Isaiah 5 in Yalunka
1 N xa sigin sa n xanuntenna xa, n xɔyina manpa bili nakɔna fe ra. Manpa bili nakɔna nde yi n xanuntenna yii geyaan sabati yireni.
2 A bɔxɔn wali nɛn a yi gɛmɛne ba a yi, a yi sansi yɛbaxine si na yi. A yi gbengben ti kantan tiden na. A yi dɔlɔ ige baden ge fanyeni. A yengi yi manpa bogi faɲine nan ma a nakɔni, koni a manpa bogi xɔlɛne nan sɔtɔxi.
3 Nayi, n xanuntenna naxa, “Ɛ tan naxanye dɔxi Yerusalɛn yi, ɛ tan Yuda kaane, ɛ tan nan kitin sama nxu nun n ma nakɔɔn tagi.
4 N yi lan nun n xa nanfe gbɛtɛ liga n ma nakɔɔn xa, n munma naxan liga a xa singen? N yengi yi bogi faɲine nan ma nun, nanfera nayi, a bogine birin xɔlɔ?
5 Iki, n xa a fala ɛ xa n fama naxan ligadeni n ma manpa bili nakɔɔn na: N na a sansanna kalama nɛn, xuruseene yi a madon. N na a rabilinna yinna rabirama nɛn dangu muxune yi a yibodon.
6 N na a findima bɔxɔ rabeɲinxin na nɛn, a mi fa masɛgɛ, a mi biyɛ. Sɛxɛ ɲaxine nun ɲanle minima nɛn a ma, n yi tɔnna dɔxɔ kundane ma a e nama tulen nafa a ma.”
7 Alatala Sɛnbɛn Birin Kanna manpa bili nakɔɔn lanxi Isirayila yamaan nan ma. Nakɔɔn naxan yi rafan a ma nun han, Yuda yamaan nan yi na ra. Alatala yengi yi kiti kɛndɛn nan ma a yamani koni a gbalon nan lixi na. A yengi yi tinxinyaan nan ma, koni a gbelegbele xuiin nan mɛxi na.
8 Gbalon na kanne xa naxanye banxine tima e bode fari, e xɛɛne tugun e bode ra han e bɔxɔn birin tongo, e yi dɔxɔ kedenyani yamanani.
9 N tunla Alatala Sɛnbɛn Birin Kanna falani ito nan mɛxi, a naxa, “N bata n kɔlɔ, banxi wuyaxini itoe kalama nɛn. Banxi gbee faɲini itoe kui genla yi lu.
10 Manpa bili nakɔɔn naxan gbo han ɲingen xi fu tiyɛ naxan bideni, na mi manpa litiri tonge naanin naminɛ. Naxan na murutun kilo kɛmɛ bi, na kilo fu nan tun xabama.”
11 Gbalon na kanne xa naxanye kurunma, e e gi dɔlɔn fɔxɔ ra, naxanye xima e yɛɛ ra yi dɔlɔ mindeni, han e xunna yi keli.
12 E dɛgema e banden don ɲaxaɲaxane yi bɔlɔn xuiin nun konden xuini e nun tanban xuiin nun xulen xuiin nun dɔlɔna. Anu, e mi Alatala kɛwanle rakɔrɔsima e mi a wanle toma.
13 Nanara, Ala naxa, “N ma yamaan sigama nɛn konyiyani, bayo e mi waxi sese kolon feni. E muxu gbeene faxama kamɛn nan na, yamaan yi halagi ige xɔnla ma.”
14 Nanara, laxira a dɛni bima nɛn pon, a yi a so dɛ gbeeni bi dan mi naxan na muxu gbeene nun e yamaan birin yi godo mɛnni e nun e sɔnxɔ ratene nun e mananmanantɔne birin.
15 Muxune birin mafelenma nɛn, adamadiine fe yi godo, wasodene yi e xun sin.
16 Alatala Sɛnbɛn Birin Kanna fe yitema nɛn a kiti kɛndɛn xɔn. Ala sariɲanxina a sariɲanna mayitama nɛn a tinxinyaan xɔn.
17 Nayi, taa kalaxini ito findima nɛn yɛxɛɛne rabaden na, e fa e dɛge na, xɔɲɛne yi e balon sɔtɔ nafulu kanne banxi xɔnne yi.
18 Gbalon na kanne xa naxanye hakɛne e xidixi wulen xɔn alo lutina, e bubu e fɔxɔ ra. E e yulubin bandunma e fɔxɔ ra alo yɔlɔnxɔnna wontoron bandunma kii naxan yi.
19 E a falama, e naxa, “Ala xa a mafura, a xa a wanla kɛ xulɛn alogo nxu xa a to. A feen xa yiso, Isirayilaa Ala Sariɲanxina fe ragidixine xa rakamali, nxu yi a fe kolon.”
20 Gbalon na kanne xa, naxanye a falama, a fe ɲaxin fan, a fe faɲin ɲaxu, naxanye kɛnɛnna yatɛma dimin na, dimin yi yatɛ kɛnɛnna ra, naxanye xɔlɛn yatɛma a ɲaxumɛn na, ɲaxunna yi yatɛ xɔlɛn na.
21 Gbalon na kanne xa naxanye e yɛtɛ findixi fe kolonne ra e yi e yɛtɛ yatɛ xaxilimane ra!
22 Gbalon na kanne xa naxanye tunnafan dɔlɔ mindeni, naxanye fatan dɔlɔ minseene basanɲɛ!
23 E fe kalan beɲinma se feen na koni e mi tinma sɔntarena kitin sɛ.
24 Nanara, e luma nɛn alo tɛɛn sɛxɛn naxan ganma, alo sɛxɛ xaren naxan ɲanma tɛɛ dɛgɛni. E salenne kunma nɛn, e fugene yi siga ayi alo gbangbanna. Amasɔtɔ e bata e mɛ Alatalaa sariyan na, Sɛnbɛn Birin Kanna. E bata Isirayilaa Ala Sariɲanxina falan nabeɲin.
25 Nanara, Alatala bata xɔlɔ a yamaan ma han! A bata a yiini bandun e xili ma, a yi e ɲaxankata. Geyane xuruxurunma, binbine biraxi na xun xɔn alo ɲaman kiraan xɔn. Koni hali na birin, Alatalaa xɔlɔn mi ɲan, a yiin mɔn yi lu yitexi e xili ma.
26 Ala bata taxamasenni te alogo siya makuyene xa a to, a yi siyana nde xili kolinni sa keli bɔxɔn danna ra. Ɛ mi e to fɛ e giyɛ? E xulun de!
27 Muxu yo mi xadanxi e yɛ, e sese mi e madiganma, xixɔnla mi muxu yo ma, e birin bata xulun. Sofa yo mi a tagixidin fulunxi, e sese a sankidi luti mi bolonxi.
28 E xalimakunle ɲɔɛne ralemunxi, e xanle birin bandunxi. E soone torone xɔdɔxɔ alo gɛmɛna, e wontorone sanne firifirima alo wuluwunla.
29 E sofane sɔnxɔ xuiin magaxu alo yatana, e wurundunma alo yata sɛnbɛmane, e xaɲɛxin xɔɔyi seen suxuma, e yi a xali. Muxu yo mi nɔɛ a bɛ e yii.
30 Na lɔxɔni, e sɔnxɔni tema nɛn na yi alo fɔxɔ igen na walanɲɛ ayi. Nayi, naxan na a yɛɛn ti yamanan na, na dimin nun yigitɛgɛn nan toma a yi, kundaan yi lu kɛnɛnna yɛ ma.