1 Kings 14 in Sunwar
1 मिनु येरोबाम आ तौ अबीयाह रोइ पवा बाक्त।
2 मिनु येरोबाममी आ मीश कली “गे येरोबाम आ मीश नवे, दे मुरुम मतुइक्पाइक्चा ङा पा वा फेक्सो। मिनु शिलो सहरम लावो। मेकेर परमप्रभु यावे आ लोव़ पाइब अहीयाह बाक्ब। मेकोम आं कली एको मुर आन पिप दुम्नेवे देंशो बाक्त। १राजा ११:२९-३१
3 मिनु गे १० ओटा शोब्ले, आइक्च बटुक नु गर का खुदो लाइश्शा, मेको आ बाक्तीक लावो। मिनु मेकोमी आल कली मार दुम्बा, मेको इ कली शेंब” दे मदा बाक्त।
4 मोपतीके येरोबाम आ मीशेम मेकोम देंशो खोदेंशो पवा बाक्त। मिनु मेको रीब पा शिलो अहीयाह आ खिं लमाक्त। मेना अहीयाह मिक्च मताइब दुम्शो बाक्माक्त। मारदे हना मेको खूशो दुम्शो बाक्माक्त।
5 तन्न परमप्रभु यावेमी अहीयाह कली “येरोबाम आ मीश आ रोइ पशो तौ आ पर्बम इ कली हिल्लो पथ जाक्ब। मिनु गे मेको कली आं देंशो लोव़ मतो” देंमाक्त। मिनु मेको अर्को मीश मुर दुम्खु पा जाक्माक्त।
6 मिनु अहीयाहमी आ लाप्चोम खोइल थेक्शो नेंशा, मेको कली “ए येरोबाम आ मीश खिंङगा पिवो। गे मारदे अर्को मीश मुर खोदेंशो दुम्खु पवी? गो इ कली मरिम्शो लोव़ देंचा माल्नुङ।
7 गे येरोबाम कली परमप्रभु यावे, इस्राएली आन परमप्रभुमी ‘गो इ कली मुर आन दाते ङा ठेयब मुर सेल्ता। मिनु आं मुर इस्राएली, आन कली सासन पाइब सेल्तन। १राजा ११:३७
8 गो दाऊद आ खिं ङा मुर रे राज्य ख्रोइश्शा, इ कली गेतन। तन्न गे आं गेय पाइब दाऊद खोदेंशो मदुमे। मेकोमी आं ङोंइती मार ठीक बाक्मे, मेको पना पन आं देंशो टिप्तु। मिनु आ थुं नेल्लेम आं नोले खोइक्ती।
9 तन्न गे इ क्येङा ङोंइती ङा मुर नेल्ल आन क्येङा यो शुश मरिम्शो पाप्तीवी। गे इ कली यपाइश्शा देवी देवता आन मूर्ति सेल्शा, आं कली गाइक्पाइक्ती। मिनु गे नोले शोंइसाक्वे।
10 मोपतीके गो येरोबाम आ खिंम श्येत चाक्शा, मरिम्शो पाइनुङ। गो इस्राएलम बाक्शो येरोबाम आ खिं ङा वोंइश मुर, वाइल बाक्तेक्म हना यो, अरु मुर बाक्तेक्म हना यो, नेल्ल आन कली साइक्नुङमी। गो मेको आन कली मनुम्मा सम्म येरोबाम आ खिं कली गोबर चोशो खोदेंशो पा चोइनुङ। १राजा १५:२९; १राजा २१:२१
11 सहरम बेक्शो येरोबाम आ खिं ङा मुर आन कली कुचुमम ब्वाइनीम। मिनु रू मेर बेक्शो आन कली चिक्बीम ब्वाइनीम’ दे परमप्रभु यावेमी देंशो बाक्ब। १राजा १६:४; १राजा २१:२४
12 मुल गे लेश्शा इ खिं लावो। गे सहरम ओव़ङे चोटी इ आल बेक्ब।
13 मिनु इस्राएली नेल्लेमी मेको आ पर्बम रोंका पा, मेको कली थिम्नीम। मारदे हना मेको का ला रिम्शो पा थिम्चा पुंइसीब बाक्त। परमप्रभु यावे, इस्राएली आन परमप्रभुमी मेको आल कली दाक्ताक्व।
14 मिनु परमप्रभु यावेमी इस्राएलमी पिप का सेल्ब। मेकोमी येरोबाम आ खिं कली क्याम्ब। मेको मुलाक्तीन बाक्ब। १राजा १५:२९
15 परमप्रभु यावेम इस्राएल कली ब्वाक्कुम एर ओंथ पा हिम्शो बुदी मीलु घांस खोदेंशो सेल्ब। मेकोमी इस्राएली आन किकी पिपी आन कली गेशो, एको रिम्शो रागी रे खेरब। मिनु मेको आन कली युफ्रेटीस खोला आ आइक्ची हांबुम एर ओंथ ब्रपाइक्ब। मारदे हना मेकोपुकीम देवी आ मूर्ति पाइश्शो थाम सेल्शा, परमप्रभु यावे कली गाइक्पाइक्तेक्म। २राजा १७:२३
