं पुंइशो, आं पशो लोव़ नेनीन। परमप्रभु यावे, आं परमप्रभु, आं ब्रेश्शो नु आं प्रार्थना नेनीन।
20 मिनु इन देंशो लोव़ खोदेंशो पा इन नें कली मान पचा कली सेल्शो बाक्तीक, एको खिं कली नाक्दो नाक्ती कोव़ङीन। मिनु इन खिं गे कोव़शा पुनुनु, आं लोव़ नेनीन।
21 मिनु इन गेय पाइब नु इस्राएली, इन मुरुम एको खिं गे कोव़शा पुन्मेनु, इन स्वर्ग ङा बाक्तीक रे नेनीन। मिनु नेंशा मेको आन पाप क्याम्दीन।
22 सुइम अरु मुर कली पाप पशो बाक्त हना, कसम जचा माल्ताक्व हना, मेको मुर कली इन कली चढ़ेतीक नु इन खिं आ ङोंइती कसम जपाइक्तेक्म हना, ब्यवस्था २७:२६; प्रस्थान २२:१०
23 गे स्वर्ग रे मेको नेंशा, मार पचा माल्बा, मेको पने। मिनु इन गेय पाइब आस दातेम निसाफ पने। दोस ताइब कली सजाइ गेने। मिनु दोस मताइब कली प्रोनीन। दोपा ठीक पवा, मेको आ पशो खोदेंशो पा, मेको कली गेने।
24 मिनु इस्राएली, इन मुरपुकीमी इन कली पाप पशा, आन जोरी सत्रु नु लडाइ पा ब्रुम्तेक्म हना, तन्न एको इन खिं जाक्शा, इन नें थिशा, इन कली पुंइशा, इन गे लेत्तेक्म हना, ब्यवस्था २८:२५
25 गे स्वर्ग रे मेको आन पुंइशो नेनीन। मिनु इस्राएल ङा मुर आन पाप क्याम्दीन। मिनु गे मेको आन कली नु आन किकी पिपी आन कली गेशो रागीम लेश्शा चाक्कीन।
26 मिनु मेकोपुकीम इन कली पाप पतीके, रेउ मयित हना, मेकोपुकीम इन बाक्तीक गे कोव़शा, इन कली पुंइनीम। मिनु गे मेको आन कली सजाइ गेब परमप्रभु बाक्नीनी, दे तुइक्नीम। मिनु आन पाप रे लेश्शा, इन कली पुंइतेक्म हना, ब्यवस्था २८:२३-२४
27 गे, स्वर्ग ङा बाक्तीक रे मेको आन पुंइशो लोव़ नेनीन। मिनु इन गेय पाइब, इस्राएली आन पाप क्याम्दीन। गे मेको आन गाक्चा माल्शो रिम्शो लां कोंइदीन। मिनु गे इन इस्राएल ङा मुर आन कली गेशा आन थेरशो रागीम रेउ यिपतीन।
28 मिनु रागीम अन्काल दुम्त हना, मुरपुकी बेक्तीक रोइ पाम्तेक्म हना, चेरब सोव़तीक रोइ जाक्त हना, बुंखी ङाइक्ताक्व हना, सल्हा सोंपु जोम्तेक्म हना, आन जोरी सत्रुम आन बाक्तीक पुम्ताक्म हना, दोदेंब हिंचा ङा श्येत नु रोइ बोक्त हना यो,
29 इन इस्राएल ङा मुर नु अरु सुइम आन श्येत इन कली शोव़शा, एको खिं गे कोव़शा, आन गुइ पोक्शा, इन कली पुंइतेक्म हना,
30 गे, इन मुर आन पुंइशो इन स्वर्ग ङा बाक्तीक रे नेनीन। मिनु मेको आन पाप क्याम्दीन। गे इन मुर आन थुं तुइश्शो खोदेंशो पा रिम्शो कली रिम्शो नु मरिम्शो कली मरिम्शो पने। मारदे हना गे ला मुर आन थुं तुइक्ब बाक्नीनी। भजन संग्रह १३९:१-४,२३
