Zechariah 12 in Sunwar
1 परमप्रभु यावेमी इस्राएल आ पर्बम पशो लोव़ एको बाक्ब। सरीङ नु रागी सेल्ब नु मुर आन कली सोक्त गेब परमप्रभु यावेमी मार देंत देंशा हना
2 “गो यरूसलेम कली आ एर ओंथ रागी ङा मुर आन गाइक्तीके सेल्चा चिक्शो बाक्नुङ। मुरपुकीमी यरूसलेम पुम्नीम। यहूदा यो श्येत जाइब। यसैया ५१:१७; येरमीया २५:१५-२९
3 मेको नाक्ती गो रागी ङा मुर नेल्ल आन कली यरूसलेम हेल्शो फुल्लु सेल्नुङ। तेको रागी ङा मुरुमी क्युक्चा लोक्चा माल्नीमी, मेकोपुकी शुश खाइक्पांइसीनीम। मिनु रागी रागी ङा मुर नेल्ल खुम्सीशा यरूसलेममी लडाइ पथ जाक्नीम। जकरिया १४:३; योएल ४:१२
4 मेको नाक्ती गो शारा नेल्ल आन कली शुश हिंपाइक्नुङ। मिनु शारा ङोइक्ब आन कली निप्स ग्यशो सेल्नुङ। गो यहूदा आ खिं ङा मुर आन कली कोव़नुङ। मिनु आन जोरी सत्रु आन शारा मिक्च मताइब सेल्नुङ।
5 मिनु यहूदा आ खिं खिं ङा मुरपुकीमी आंम आंम थुंमी ‘यरूसलेम ङा मुरपुकी बोल्यो बाक्नीम। मारदे हना मुर नेल्ल आन परमप्रभु यावे, मेको आन परमप्रभुमी मेको आन कली सक्ति पाइश्शो सेल्ब’ देंनीम।
6 मेको नाक्ती गो यहूदा आ खिं खिं ङा मुर आन कली शी तारी वोइश्शो ब्रुइश्शो बोस नु शी आन दातेमी ब्रशो तोव़शी खोदेंशो सेल्नुङ। मिनु मेकोपुकीमी ग्युरा नु पेरा गे बाक्ब नु पुम्ब मुर नेल्ल आन कली साइक्नीम। तन्न यरूसलेम आ बाक्तीके उइ बाक्शा, लेंशा मेकेर मुर बाक्नीम। ओबदिया १८:-
7 मिनु परमप्रभु यावेमी ङोंइती यहूदा ङा मुर आन कली श्येत रे प्रोंइब। मोपा दाऊद आ खिं ङा मान ततीके नु यरूसलेममी बाक्ब मुर आन मान ततीके यहूदा आन क्येङा शुश मदुम्ल” देंत।
8 मेको नाक्ती परमप्रभु यावेमी यरूसलेममी बाक्ब मुर आन कली वारच पाइब। मेकेर बाक्ब नेल्ल क्येङा मचाप्ब दाऊद खोदेंशो बाक्नीम। मिनु दाऊद आ खिं ङा मुर परमप्रभु खोदेंशो बाक्नीम। मिनु परमप्रभु यावे आ स्वर्ग ङा गेय पाइब मेको आन ङोंइती गाक्ब। यसैया ३३:२४
9 मिनु “मेको नाक्ती गो यरूसलेम कली लडाइ तोथ जाक्ब रागी रागी ङा मुर आन कली खतम सेल्नुङ” देंत।
10 मिनु परमप्रभुमी “गो दाऊद आ खिं ङा मुर नु यरूसलेममी बाक्ब मुर आन तारी शिशी पतीक नु पुंइतीक लोव़ पतीके सोक्त मोइक्नुङ। मो दुम्मेनु, आ साइश्शो आन कली तशा, मेको आन पर्बम आन का ला तौ आन पर्बम रोंका पशो खोदेंशो पा, रोंका पाइनीम। मेको आन पर्बम, आन ङोंइती जरमेशो तौ आन पर्बम खोदेंशो पा ङाक्नीम। योएल ३:१; यूहन्ना १९:३७; प्रकाश १:७
11 मेको नाक्ती मेगीददो ङा बेंसीमी हदाद-रिम्मोनमी रोंका पशो खोदेंशो पा यरूसलेममी ठेयब रोंका पाइनीम। २राजा ५:१८
12 रागी नेल्ल ङा मुरपुकी रोंका पचा माल्नीम। खिं खिं ङा मुरपुकीमी रोंका पचा माल्नीम। दाऊद आ खिं ङा वोंइश मुरपुकीमी रोंका पचा माल्नीम। मिनु मेको आन मीश आन दातेमी रोंका पचा माल्नीम। नाथान आ खिं ङा वोंइश मुरपुकीमी रोंका पचा माल्नीम। मिनु मेको आन मीश आन दातेमी रोंका पचा माल्नीम।
13 लेवी आ खिं ङा वोंइश मुरपुकीमी रोंका पचा माल्नीम। मिनु मेको आन मीश आन दातेमी रोंका पचा माल्नीम। शिमेइ आ खिं ङा वोंइश मुरपुकीमी रोंका पचा माल्नीम। मिनु मेको आन मीश आन दातेमी रोंका पचा माल्नीम।
14 लीशो खिं ङा वोंइश मुर नेल्लेमी रोंका पचा माल्नीम। मिनु मेको आन मीश आन दातेमी रोंका पचा माल्नीम” देंत।