Revelation 21 in Sunwar
1 नोले गो नक सरीङ नु नक रागी ताता। ङोंइती ङा सरीङ, ङोंइती ङा रागी नु समुन्द्र जाम्तेक्म। यसैया ६५:१७; २पत्रुस ३:१३
2 परमप्रभु यावे आ सहर नक यरूसलेम माइश्शो परमप्रभु यावे आ बाक्तीके रे यिना यिन पाइश्शो ताता। मेको सहर ग्युम्ले कली ग्रुम्चशो ग्युम्ली खोदेंशो दुम्शा, ग्योम्सीशा यिशो बाक्त। गलाती ४:२६; हिब्रू १२:२२; प्रकाश १९:७-८
3 मिनु गो ठेयब नित्तीके रे ठेयब सेंदा का ग्रूशो नेंता। मेकोमी “कोव़ङीन, परमप्रभु यावे आ बाक्तीकेमी मुरपुकी यो बाक्नीम। परमप्रभु यावे मुरपुकी नु बाक्ब। मेकोपुकी परमप्रभु यावे आ मुर बाक्नीम। मिनु परमप्रभु यावे आ मुरपुकी नु बाक्ब। प्रस्थान २९:४३५; येरमीया ७:२३
4 परमप्रभु यावेमी मेको मुर आन कली लेम्शा, आन प्रेक्कु फिक्ब। मुल रे मुरपुकी मबेक्नीम। मोपतीके रोंका मपाइनीमी, मङाक्नीमी, श्येत यो मजाइनीम। मारदे हना ङोंइती मार मार बाक्मा, मेको नेल्ल नुप्तेक्म” दे ठेयब सेंदामी देंशो नेंता। प्रकाश ७:१७; यसैया २५:८; यसैया ३५:१०; यसैया ६५:३९
5 मेको ठेयब नित्तीकेमी निप्बमी “नेनीन, गो नेल्ल नक सेल्नुङमी” देंत। मिनु नोले मेकोमी आं कली “मेको लोव़ ठीक नु थमा बाक्ब। मोपतीके ब्रेक्तो” देंत।
6 मिनु मेकोमी लेंशा आं कली “गो आल्फा नु ओमेगा नङ। नेल्ल क्येङा ङोंइती नु नेल्ल क्येङा नोले ङा गो नङ। सु सुमी तूतू दाक्नीमी, मेको आन कली ब्रोंइचा गेब ब्वाक्कु बुक्तीक रे मोशा तूचा गेनुङ। प्रकाश १:८; प्रकाश २२:१३
7 सु सुमी सैतान कली ग्रानीमी, मेकोम आं देंशो नेल्ल ताइनीम। मिनु गो मेको ग्राब आन परमप्रभु यावे दुम्नुङ। मेकोपुकी चहिं आं तमी तौ दुम्नीम।
8 तन्न मुर तशा हिंबपुकी, परमप्रभु यावे कली थमा मसुइक्बपुकी, पापमी ग्रुम्शोपुकी, मुर आन कली साइक्बपुकी, तेल्लेम पाइबपुकी, टुना मुना पाइबपुकी, देवी देवता आन कली पूजा पाइबपुकी, नु जोल पाइबपुकी नेल्ल गन्धक रे हुरुर पा ब्रशो मीमी हुम्चा पुंइसीनीम। मिनु मेको नोले ङा बेक्तीक बाक्ब” दे माइक्ती।
9 मिनु नोले गो परमप्रभु यावे आ स्वर्ग ङा गेय पाइब का जाक्शो ताता। मेको सु बाक्त देंशा हना, ङोंइती ङा ७ जना श्येतमी ब्रीशो डप्का कुरबपुकी ङा का बाक्त। मेकोमी आं कली “एके पिवो, गो इ कली ग्युम्ली कोंइनुङ। मेको ग्युम्ली पाठा आ मीश बाक्ब” दे माइक्ती।
10 मेकोमी आं कली परमप्रभु यावे आ सोक्तीमी बाक्शा, ठेयब डांडा तार लाइक्ती। मिनु मेकेर आं कली परमप्रभु यावे आ बाक्तीके रे यिना यिन पाइश्शो परमप्रभु यावे आ योव़शो यरूसलेम माइश्शो सहर कोंइताक्यी।
11 मिनु मेको सहर दोदेंशो तांइसाक्व देंशा हना, परमप्रभु यावे आ छेङछेङ नु सक्ति पाइश्शो बाक्त। मिनु परमप्रभु यावे आ छेङछेङ नेल्ल क्येङा रिम्शो टल्केशो बुश यास्पेर माइश्शो हीरा खोदेंशो तांइसाक्व।
