1 Kings 12 in Sunwar
1 रेहोबाम शेकेम सहर लमाक्त। मारदे हना इस्राएली नेल्ले मेको कली पिप सेल्चा कली मेकेर लशो बाक्मा बाक्त।
2 मिनु नेबात आ तौ येरोबामम मेको लोव़ नेना बाक्त। मेको मेना सम्म इजीप्त रागीमी बाक्शो बाक्माक्त। मेको सोलोमन पिप क्येङा प्रोक्शा, लशो बाक्माक्त। मिनु येरोबाम इजीप्त रे लेम्माक्त। १राजा ११:४०
3 मोपतीके मुरपुकीम येरोबाम कली ब्रेत्थ सोइक्तमे बाक्त। मिनु मेको नु इस्राएली नेल्ल जाक्शा रेहोबाम कली
4 “इन आफोमी आंइ कली शुश श्येत गेप्तु। मिनु मुल गे इन आफ खोदेंशो मपथु, आंइ कली मोदेंशो श्येत रे प्रोनीन। मिनु गो इन गेय पाइब दुम्नीकी” देंमा बाक्त।
5 मिनु रेहोबामम मेको आन कली “आं कली नाक्त सां सम्म मिम्चा गेयीनी। मिनु लेंशा जाक्कीन” देंमाक्त। मोपतीके मुरपुकी खिं लमा बाक्त।
6 मिनु पिप रेहोबाममी आ आफ सोलोमन आ पाला ङा सल्ला गेब खाल्पापुकी नु सल्ला पुंइशा “एको मुर आन कली गो मार देंङ, गे मार सल्ला गेनीनी?” दे हिल्लो पामी बाक्त।
7 मिनु मेकोपुकीमी “मुलाक्त गे मेको मुर आन कली रिम्शो पाइतीनी हना, गे मेको आन गेय पाइब खोदेंशो दुमीन। मिनु मेको आन कली रिम्शो लोव़ पने। मिनु नोले मेकोपुकी गेना हना यो इन गेय पाइब दुम्नीम” देंमा बाक्त।
8 तन्न मेकोमी मेको खाल्पा आन सल्ला मबिस्से बाक्त। मिनु मेकोमी आ खोदेंशो आ नु कोल्शो सल्ला गेब ठिटा आन कली सल्ला पुना बाक्त।
9 मिनु मेकोमी मेको आन कली “गे मार देंनीनी? मुरपुकीमी ‘इन आफोम शुश श्येत गेप्तु’ देंतेक्म। मुल गो मेको आन कली मार देंचा माल्नुङा?” दे हिल्लो पामी बाक्त।
10 मिनु मेको नु कोल्शो ठिटापुकीम मेको कली “इन कली ‘इन आफोम शुश श्येत गेप्तु, मुल गे आंइ कली मेको श्येत रे प्रोनीन’ देंब आन कली गे मार देंचा माल्नीनी देंशा हना ‘आं आइक्च ब्रेप्चो आं आफ आ क्रातो क्येङा यो ठेयब बाक्ब।
11 आं आफोम इन कली श्येत गेप्तु। मुल गो इन कली मेको क्येङा यो शुश श्येत गेनुङ। आं आफोम इन कली कोक्केम तुप्पाइश्शो बाक्त। तन्न मुल गो इन कली बिच्छीम क्राइक्पाइक्नन्नी’ दे मतीन” देंमा बाक्त।
12 मिनु पिपमी नाक्त सां नोले जाक्कीन, दे सोइश्शो येरोबाम नु मुर नेल्ले पिप रेहोबाम आ बाक्तीक जाक्मा बाक्त।
13 मिनु पिपमी मेको खाल्पा आन गेशो सल्ला मनेंथु, मेको आन कली मरिम्शो लोव़ पाइक्मी बाक्त। हितोपदेस १५:१
14 मेको ठिटा आन गेशो सल्ला बिश्शा, मुर आन कली “आं आफोम इन कली श्येत गेप्तु। मुल गो इन कली मेको क्येङा यो शुश श्येत गेनुङ। आं आफोमी इन कली कोक्केम तुप्पाइश्शो बाक्त। तन्न मुल गो इन कली बिच्छीम क्राइक्पाइक्नन्नी” दे माइक्मी बाक्त।
15 मोपा पिपम मेको मुर आन लोव़ मनेना बाक्त। मारदे हना, शिलो सहर ङा अहीयाह रे पा नेबात आ तौ येरोबाम कली देंशो लोव़ गाप्चा कली परमप्रभु यावेमी मोदेंशो पशो बाक्माक्त। १राजा ११:२९-३१
16 मिनु इस्राएली नेल्लेमी पिपम मेको आन लोव़ मनेंशो तुइश्शा, मेकोपुकीम पिप कली “दाऊद नु आंइ के ततीक मार बाक्बा ङा? येस्से आ तौ नु आंइ के ततीक मारेइ मबाक्ब। इस्राएली, आंम आंम खिं लेतीन। दाऊद गे आंम थुती थाती पांइसो” देंमा बाक्त। मोपतीके इस्राएली आन आन खिं लेम्मा बाक्त। २सामुएल २०:१
