1 Kings 13 in Sunwar
1 मिनु येरोबाम धूप चोचा कली चढ़ेतीक आ नेक्था राम्मेनु, परमप्रभु आ मुर का परमप्रभु यावे आ लोव़ कुरशा यहूदा रे बेथेलम जाक्माक्त।
2 मिनु मेकोमी मेको चढ़ेतीक आ पर्बम परमप्रभु यावे आ लोव़ पा “ए चढ़ेतीके! ए चढ़ेतीके! परमप्रभु यावेमी ‘दाऊद आ खिं रे योसीयाह नें पाइश्शो आल का जरमेब। मिनु मेकोमी इर थान ङा धूप चोइब चढ़ेब आन कली क्योरशा इ तार चढ़ेब। मेको आन रुश इ तार चोइब’ देंशो बाक्ब” देंमाक्त। २राजा २३:१६,२०
3 मेको नाक्त मेको मुरुमी चिन्ड का कोंइदा बाक्त। मेकोमी “परमप्रभु यावे आ लोव़ आ चिन्ड मार बाक्ब देंशा हना, मेको चढ़ेतीक ब्रेप्ब। मिनु मेकेर बाक्शो पुलु चहिं लाङगाम ब्राइब” देंमाक्त।
4 मिनु येरोबामम परमप्रभु आ मुरुम बेथेल ङा चढ़ेतीक आ पर्बम ठेयब सेंदा पा देंशो लोव़ नेना बाक्त। मिनु मेकोम चढ़ेतीक रे आ गुइ दिंशा “मेरे कली ग्याइक्तीन” देंमाक्त। तन्न येरोबाम आ गुइ मुक्ने मचबा बाक्त।
5 परमप्रभु यावे आ लोव़मी आ मुर रे देंशो लोव़ गाप्शा, चढ़ेतीक ब्रेम्माक्त। पुलु यो लाङगाम ब्रमाक्त।
6 मिनु पिपमी परमप्रभु आ मुर कली “आं गुइ ङोंइती ङा खोदेंशो दुम्ल, दे परमप्रभु यावे, इन परमप्रभु कली आं पर्बम पुनीन” देंमाक्त। मिनु पिप आ देंशो खोदेंशो पा मेको परमप्रभु आ मुरुम परमप्रभु यावे कली पुना बाक्त। मिनु पिप आ गुइ ङोंइती ङा खोदेंशो दुम्माक्त। प्रस्थान ८:४
7 मिनु पिपम परमप्रभु आ मुर कली “गो नु आं खिं गाक्कीन। मिनु मारेइ जचा थोव़क जने। मिनु गो इन कली कोसेली गेनन्नी” देंमाक्त।
8 तन्न मेको परमप्रभु आ मुरुमी पिप कली “गे आं कली इन राज्य उइक्थ पा योक्शा गेतीनी हना यो, गो इन खिं मलाइनुङ। गो जचा थोव़क यो मजाइनुङ, ब्वाक्कु यो मतूनुङ।
9 मारदे हना परमप्रभु यावेमी आं कली ‘गे मेकेर जचा थोव़क मजावो। ब्वाक्कु यो मतूङो। मिनु इ लशो लां रे लेश्शा मपिवो’ देंशो बाक्ब” देंमाक्त।
10 मोपतीके मेको अर्को लां रे पा लेम्माक्त। ङोंइती बेथेल जाक्शो लां रे मलेम्माक्त।
11 मेना बेथेलमी खूशो परमप्रभु यावे आ लोव़ पाइब मुर का बाक्माक्त। मिनु मेको आ तौपुकी जाक्शा, मेको नाक्त परमप्रभु आ मुरुम बेथेलम पशो गेय नेल्ल शेंदमे बाक्त। मेकोपुकीम मेकोमी पिप कली देंशो लोव़ यो आन आफ कली शेंदमे बाक्त।
12 मिनु मेको आन आफोमी मेको आन कली “मेको तेको लां रे लम?” दे हिल्लो पामी बाक्त। मिनु आ तौपुकीम यहूदा रे जाक्शो मेको परमप्रभु आ मुर लशो लां कोंइदमे बाक्त।
13 मिनु मेकोमी आ तौ आन कली “आं कली गधा काम लगम पाइश्शा गेयीनी” दे माइक्मी बाक्त। मिनु मेकोपुकीम मेको कली गधा काम लगम पाइश्शा गेमे बाक्त। मिनु मेको गधाम ङोइश्शा, मेको मुर आ नोले खोदा बाक्त।
14 मिनु मेकोमी परमप्रभु आ मुर माल्शा, मेको कली रवा आ पुंमी नाइश्शा बाक्शो थिदा बाक्त। मिनु मेकोमी मेको कली “यहूदा रे जाक्शो परमप्रभु आ मुर गेन ननी?” दे हिल्लो पवा बाक्त। मिनु मेकोम “ओं, गोन नङ” देंमाक्त।
15 मिनु मेकोमी मेको कली “गो नु आं खिं लशा, मारेइ जचा थोव़क जने” देंमाक्त।
16 तन्न मेकोमी “गो गे नु लेश्शा लने मचाप्नुङ। इन खिंम ओव़ने मचाप्नुङ। गो एको रागीम मारेइ जने तूने मचाप्नुङ।
17 मारदे हना परमप्रभु यावेमी ‘गे मेको रागीम जचा थोव़क मजावो। ब्वाक्कु यो मतूङो। इ लशो लां रे मलेतो’ देंशो बाक्ब” देंमाक्त।
