Isaiah 6 in Yalunka
1 Manga Yusiya faxa ɲɛɛni, n Marigin to nɛn dɔxi mangaya gbɛdɛ matexini pon! A doma gbeen lenbene yi Ala Batu Banxin nafexi.
2 Maleka gubugubu kanne yi a xun ma. Gubugubu sennin nan yi e keden kedenna birin ma. Gubugubu firinna e yɛtagin yɛɛ maluxunxi, firinna e sanne yɛɛ maluxunxi, firin yi lu e tugan seen na.
3 E yi e xui raminima e bode ma, e naxa, “A sariɲan, a sariɲan, Alatala Sɛnbɛn Birin Kanna sariɲan! Bɔxɔn birin nafexi a binyen nan na.”
4 Ala Batu Banxin dɛɛn ti wudine nun a so dɛɛn lonna yɛtɛɛn yi lu xuruxurunɲɛ e xuiin ma, na yi rafe tutin na.
5 N yi a fala, n naxa, “Gbalona n xa, n bata halagi! Amasɔtɔ muxun nan n na naxan dɛ haramuxi, n dɔxi yamaan yɛ, fala haramuxin minima naxanye dɛ. Anu, n bata mangan to n yɛɛn na, Alatala Sɛnbɛn Birin Kanna.”
6 Koni maleka gubugubu kanna nde keden yi tugan, a fa n binni, tɛɛ wolonna suxi a yii, a naxan tongo saraxa ganden fari tɛɛ kɔ seen na.
7 A yi tɛɛ wolonna din n dɛɛn na, a yi a fala, a naxa, “Iki, bayo ito bata din i dɛɛn na, i hakɛn bata xafari, solonaan bata ti i yulubin ɲan feen na.”
8 Nayi, n yi Marigin xuiin mɛ maxɔdinna tiyɛ, a naxa, “N na nde rasigama? Nde sigɛ nxu xa?” N yi a yabi, n naxa, “N tan ni i ra, n nasiga.”
9 A mɔn yi a fala, a naxa, “Siga, i sa a fala yamani ito xa, i naxa, ‘Ɛ tuli matima nɛn han, koni ɛ mi fefe famuma. Ɛ seen matoma nɛn han, koni ɛ mi a yigbɛma.’
10 E bɔɲɛn naxɔdɔxɔ ayi, i yi e tunle xɔri, i e yɛɛne raxi. Xanamu, e yɛɛne toon tima nɛn, e tunle yi falan mɛ, e xaxinle yi feen famu, e yi xɛtɛ n ma, e kɛndɛyaan sɔtɔ.”
11 N yi maxɔdinna ti, n naxa, “Marigina, han waxatin mundun yi?” A yi n yabi, a naxa, “Han taane na halagi waxatin naxan yi, e muxu yo mi lu, e banxine yi kui geli, xɛɛne yi kala, e findi bɔxɔ rabeɲinxine ra,
12 han Alatala yi muxune masiga a ra han yamanan yi rabeɲin fefe!”
13 Xa muxune yatɛn yaganna ɲɔxɔn na lu yamanani, tɛɛn mɔn xɛtɛma nɛn na raxɔrideni. Koni wudi gbeene dungine nun wari dungine luma bɔxɔni kii naxan yi e na sɛgɛ waxatin naxan yi, bɔnsɔn sariɲanxina nde fan luma yamanani na kii nin alo wudi dungin naxan sa maɲingima.