2 Chronicles 4 in Sunwar
1 मिनु सोलोमनमी हुराम-अबी कली २० कुबीत लाइश्शो २० कुबीत ब्रेम्शो नु १० कुबीत ग्येत्थ लाइश्शो कांसा के चढ़ेतीक का सेल्पदा बाक्त। कुबीत का ०.५ मिटर बाक्ब।१इतिहास ७:७
2 मिनु नोले यपाइश्शा कांसा के थम ठेयब बोस का सेल्पदा बाक्त। मेको कली दोम्ली देंमा बाक्त। मेको सुर का रे अर्को सुर सम्म १० कुबीत बाक्माक्त। मिनु मेको आ ग्येत्थ लाइश्शो ५ कुबीत बाक्माक्त। मेको आ एर ओंथ पुक्शोनु ३० कुबीत बाक्माक्त।
3 मेको दोम्ली आ लाङगा गे हार निक्शी ब्यफ दारपाइक्चा कली बाक्माक्त। कुबीत काम १० ओटा ब्यफ बाक्शो बाक्मा बाक्त। मेको बोस नु दारपाइक्तीक ब्यफ कांसा यपाइक्तीक गेय रे कालेमीन सेल्शो बाक्मा बाक्त।
4 मेको दोम्ली १२ ओटा ब्यफ आन तार वोइश्शो बाक्माक्त। ब्यफ सां उत्तर गे कोव़शो, सां पच्छिम गे कोव़शो, सां दक्खिन गे कोव़शो नु सां पूर्ब गे कोव़शो बाक्मा बाक्त। मिनु मेको दोम्ली मेको ब्यफ आन तार वोइश्शो बाक्माक्त। मेको ब्यफ आन मीलु आगा गे बाक्शो बाक्मा बाक्त।
5 मेको दोम्ली आ सुर लिली फू आ सफा खोदेंशो पा रोम्सीशो बाक्माक्त। मेको आ सुर लोटा के खोदेंशो बाक्माक्त। मेको बोस इन्ची सां थांइशो बाक्माक्त। मेको आ आगाम हजार सां बाथ ब्वाक्कु रिक्बाक्माक्त। बाथ का २२ लिटर बाक्ब।
6 मिनु सोलोमनम चिनु तेम्शा १० ओटा आइक्च कांसा के चिक्तीक बोस सेल्पदा बाक्त। मिनु मेको के ५ ओटा दोम्ली आ ग्युरा गे नु ५ ओटा आ पेरा गे वोइक्पाइक्मी बाक्त। मिनु चोशा चढ़ेचा कली मार मार मुरचा माल्तेक्म हना, मेकेर मुरबाक्मा बाक्त। मेको दोम्ली चहिं चढ़ेब आन चिक्तीक बाक्माक्त।
7 मिनु मोसामी ङोंइती बत्ती दातीक सेल्चा शेंशो खोदेंशो पा, १० ओटा सुन के बत्ती दातीक सेल्पदा बाक्त। मिनु मेको परमप्रभु यावे आ खिंम ५ ओटा दक्खिन गे नु ५ ओटा उत्तर गे पा वोइक्पदा बाक्त।
8 मेकोमी १० ओटा टेबल यो सेल्शा, परमप्रभु यावे आ खिंम ५ ओटा ग्युरा गे नु ५ ओटा पेरा गे पा वोइक्पदा बाक्त। मिनु सहे का सुन के ब्रुइक्तीक बोस यो सेल्पदा बाक्त।
9 मेकोमी चढ़ेब आन बाक्तीक लाङगा, ठेयब लाङगा नु लाङगा ङा लाप्चोपुकी सेल्पदा बाक्त। मिनु लाप्चो आन कली कांसाम गिल्पदा बाक्त।
10 मिनु मेको दोम्ली माइश्शो ठेयब ब्वाक्कु वोइक्तीके परमप्रभु यावे आ खिं आ दक्खिन पूर्ब गे ङा कुनाम वोइक्पदा बाक्त।
11 मिनु हुराममी ग्योंब, बेल्चा नु बोसपुकी सेला बाक्त। मोपा हुराममी पिप सोलोमन आ गेशो परमप्रभु आ खिं ङा गेय नेल्ल थुमा बाक्त।
12 हुराममी थाम निक्शी, बोस खोदेंशो गुप्तीके, मेको आस एर ओंथ क्युक्शो दारपाइक्तीक जाली खोदेंशो साङली सेल्शा थुमा बाक्त।
13 मेको साङलीम क्युक्चा कली ४ सहे दारीम सेला बाक्त। मेको थाम आस ङरम बाक्शो गुप्तीक बोस आस कली सुम्चा कली सेल्शो जाली खोदेंशो साङली नु मेको साङलीम हार निक्शी पा वोइक्चा कली दारीमपुकी,
14 बोसपुकी राप्पाइश्शा वोइक्तीके नु बोसपुकी,
15 मेको दोम्ली माइश्शो ठेयब चिक्तीके नु मेको आ राप्पाइक्तीके ङा १२ ओटा ब्यफपुकी,
16 ग्योंबपुकी, बेल्चापुकी, श्ये ग्रुंइतीक कांटापुकी नु मेकेर माल्शो मारेइ मारेइ सोलोमनम अरेशो खोदेंशो पा हुराममी परमप्रभु यावे आ खिं कली सेल्शो नेल्ल टल्केपपाइश्शो कांसा के बाक्मा बाक्त।
17 मिनु पिपमी मेको नेल्ल यर्दन ङा दिंम ङा खपीम, सुक्कोथ नु सेरेदाह सहर आस दातेम यपाइश्शा सेल्पाइश्शो बाक्माक्त।
18 मोपा सोलोमनमी मेकेर शुश कांसा के सेल्तीके सेल्पदा बाक्त। मेको कली दोशो कांसा माल्दमे, मेको मतुइश्शो बाक्मा बाक्त।
19 मिनु सोलोमनम परमप्रभु आ खिं कली माल्तीक मारेइ मारेइ सुन के चढ़ेतीके, कोंइतीक शोब्ले वोइक्तीके टेबलपुकी सेल्पदा बाक्त।
20 मिनु मोसाम देंशो खोदेंशो पा नेल्ल क्येङा चोव़खो कोठा आ ङोंइती दाचा कली क्येख सुन के बत्ती दातीक नु आन तेल वोइक्तीके सेल्पदा बाक्त।
21 मेकोमी क्येख सुन के फू, तेल वोइक्तीके नु थनारोपुकी,
22 क्येख सुन के सल्दो क्योरतीके, बोसपुकी नु डाडुपुकी नु मी कुरतीके सेल्पदा बाक्त। मिनु परमप्रभु यावे आ खिं ङा लाप्चो, आगा ङा नेल्ल क्येङा चोव़खो कोठा ङा लाप्चो नु ठेयब बाक्तीक ङा लाप्चो नेल्ल सुन के सेल्पदा बाक्त।