17 तन्न पिप रेहोबामम यहूदा ङा सहरम बाक्ब इस्राएली आन कली सासन पना पन बाक्माक्त।
18 मिनु पिप रेहोबामम वाइल आन गेय कोव़ब अदोराम कली सोइक्ता बाक्त। तन्न इस्राएली नेल्लेम मेको कली फुल्लु आप्शा सदमे बाक्त। मोपतीके पिप रेहोबाम रीब पा आ बग्गी ङोइश्शा यरूसलेम प्रोक्माक्त।
19 मोपतीके मेको नाक्त रे मुल सम्म इस्राएलीपुकी दाऊद आ खिं ङा मुर नु जोरी सत्रु दुम्शो बाक्नीम।
20 मिनु इस्राएली नेल्लेमी “येरोबाम लेश्शा जाक्शो बाक्ब” देंशो लोव़ नेंशा, मेको कली ब्रेत्थ सोइक्तमे बाक्त। मिनु मेको कली इस्राएल ङा पिप सेल्मे बाक्त। यहूदा आ थर ङा मुर ला दाऊद आ खिं ङा मुर आ नोले खोदमे बाक्त।
21 मिनु सोलोमन आ तौ रेहोबाम यरूसलेमम जाक्शा, इस्राएली नु लडाइ पा आ राज्य लेत्चा कली यहूदा नु बेन्यामीन आस थर ङा लाख का ८० हजार लडाइ पाइब आन कली खुप्तीमी बाक्त।
22 तन्न परमप्रभुमी आ मुर शेमायाह कली लोव़ पवा बाक्त।
23 मार लोव़ पवा बाक्त देंशा हना “सोलोमन आ तौ यहूदा ङा पिप रेहोबाम, यहूदा नु बेन्यामीन आस थर ङा मुर नेल्ल नु लीशो मुर आन कली,
24 परमप्रभु यावेमी ‘गेपुकी आंम लोक्ब इस्राएली नु लडाइ पचा कली इर मलने। गे नेल्ल इन खिं खिं लेश्शा लने। मारदे हना एको आं मिम्शा पशो बाक्ब’ देंनो” देंमाक्त। मोपतीके मेकोपुकी परमप्रभु यावे आ देंशो खोदेंशो पा लडाइ पथ मलथु, आन खिं खिं लेश्शा लमा बाक्त।
25 मेको नोले येरोबाममी एफ्राइम ङा पहाडम बाक्शो शेकेम सहर सेला बाक्त। मिनु आ रागी बोल्यो सेल्शा, मेकेर बाक्माक्त। मेकेर रे लशा मेकोम पेनुएल सहर सेला बाक्त।
26 मिनु येरोबामम आ थुंमी “एको राज्य दाऊद आ खिं गेन लेश्शा लाइब।
27 एको मुरपुकी गेना हना यो परमप्रभु यावे आ खिं यरूसलेमम चढ़ेथ लाम्तेक्म हना, मेको आन थुं आन ठेयब मुर यहूदा आ खिं ङा पिप रेहोबाम गे लेप्ब। मेकोपुकीम आं कली साइश्शा यहूदा ङा पिप रेहोबाम गे लेत्नीम” दे मिम्शो बाक्माक्त।
28 मिनु पिपम सल्ला पा सुन के बाछा निक्शी सेल्पदा बाक्त। मिनु मेकोम मुर आन कली “गे मुल यरूसलेम लशा शुश श्येत जाइनीनी। इस्राएली, इन कली, इजीप्त रे ग्रुंइशा चाक्ब देवता एकेन बाक्नीम” दे माइक्मी बाक्त। प्रस्थान ३२:४,८
29 मिनु मेकोमी मेको बाछा का बेथेल सहरम नु का चहिं दानम वोदा बाक्त। न्यायाधीस १८:३०
30 मिनु मेको मो पशो इस्राएलमी पाप दुम्माक्त। मुरपुकी मेको देवता आस कली पूजा पचा कली बेथेल नु दान सम्म लाइबाक्मा बाक्त। १राजा १४:१६
31 मिनु येरोबामम डांडा तार यो पूजा पतीक थानपुकी सेला बाक्त। मिनु मेकेर लेवी आन मुर मबाक्तेक्म हना यो अर्को थर ङा मुर रे चढ़ेबपुकी योव़शा वोइक्मी बाक्त।
32 मिनु येरोबामम ८ महिना ङा १५ नाक्त यहूदा ङा चाड खोदेंशो पा चाड का मानेतीक नाक्त सेला बाक्त। मिनु थानपुकीम क्योरशा चढ़ेपपाइक्मी बाक्त। मेकोमी आ सेल्शो बाछा आस कली यो मार मार क्योरशा चढ़ेपपाइक्मी बाक्त। मेकोमी बेथेलम आ सेल्शो डांडा ङा थानपुकीमी यो चढ़ेब आन कली योव़शा वोइक्मी बाक्त।
33 मेकोम ८ महिना ङा १५ नाक्त आ देंशो ना बेथेल ङा आ सेल्शो चढ़ेतीकेम मार मार चढ़ेवा बाक्त। मोपा मेकोम इस्राएली आन कली चाड का मानेतीक नाक्त सेला बाक्त। मिनु मेकोमी धूप चोवा बाक्त।