Zechariah 11 in Sunwar
1 लेबानोन, मीम इ लाइश्शो रवा आन कली नेक्पाइक्चा कली इ लाप्चोपुकी रोक्को।
2 तोव़शी रवा रोंका पने। मारदे हना लेबानोन ङा लाइश्शो रवा गोल्तेक्म। मेको दारशो रवा खतम दुम्तेक्म। बाशान ङा बोल्यो शी के रवा रोंका पने। मारदे हना ठेयब ब्वाकी नेल्ल क्योव़शो बाक्ब।
3 गोठला आन रोंका पशो नेनीन। मेको आन रिम्शो योव़तीके खतम दुम्शो बाक्ब। गुप्स आन ग्रीशो नेनीन। यर्दन ङा ब्वाकी नेल्ल खतम दुम्शो बाक्ब।
4 परमप्रभु यावे, आं परमप्रभुमी “क्योरचा पुंइसीब भेडा आन कली योव़ङो।
5 मेको ग्याप्बपुकीमी भेडा क्योरशा सजाइ मतथु ब्रोंइशा लाइनीम। मिनु मेको आन कली लेयबपुकीमी ‘परमप्रभु ठेयब बाक्ब। मारदे हना गो शोंप पाइश्शो दुम्तक’ देंनीम। मिनु मेको भेडा आन गोठलामी मेको आन कली शिशी मपाइनीम। येरमीया २३:-; इजीकीएल १३:-; इजीकीएल ३४:-
6 मुल रे गो रागी ङा मुर आन कली शिशी मपाइनुङ” दे परमप्रभु यावेमी देंत। मिनु परमप्रभुमी “गो नेल्ल आन कली आन नेक्था ङा मुर आन गुइमी नु आन पिप आन गुइमी गेनुङ। मिनु मेकोपुकीमी रागी कली खतम सेल्नीम। मेको आन गुइ रे सुइ आन कली मप्रोंइनुङमी।
7 मोपतीके क्योरचा चिक्शो भेडा लेयब आन पा ङा गो गोठला दुम्ती। गो कोक्के निक्शी ग्याइक्ताक्ङ। मिनु गो का कली शिशी पतीक नु अर्को कली थुं का दुम्तीक नें वोइक्ता। मिनु गो भेडा आन कली योव़तामी।
8 गो महिना कामी गोठला सां आन कली खेरतामी। गो मेको आन गेय तशा ब्रीशा, फाल्ने मचाप्शो बाक्ती।
9 मिनु गो मेको आन कली ‘गो इन गोठला दुम्ने मचाप्नुङ। बेक्शा लाइबपुकी बेक्मल। खतम दुम्शा लाइबपुकी खतम दुम्मल। लीशोपुकीम आन श्ये ब्वमुमल’ ” देंती। येरमीया १५:२
10 मिनु गो आं शिशी नें पाइश्शो कोक्के जिक्ता। मिनु गो मुर नु पशो कबल क्याम्ताक्ङ। जात जात नेल्ल ङा मुरपुकी नु फ्रेंशो कबल क्याम्ताक्ङ, दे मेको कोक्के जिक्ता।
11 मेको कबल मेको नाक्ती क्याम्ताक्ङ। भेडा लेयबपुकीमी आं कली कोव़ना कोव़न बाक्तेक्म। मेकोपुकीमी एको परमप्रभु यावे आ लोव़ बाक्माक्त, दे तुइक्ताक्म। जकरिया ११:७
12 मिनु गो मेको आन कली “गे ठीक लाक्तीनी हना, आं गाल्च गेयीनी। ममाइ हना वोंइसीन” देंती। मिनु मेकोपुकीमी आं कली ३० चांदी के शेकेल गेम्तेक्म। शेकेल का ११.५ ग्राम चांदी के क्येट बाक्ब।मत्ती २६:१५
13 मिनु परमप्रभु यावेमी आं कली “मेको क्येट लाइश्शा, खप के ग्योंब सेल्ब आ ङोंइती ब्वारदो। मेको मिश ङा क्येट आं पर्बम कुर पाम्तेक्म” देंत। मिनु गो मेको ३० चांदी के शेकेल लाइश्शा, परमप्रभु यावे आ शोंप वोइक्तीकेमी यपाइक्ब आ ङोंइती ब्वारताक्ङ। मत्ती २७:५-१०
14 मिनु नोले गो थुं का दुम्तीक नें वोइश्शो कोक्के जिक्ता। मो पा गो यहूदा नु इस्राएल आस कली खिं का ङा दुम्तीक रे फ्राताक्ङ। इजीकीएल ३७:२२
15 मिनु परमप्रभु यावेमी आं कली “गे लेंशा शोर गाक्शो गोठला खोदेंशो दुमो।
16 मारदे हना मुल गो मेको रागीमी गोठला का सेल्नुङ। मेकोमी बेक्शा लाइब आन कली मकोव़ब। ब्रशा गाक्शो आन कली मखुप्ब। रोइ पशो आन कली मसापाइक्ब नु रिम्शो भेडा आन कली मयोव़ब। तन्न मेकोमी दोम्शो भेडा आन श्ये ब्वशा, आन गेंग्रे यो चेश्शा ब्वाइब।
17 आबी आबी, शोर गाक्शो गोठला। मेकोमी बगाल प्रोंइब। तरवारमी आ ग्युरा गुइ नु आ ग्युरा मिक्च कली आबल। मिनु मेको आ ग्युरा गुइ नेल्ल सोव़ल। आ ग्युरा मिक्च बुक्शा मताइब दुम्ल” देंत।