18 मिनु मेको परमप्रभु यावे आ लोव़ पाइब खूशोमी मेको कली “गो यो इन खोदेंशो परमप्रभु यावे आ लोव़ पाइब नङ। मिनु परमप्रभु यावे आ स्वर्ग ङा गेय पाइब काम गो नु जचा तूचा कली इन कली आं खिंम चाक्चा माल्नेवे देंत” देंमाक्त। तन्न मेकोमी मेको कली जोल पाइश्शो बाक्माक्त।
19 नोले मेको परमप्रभु आ मुर लेश्शा, मेको नु लमाक्त। मिनु मेको आ खिंम जवा तूङा बाक्त।
20 मिनु मेकोपुकी जना जन बाक्मानु, परमप्रभु यावेमी मेको लेश्शा चाक्ब, आ लोव़ पाइब खूशो कली लोव़ पपदा बाक्त।
21 मिनु मेकोमी यहूदा रे जाक्शो, परमप्रभु आ मुर कली ठेयब सेंदा पा “परमप्रभु यावेमी ‘गे परमप्रभु यावे आ लोव़ मटिवी। मिनु गे परमप्रभु यावे, इ परमप्रभु आ अरेशो मटिवी।
22 मेको आ मजावो, मतूङो देंशो रागीम लेश्शा, जथ तूथ जाक्ते। मोपतीके मुल इ बेक्शो रां इ किकी पिपी आन तुरसुम मथिम्सीब’ देंशो बाक्ब” देंमाक्त।
23 मिनु मेको परमप्रभु आ मरुम जने तूने थुमा नोले, मेको कली लेश्शा चाक्ब परमप्रभु यावे आ लोव़ पाइब खूशोमी मेको कली आ लगम पाइश्शो गधा गेवा बाक्त।
24 मिनु मेको लना लन बाक्मेनु लांम गुप्स का ग्रूशा मेको कली सदा बाक्त। मिनु मेको आ बेक्शो रां लांम गोल्शा लीमाक्त। गधा मेको आ नेक्थान राप्शा बाक्शो बाक्माक्त। मिनु गुप्स यो मेको आ नेक्था राप्शा बाक्शो बाक्माक्त। १राजा २०:३६
25 मिनु मेको लां रे पा गाक्ब मुरपुकीम मेको आ बेक्शो रां लांम गोल्शा बाक्शो नु गुप्स मेको आ नेक्थान बाक्शो तामे बाक्त। मिनु मेकोपुकीम मेको खूशो परमप्रभु यावे आ लोव़ पाइब आ सहर लशा, मेको लोव़ शोव़ङमे बाक्त।
26 मिनु मेको कली लां रे लेश्शा चाक्ब मेको खूशो परमप्रभु यावे आ लोव़ पाइबमी मेको लोव़ नेना बाक्त। मिनु मेकोम “मेको परमप्रभु आ मुर बाक्ब। मेकोम परमप्रभु यावे आ लोव़ मटिशो बाक्त। मोपतीके परमप्रभु यावेम मेको कली गुप्स कली गेवा बाक्त। मिनु परमप्रभु यावेम मेको आ पर्बम पशो लोव़ गाप्चा कली गुप्सम मेको कली सदा बाक्त” देंमाक्त
27 मिनु मेको परमप्रभु यावे आ लोव़ पाइब खूशोमी आ तौ आन कली “आं कली गधा काम लगम पाइश्शा गेयीनी” दे माइक्मी बाक्त। मिनु गधाम लगम पाइश्शा गेमे बाक्त।
28 मिनु मेको लमेनु, मेको मुर बेक्शा लांम गोल्शा बाक्शो नु गधा नु गुप्स मेको आ नेक्था राप्शा बाक्शो थिदा बाक्त। मेको गुप्सम मेको बेक्शो मुर कली मब्वशो बाक्माक्त। गधा कली यो मसाइश्शो बाक्माक्त।
29 मिनु मेको परमप्रभु यावे आ लोव़ पाइब खूशोमी मेको परमप्रभु आ मुर आ बेक्शो रां गुप्शा गधाम वोदा बाक्त। मिनु मेको आ पर्बम रोंका पा थिम्चा कली आ सहरमी चाक्गा बाक्त।
30 मिनु मेकोम मेको बेक्शो मुर कली आ तुरसुमीन थिमा बाक्त। मिनु मेकोपुकीम “ए आंइ लोक्ब, ए आंइ लोक्ब” दे रोंका पामे बाक्त। येरमीया २२:१८
31 मिनु मेको कली थिम्ने थुम्शा, मेको परमप्रभु यावे आ लोव़ पाइब खूशोमी आ तौ आन कली “गो बेक्ङा नोले आं कली यो मेकेर वोतीन। आं रुश मेको परमप्रभु आ मुर आ नेक्था लीमल।
32 मारदे हना मेको मुर आ देंशो, बेथेलम बाक्शो परमप्रभु यावे कली चढ़ेतीक नु सामरीया सहर ङा डांडा ङा थान आन पर्बम देंशो नेल्ल थमा पा गाप्ब” देंमाक्त।
33 मिनु मेको नोले यो येरोबामम आ मरिम्शो पतीक मप्रोना बाक्त। मेकोम डांडाम बाक्शो थानम थर नेल्ल ङा मुर रे चढ़ेब योव़शा वोइक्ना वोइक्न बाक्माक्त। सुइ मुर चढ़ेब दुम्चा दाक्ताक्व हना, मेको कली तेकोइ डांडा का ङा चढ़ेब सेल्शा वोदा बाक्त। १राजा १२:३१; प्रस्थान २८:४१
34 मेको येरोबाम आ खिं ङा पाप बाक्त। मोपतीके मेको आ खिं मलीथु, रागी रे क्याम्चा पुंइसे बाक्त।