Proverbs 11 in Yalunka
1 Sikeela naxan muxun mayendenma na findixi fe ɲaxin nan na Alatala yɛɛ ra yi. Koni ligase sensenne a kɛnɛnxi.
2 Wason fama maraɲaxun nan na. Koni yɛtɛ magodon fama fe kolonna nan na.
3 Muxu faɲine fɛtareya wanle nan e tima kira faɲin xɔn. Koni yanfantenne tinxintareyaan nan e halagima.
4 Sese mi nafunla ra Ala kiti sa lɔxɔni. Koni tinxinna nan muxune xunbama sayaan ma.
5 Sɔntarene tinxinyaan nan e kiraan fixama. Koni fe ɲaxin nan muxu ɲaxin nabirama.
6 Muxu faɲine tinxinyaan nan e xunbama, koni kunfa ɲaxine findima luti ratixin nan na yanfantenne yɛɛ ra.
7 Muxu ɲaxin na faxa, a yigin birin bata kala, a xaxili tixi sɛnbɛn naxan na, na bata lɔ ayi.
8 Muxu tinxinxin xunbama nɛn a tɔrɔyani, na tɔrɔyaan yi sa muxu ɲaxin sɔtɔ a funfuni.
9 Ala kolontarena a adamadi bodene halagima a fala xuiin nan na. Koni tinxin muxune xunbama e fe kolonna nan xɔn.
10 Xa tinxin muxune sɛwa, taan birin nan ɲaxanma. Koni muxu ɲaxine na faxa, ɲaxaɲaxan nan na ra.
11 Taan sabatima muxu faɲine duban nan xɔn. Koni a kalama nɛn muxu ɲaxine dɛ xuiin ma.
12 Naxan na a adamadi boden naɲaxu, na xaxili mi na. Koni xaxilimana a dunduma nɛn.
13 Mafala tiin wundo feene nan naminima kɛnɛnni. Koni lannaya muxuna e ramarama nɛn.
14 Xa maxadin mi na, yamaan birama nɛn. Koni kisin na a ra xa kawandi muxune wuya ayi.
15 Naxan na a bodena donla goronna tongo, na tɔrɔma nɛn yati. Koni naxan na tondi na dɛ xui sifane ma, na kanna luma makantanna nin.
16 Ɲaxalan faɲin binyen nan sɔtɔma. Koni xaɲɛden tan nafunla nan sɔtɔma.
17 Lannaya muxuna a yɛtɛ nan malima. Koni kininkinintarena a yɛtɛ nan tɔrɔma.
18 Muxu ɲaxine walima nɛn fuu! Koni naxan na tinxinyaan liga, na saran kɛndɛn nan sɔtɔma.
19 Tinxinyaan fama nii rakisin nan na. Koni naxan na lu fe ɲaxin fɔxɔ ra, na faxama nɛn.
20 Muxu bɔɲɛ ɲaxine mi rafan Alatala ma. Koni fɛ mi naxanye sigati ki ra, ne nan a kɛnɛnxi.
21 Muxu ɲaxine saranma nɛn e kɛwanle ra. Koni tinxin muxune xunbama nɛn.
22 Ɲaxalan tofaɲin na findi xaxilitaren na, na luxi nɛn alo xɛma wuredin xɔsɛn ɲɔɛɛn na.
23 Tinxin muxun waxɔn feen nan fe faɲin na, koni muxu ɲaxine natan nan xɔlɔn na.
24 Muxuna ndee kiin tima e findi nafulu kanne ra, gbɛtɛye yi kuma ayi, e findi yiigelitɔne ra.
25 Muxun naxan luma dubɛ bonne xa, na bannama nɛn. Naxan bonne nii yifanma e ma, na fan nii yifanma a ma nɛn.
26 Naxan na maala malan, a tondi a matiyɛ, yamaan na dangama nɛn. Koni naxan na a mati, yamaan dubama nɛn na fan xa.
27 Naxan na fe faɲin fen na rafan muxune ma. Koni naxan na fe ɲaxin fen, na yati a sɔtɔma nɛn.
28 Naxan na la a nafunle ra, na birama nɛn. Koni tinxin muxune sabatima nɛn alo ɲɔxɔndena.
29 Naxan na a denbayaan tɔrɔ na mi kɛɛ sɔtɔma fɔ foyena. Xaxilitarene luma nɛn fe kolonne konyiyani.
30 Tinxin muxune kɛwanle luxi nɛn alo siimaya wudina. Fe kolonna naxan yi, na muxune niin nan nakisima.
31 Tinxin muxuna a saranna sɔtɔma dunuɲa yi, e faxi fa muxu ɲaxine nun yulubi kanne.