Proverbs 12 in Yalunka
1 Xurun nafan naxan ma, fe kolonna fan nafan na kanna ma. Naxan mi tinɲɛ bonne xa a sɔnna fala a xa, xaxilitaren nan na kanna ra.
2 Muxu faɲin Alatala kɛnɛnma. Koni Alatala kɔtade ɲaxin yalagima nɛn.
3 Muxun mi sabatima fe ɲaxin xɔn. Koni tinxin muxune salenne bitinma nɛn ken.
4 Ɲaxalan kɛndɛn nan a xɛmɛna xunna kenla ra. Koni ɲaxalan yagitaren luxi nɛn a xɛmɛn xa alo xɔri xɔlɛ furena.
5 Tinxin muxune miriyane findixi kiti kɛndɛn nan na. Koni muxu ɲaxine fe yitɔnxine yanfan nan tima.
6 Muxu ɲaxine falane findixi faxa ti woson nan na. Koni muxu faɲine dɛ xuina e xunbama nɛn.
7 Muxu ɲaxine na bira, e raxɔrima nɛn. Koni tinxin muxune denbayaan sabatima nɛn.
8 Muxun matɔxɔma a xaxilimayaan nan ma fe ra. Koni naxan bɔɲɛ ɲaxu, na raɲaxuma nɛn.
9 A fisa walikɛ keden yi lu i yii, i lu muxudiyani, benun i xa i yɛtɛ findi muxu gbeen na, donseen yi dasa i ma.
10 Tinxin muxuna a yengi dɔxɔma a xuruseene xɔn nɛn. Koni kininkinin mi muxu ɲaxine yi mumɛ!
11 Naxan na a bɔxɔn nawali, na lugoma nɛn. Koni naxan na bira fe fuune fɔxɔ ra, na xaxili mi na.
12 Muxu ɲaxine kunfama se muɲaxine nan xɔn. Koni tinxin muxune salenne sabatin nɛn.
13 Muxu ɲaxina hakɛ falane a suxuma nɛn alo luti ratixina. Koni tinxin muxun futuxuluma nɛn tɔrɔyaan yii.
14 Muxun fala xuiin nan a ralugoma se faɲine ra, a wali xɔnna yi findi a saranna ra.
15 Xaxilitarena a yɛtɛ sigati kiin nan yatɛxi kira kɛndɛn na. Koni fe kolonna nan a tuli matima maxadi xuine ra.
16 Xaxilitarena a xɔlɔn mayitama nɛn mafurɛn. Koni xaxilimaan yagi feen suturama nɛn.
17 Naxan na sereyaan ba ɲɔndini, na tinxinna nan fenma. Koni wule seren yanfan nan tima.
18 Naxan na falan ti a xunna yi, na muxune bɔɲɛn nan kalama alo dɛgɛmaan nan sɛgɛn tima. Koni fe kolonne falane dandanna nan tima.
19 Ɲɔndin luma nɛn habadan. Koni wulen sii mi na.
20 Naxanye fe ɲaxine yitɔnma, yanfan nan ne bɔɲɛni. Koni sɛwan na kanna xa naxan bɔɲɛ xunbenla rasoma.
21 Fe ɲaxi yo mi tinxin muxune liyɛ. Koni fe ɲaxin nan muxu ɲaxin sɔtɔma han a wasa.
22 Wule falane mi rafan Alatala ma. Koni ɲɔndi falane rafan a ma.
23 Xaxilimana a kolonna luxunma nɛn. Koni xaxilitarene e daxuyaan nawangama nɛn.
24 Naxanye walima a xɔdɛxɛn na, ne mangayaan sɔtɔma nɛn. Koni salantenna raɲanma konyiyaan nin.
25 Kɔntɔfinla muxun bɔɲɛn tɔrɔma nɛn. Koni fala faɲina a rasɛwama nɛn.
26 Tinxin muxun findixi yɛɛratiin nan na a xɔyin xa. Koni muxu ɲaxine kirana e ralɔma ayi nɛn.
27 Salantenna na mini donsoyani, a mi sube gan daxin sɔtɛ. Koni naxan walima a xɔdɛxɛn na, na se kɛndɛn nan sɔtɔma.
28 Siimayaan sɔtɔma tinxinna kiraan nan xɔn. Na kiraan mi tinxinxi sayaan na.