16 मिनु मेकोमी येरोबामम मरिम्शो पतीके नु इस्राएली आन कली मरिम्शो पपाइश्शो आ पर्बम इस्राएल कली प्रोंइब” देंमाक्त। १राजा १२:२८-३०; १राजा १३:३४
17 मिनु येरोबाम आ मीश बोक्शा, आ खिं तिरचा सहर लेम्माक्त। मिनु मेको आ खिं ङा लाप्चो जाक्मेनु, आल बेक्माक्त।
18 मिनु परमप्रभु यावेम आ गेय पाइब, अहीयाह रे पा देंशो खोदेंशो पा इस्राएली नेल्लेमी मेको आ पर्बम रोंका पा थिम्मे बाक्त।
19 येरोबाम आ पशो अरु गेय, मेको आ पशो लडाइपुकी, मेकोम दोदेंशो पा सासन पवा, मेको नेल्ल इस्राएल ङा पिप आन इतिहासम ब्रेक्शो बाक्ब।
20 येरोबाममी २२ बर्स सासन पवा बाक्त। मिनु मेको बेक्माक्त। मिनु मेको आ पा ङा आ तौ नादाब पिप दुम्माक्त। १राजा १५:२५
21 मिनु सोलोमन आ तौ रेहोबाम यहूदा ङा पिप दुम्माक्त। मेको ४१ बर्स दुम्शो बाक्माक्त। मेकोम यरूसलेम सहरम १७ बर्स सासन पवा बाक्त। परमप्रभु यावेमी इस्राएली आन थर नेल्ल आन दातेम बाक्चा कली मेको सहर योव़शो बाक्माक्त। रेहोबाम आ ममा आ नें नामा बाक्माक्त। मेको अम्मोनी का बाक्माक्त। १राजा १२:१७
22 यहूदा ङा मुरपुकीम परमप्रभु यावे आ ङोंइती मार मरिम्शो बाक्मे, मेको पामे बाक्त। मेकोपुकीमी आन किकी पिपीम मरिम्शो पशो क्येङा यो शुश मरिम्शो पामे बाक्त। परमप्रभु यावे कली थाम्पा रुश पपदमे बाक्त।
23 मेकोपुकीम इर डांडा डांडा ङा थानम, देवी आ मूर्ति पाइश्शो थाम नु लाइश्शो डांडा ङा शुश सफा पाइश्शो रवा आन आगाम थान सेल्समा बाक्त। २राजा १६:१-४
24 मेको रागी ङा थानम तेल्लेम वोंइश मुरपुकी यो बाक्मा बाक्त। मेकोपुकीमी परमप्रभु यावेमी आन ङोंइती रे खेरशो रागी रागी ङा मुर आन ग्रांग्रा दिशो नेल्ल पामे बाक्त।
25 मिनु रेहोबामम सासन पवा आ ५ बर्सम इजीप्त ङा पिप शीशकमी यरूसलेम कली लडाइ तोवा बाक्त। १राजा ११:४०
26 मिनु मेकोमी परमप्रभु यावे आ खिं नु पिप आ खिं ङा शुश क्येट लाइब मारेइ मारेइ रोइश्शा लदा बाक्त। मेकोम सोलोमन आ सेल्शो सुन के तेक्तीक नेल्ल योल्दा बाक्त। १राजा १०:१६
27 मिनु पिप रेहोबामम मेको आ पा ङा कांसा के तेक्तीक सेल्शा, पिप आ खिं ङा लाप्चो खाल पाइब आन ठेयब मुर आन कली जिम्मा गेमी बाक्त।
28 मिनु पिप परमप्रभु यावे आ खिंम ओव़मेनु, मेको खाल पाइबपुकीम मेको तेक्तीके कुरबाक्मा बाक्त। मिनु नोले लेश्शा चाक्शा खाल पाइब आन कोठाम वोइक्बाक्मा बाक्त।
29 रेहोबाम आ पशो अरु गेय, मेको आ पशो नेल्ले मार, मेको यहूदा ङा पिप आन इतिहासम ब्रेक्शो मबाक्बा ङा?
30 रेहोबाम नु येरोबाम आस दातेम गेना हना यो लडाइ दुम्स ङा दुम्स बाक्माक्त।
31 मिनु रेहोबाम बेक्माक्त। मिनु मेको आ किकी पिपी नु दाऊद आ सहरम थिम्चा पुंइसे बाक्त। मेको आ ममा आ नें नामा बाक्माक्त। मेको अम्मोनी बाक्माक्त। मिनु रेहोबाम आ पा ङा आ तौ अबीयाम पिप दुम्माक्त।