31 मोपा इन कली मान पा हिंशा, मबेक्मा सम्म इन लां गाक्शा नु इन गेशो आन किकी पिपीम थेरशो रागीम रिम्शो पा बाक्नीम।
32 मिनु इन मुर, इस्राएली मबाक्थु, अर्को रागी ङा मुरपुकीम ङोन रागी रे जाक्शा, इन ठेयब नें, इन सक्ति नु इन वारच पतीके नेंशा, एको खिं गे कोव़शा, पुंइतेक्म हना,
33 गे, इन स्वर्ग ङा बाक्तीक रे मेको आन पुंइशो नेंशा, मेको अर्को रागी ङा मुर आन पुंइशो गेने। मोपा इस्राएली खोदेंशो पा रागी ङा मुर नेल्लेमी इन कली तुइश्शा, इन कली मान पा हिंनीम। मिनु मेकोपुकीम आं सेल्शो खिंम गे थमा पा बाक्नीनी, दे तुइक्नीम।
34 मिनु इन मुरपुकीम आन जोरी सत्रु नु लडाइ पचा कली तेको लां रे सोइक्ताक्नी हना यो, इन योव़शो सहर नु गोम इन कली मान पा सेल्शो खिं गे कोव़शा, पुंइतेक्म हना, दानीएल ६:११
35 गे मेको आन पुंइशो लोव़ इन स्वर्ग ङा बाक्तीक रे नेंशा आन माल्शो गेशा वारच पने।
36 मिनु मेकोपुकीमी इन कली पाप पाम्तेक्म हना, मारदे हना पाप मपाइब सुइ मबाक्नीम। गे मेको आन कली तशा गाइश्शा, मेको आन कली आन जोरी सत्रु आन गुइमी गेतीनी हना, मेकोमी मेको आन कली ग्याइश्शा, ङोन रागी हना यो, आन नेक्था ङा रागी हना यो लाइश्शा, चोक्तेक्म हना,
37 मिनु मेको रागीमी मेको आन थुं इन गे लेश्शा, मेकोपुकीम ‘गो पाप पाइतक, गो दूली पाइतक, गो काइ मरिम्शो पाइतक’ देंशा, दानीएल ९:५
38 मिनु मेको रागीम आन थुं नेल्लेमी इन गे लेश्शा, आन किकी पिपीम थेरशो रागी, इन योव़शो सहर नु गो इन कली मान पचा कली सेल्शो खिं गे कोव़शा, इन कली पुंइतेक्म हना,
39 इन स्वर्ग ङा बाक्तीक रे मेको आन पुंइशो लोव़ नेनीन। मिनु मेको आन माल्शो गेन। आन पशो पाप नेल्ल क्याम्दीन।
40 मुल आं परमप्रभु, मेको खिं रे इन मुर आन लोव़ नेंशा कोव़ङीन। मिनु आन पुंइशो नेनीन।
41 परमप्रभु यावे, परमप्रभु, मुल बोक्कीन। गे नु इन सक्ति ङा कबल पशो सन्दोस इन नाइश्शा बाक्तीकेम जाक्कीन। परमप्रभु यावे, परमप्रभु, इन कली चढ़ेबपुकीम इन मुर आन कली पाप क्याम्तीक गेय पपतीन। मिनु इन कली थमा सुइक्ब इन रिम्शो पशो तशा ग्येरसमल। भजन संग्रह १३२:८
42 परमप्रभु यावे, परमप्रभु, गे इन तेल लुक्शो मुर, आं कली मप्रोंइयीनी। इन गेय पाइब दाऊद कली पशो इन गेना हना यो दाक्तीक मिम्तीन” दे सोलोमनम परमप्रभु कली देंमाक्त। भजन संग्रह ८९:४-५