Revelation 5 in Sunwar

1 मिनु गो मेको ठेयब नित्‍तीकेमी निप्‍ब आ ग्‍युरा गुइमी ओल्‍शो कागज का शेशो ताता। मेको कागजम निम्‍फा गे ब्रेक्‍शो बाक्‍त। मिनु मेको कागज ७ ओटा छाप थोक्‍शा, प्राक्‍ने मचाप्‍चा ङा सेल्‍शो बाक्‍त। प्रकाश ४:३; इजीकीएल २:१-१०

2 मिनु गो सक्ति पाइश्‍शो परमप्रभु यावे आ स्‍वर्ग ङा गेय पाइब का ताता। मेकोमी ठेयब सेंदामी “सुमी मेको ७ ओटा छाप प्रुइश्‍शा, कागज प्राक्‍ने चाप्‍बा?” दे हिल्‍लो पाप्‍तु।

3 मिनु स्‍वर्गमी, रागीमी नु रागी आगाम बाक्‍बपुकीमी सुइमी मेको कागज प्राक्‍ने मचबेम, कोव़ने यो मचबेम।

4 मोपतीके गो शुश ङाक्‍ती। मारदे हना सुइमी मेको कागज प्राक्‍ने मचबेम, कोव़ने यो मचबेम।

5 मिनु मेको शेंब खाल्‍पा कामी आं कली “मङाक्‍को। मेको गुप्‍स, यहूदा आ थर ङा पिप दाऊद आ खिं ङा बाक्‍ब। मेकोमी सैतान कली ग्रात। मोपा मेको कागज ङा ७ ओटा छाप प्रुइश्‍शा प्राक्‍ने चाप्‍ब” देंत। उत्‍पत्ती ४९:९-१०; यसैया ११:१

6 मिनु गोमी ठेयब नित्‍तीके, ४ ओटा सेस जन्‍तु नु शेंब खाल्‍पा आन दातेमी क्‍योरशो पाठा खोदेंशो पा दोक राप्‍शो ताता। मेको पाठा के ७ ओटा ग्रोव़ नु ७ ओटा मिक्‍च बाक्‍त। मेको मिक्‍च चहिं परमप्रभु यावेमी रागी रागीमी सोइश्‍शो परमप्रभु यावे आ ७ ओटा सोक्‍त बाक्‍तेक्‍म। यसैया ५३:७; यूहन्‍ना १:२९

7 मिनु मेको पाठामी मेको ठेयब नित्‍तीकेम निप्‍ब आ ग्‍युरा गुइ रे मेको कागज ताक्‍तु।

8 मोपा ताक्‍गानु, सेस जन्‍तु नु शेंब खाल्‍पापुकी पाठा आ ङोंइती पोक्‍च थेक्‍शा बाप्‍तेक्‍म। मेकोपुकीमी ठेयब ताप्‍तीके नु सुन के थनौरो कुरशो बाक्‍तेक्‍म। मिनु सुन के थनौरो चहिं धूपमी ब्रीशो बाक्‍तेक्‍म। मेको धूपमी ब्रीशो थनौरो चहिं थमा सुइक्‍ब मुर आन मान पशो नु पुंइशो लोव़ बाक्‍तेक्‍म।

9 मिनु मेकोपुकीमी पाठा कली नक कुम्‍सो का पाम्‍तेक्‍म। मार नक कुम्‍सो पाम्‍तेक्‍म देंशा हना “मेको कागज ताक्‍ने नु प्राक्‍ने चाप्‍ब, गे का ला ननी। मारदे हना गे मुर आन कली परमप्रभु यावे आ नेक्‍था बाक्‍पाइक्‍चा कली ग्‍याप्‍तीनी। दोपा ग्‍याप्‍तीनी देंशा हना, साइक्‍चा पुंइसीशा, इन हुश शाइश्‍शा ग्‍याप्‍तीनी। मिनु गे मार मुर ग्‍याप्‍तीनी देंशा हना, नेल्‍ल थर रे, नेल्‍ले लोव़ रे, नेल्‍ल जात रे नु नेल्‍ल रागी रे मुरपुकी ग्‍याप्‍तीनी। भजन संग्रह ३३:३

10 मिनु गे मेको आन कली परमप्रभु यावे आ राज्‍य ङा पिप नु आ ङोंइती राप्‍ब सेल्‍तीनी। मिनु रागी नेल्‍ल कली सासन पाइब यो सेल्‍तीनी” दे कुम्‍सो पाम्‍तेक्‍म। प्रकाश १:६; प्रस्‍थान १९:६

11 मिनु मेको ठेयब नित्‍तीके गे कोव़ना कोव़न बाक्‍ङानु, सेस जन्‍तु नु शेंब खाल्‍पा आन एर ओंथ शुश परमप्रभु यावे आ स्‍वर्ग ङा गेय पाइब आन सेंदा नेंता। मिनु मेकोपुकी गिश बाक्‍तेक्‍म देंशा हना, हजार हजार, लाख लाख बाक्‍तेक्‍म। हिब्रू १२:२२

12 मिनु मेकोपुकीमी “मेको साइक्‍चा पुंइसीशो पाठा का ला सक्ति पाइश्‍शो, शोंप पाइश्‍शो, जोक्‍तीक तुइक्‍तीक, बोल, मान, छेङछेङ नु रिम्‍शो पाइब बाक्‍नीनी देंचा शिरशो बाक्‍ब” दे ठेयब सेंदामी देंतेक्‍म। १इतिहास २९:११; फिलिप्‍पी २:९-१०

13 मिनु स्‍वर्गमी बाक्‍ब, रागी नु रागी आगाम बाक्‍ब, समुन्‍द्र तारी नु आगाम बाक्‍ब नेल्‍लेमी “गेना हना यो ठेयब नित्‍तीकेमी निप्‍ब नु पाठा कली गे रिम्‍शो पाइब बाक्‍नीनी, मान, छेङछेङ ताइब नु सासन पाइब बाक्‍नीनी” देंशो नेंता।

14 मिनु मेको ४ ओटा सेस जन्‍तुमी “आमेन” देंतेक्‍म। मिनु मेको खाल्‍पापुकीमी बाप्‍शा सेउ पाम्‍तेक्‍म।