Revelation 6 in Sunwar
1 मिनु मेको पाठामी मेको कागज रे ७ ओटा छाप रे का प्राक्शो ताता। मिनु सेस जन्तु कामी बुंबु पशो खोदेंशो पा “पिवो” दे ब्रेश्शो नेंता।
2 मिनु गो बुश शारा का ताता। मेको शारा ङोइक्बमी लिब्रा कुरशो बाक्त। मेको कली सिरपेच गेशो बाक्त। मिनु मेको ग्राना ग्रान गाक्त। जकरिया ६:१-८
3 मिनु पाठामी मेको लीशो ६ ओटा छाप रे का प्राक्गानु, अर्को सेस जन्तुमी “पिवो” दे ब्रेश्शो नेंता।
4 मिनु गो अर्को शारा का ताता। मेको शारा चहिं शुश लल बाक्त। मिनु शारा ङोइक्ब कली रागी ङा मुर आन दुशा बाक्तीके नेल्ल रोइक्चा कली नु मुर क्योरमुपाइक्चा कली ठेयब चुक्ब गेशो बाक्त।
5 मिनु पाठामी मेको लीशो ५ ओटा छाप रे का प्राक्गानु, अर्को सेस जन्तुमी “पिवो” दे ब्रेश्शो नेंता। मिनु गो क्येर शारा का ताता। मेको शारा ङोइक्बमी तुला का ग्याइश्शो बाक्त।
6 मिनु गो मेको ४ ओटा सेस जन्तु आन दातेमी सेंदा कामी “काबु ङा गेय कली माना निक्शी चेरब फस गाल्च माल्ताक्व। मिनु काबु ङा गेय कली माना सां क्योव़ज फस गाल्च माल्ताक्व। तेल नु अङगुर शांबु कली चहिं मारेइ मपचा” देंशो नेंता।
7 मिनु पाठामी ४ ओटा लीशो छाप रे का प्राक्गानु, नोले ङा सेस जन्तुमी “पिवो” देंशो नेंता।
8 मिनु गो हौ शारा का ताता। मिनु मेको शारा ङोइक्ब आ नें चहिं साइक्पाइक्ब नु बेक्पाइक्ब बाक्त। मिनु रागी ङा बेक्शो मुरपुकीमी मेको आ नोले खोइक्तेक्म। मिनु मेको कली रागी ङा ४ भाग ङा भाग का मुर आन कली साइक्पाइक्चा, दे अधिकार गेशो बाक्त। दोपा साइक्पाइक्चा गेशो बाक्त देंशा हना, कोइ आन कली तरवारम साइक्पाइक्चा, कोइ आन कली अन्कालम बेक्पाइक्चा, कोइ आन कली मुर साइक्ब रोइ पा बेक्पाइक्चा नु कोइ आन कली जन्तुमी साइक्पाइक्चा, दे अधिकार गेशो बाक्त। इजीकीएल १४:२१
9 मिनु पाठामी मेको लीशो छाप सां रे का प्राक्गानु, गो चढ़ेतीके आगाम शुश मुर आन कली ताता। मेकोपुकी परमप्रभु यावे आ लोव़ टिचा कली नु अर्को आन कली येसु ख्रीस्त परमप्रभु यावे आ तौ बाक्ब, दे शेंचा आ पर्बम साइक्चा पुंइसीशो मुर बाक्तेक्म।
10 मिनु मेकोपुकीमी ठेयब सेंदामी “परमप्रभु, गे का ला परमप्रभु नु थमा पा नेल्ल आन कली सासन पाइब बाक्नीनी। गेना आंइ कली साइक्ब आन कली निसाफ पाइनीनी? गेना रागीम बाक्ब आन कली क्येक्क लेत्नीनी?” देंतेक्म।
11 मिनु परमप्रभु यावे आ स्वर्ग ङा गेय पाइबमी मेको आन कली बुश वा का का फेक्चा कली गेप्तु। मिनु मेकोमी मेको आन कली “इच्का रिम्दीन, अर्को इन खोदेंशो पा येसु आ गेय पाइब नु अर्को थमा सुइक्ब लोक्ब इन बुदी साइक्चा पुंइसीमा सम्म रिम्दीन” देंत।
12 मिनु पाठामी मेको लीशो छाप निक्शी रे का प्राक्गानु, ठेयब ख्रिनु कुत। मिनु नां कुंखी खोदेंशो क्येर दुम्त। तास्ला चहिं हुश खोदेंशो लल दुम्त। यसैया २४:२१-२३; योएल ३:३-४; मत्ती २४:२९
13 मिनु ठेयब फशेमी फोव़शी आ ममीशो गेडा तोक्शो खोदेंब पा सरीङ ङा सोरुलपुकी रागीमी दोक्तेक्म।
14 मिनु सरीङ ओल्शो कागज खोदेंशो पा लाक्तु। डांडा, टापु नेल्ल याक्साक्म। यसैया ३४:४
15 मेना रागी ङा पिपपुकी नु ठेयब मुरपुकी, फौज ङा कप्तानपुकी, शोंप पाइश्शो नु बोल्यो मुरपुकी, वाइलीम वाइल नु मुर नेल्ल पहाड ङा सेरथे फुल्लु नु पुक्खीमी ख्रुंइसाक्म। यसैया २:१०,१९
16 मिनु पहाड नु सेरथे फुल्लु कली “गो आंइ कली सुम्की। मेको ठेयब नित्तीकेमी निप्ब नु पाठा आस गाइक्चा रे आंइ कली ख्रुइक्तीकी। लूका २३:३०
17 मारदे हना मेको आस गाइक्ची नाक्त जाक्त। सुइ मेको आस ङोंइती राप्ने मचाप्नीम” दे ठेयब सेंदामी ग्रीतेक्म। आमोस ५:१८; रोमी २:५; मलाकी ३:२