12 मिनु मेको सहर दोपा सेल्शो बाक्त देंशा हना, मेको सहर आ एर ओंथ ठेयब गारो प्रोव़शो बाक्त। मिनु मेको गारोमी १२ ओटा ठेयब लाप्चोपुकी बाक्तेक्म। मिनु १२ जना परमप्रभु यावे आ स्वर्ग ङा गेय पाइबपुकी मेको लाप्चो का कामी बाक्शो बाक्तेक्म। इस्राएल आ १२ जना तौ आन नें नु थर मेको लाप्चो का कामी ब्रेक्शो बाक्तेक्म।
13 मिनु मेको लाप्चोपुकी ते ते बाक्तेक्म देंशा हना, पूर्बम लाप्चो सां बाक्तेक्म। उत्तरम लाप्चो सां बाक्तेक्म। दक्खिनम लाप्चो सां बाक्तेक्म। पच्छिमम लाप्चो सां बाक्तेक्म।
14 मिनु मेको सहर ङा गारोमी १२ ओटा जग बाक्तेक्म। मेको जगमी पाठा आ सोइश्शो १२ जना आन नें ब्रेक्शो बाक्तेक्म।
15 मिनु गो नु लोव़ पाइबमी मेको सहर, लाप्चो नु गारो पुक्चा कली सुन के पुक्तीके का कुरशो बाक्त।
16 मिनु मेकोमी मेको सहर कली पुक्तु। मेको सहर ४ पाटे चारै सुर बराबर दुइश्शो १२ हजार स्तादीयोन बाक्त। आ ग्येत्थ गे यो मोशोन दुइश्शो बाक्त। स्तादीयोन का १८५ मिटर बाक्ब।
17 मिनु मेकोमी सहर आ गारो पुक्गानु, सहे का ४४ कुबीत ब्रेम्शो बाक्त। मेको परमप्रभु यावे आ स्वर्ग ङा गेय पाइब आ पुक्तीके मुर आन पुक्तीके खोदेंशो बाक्त। कुबीत का गज का खोदेंशो, ०.५ मिटर बाक्ब।
18 मेको गारो बुश टल्केशो हीरा के सेल्शो बाक्त। मेको सहर चहिं सिसा खोदेंशो मारेइ मब्वाइश्शो सुन के बाक्त।
19 मिनु गारो आ जग नेल्ल खाल ङा हीरापुकीम ग्योम्शो बाक्तेक्म। ङोंइती ङा जग सरीङ खोदेंशो नीलो यस्पेर माइश्शो हीरामी ग्योम्शो बाक्त। मेको आ नोले ङा जग साफीर माइश्शो हीरामी ग्योम्शो बाक्त। मेको आ नोले ङा जग बुश कल्केदोन माइश्शो हीरामी ग्योम्शो बाक्त। मेको आ नोले ङा जग गिगी स्मारग्द माइश्शो हीरामी ग्योम्शो बाक्त।
20 मेको आ नोले ङा जग सुन्तला रङ ङा सारदोनीक्स माइश्शो हीरामी ग्योम्शो बाक्त। मेको आ नोले ङा जग लल सारदीस माइश्शो हीरामी ग्योम्शो बाक्त। मेको आ नोले ङा जग हौ नु गिगी ब्वाइश्शो क्रीसोलीथ माइश्शो हीरामी ग्योम्शो बाक्त। मेको आ नोले ङा जग सुन रङ ङा बेरील माइश्शो हीरामी ग्योम्शो बाक्त। मेको आ नोले ङा जग शुश हौ तोपास माइश्शो हीरामी ग्योम्शो बाक्त। मेको आ नोले ङा जग गिगी क्रीसोप्रास माइश्शो हीरामी ग्योम्शो बाक्त। मेको आ नोले ङा जग लल नु नीलो ब्वाइश्शो हीयाचीन्त माइश्शो हीरामी ग्योम्शो बाक्त। मिनु नेल्ल क्येङा नोले ङा जग प्याजी रङ ङा आमेथीस्त माइश्शो हीरामी ग्योम्शो बाक्त।
21 मिनु मेको १२ ओटा लाप्चो चहिं १२ ओटा मोती के सेल्शो बाक्तेक्म। लाप्चो का मोती काम सेल्शो बाक्त। मिनु मेको सहर ङा लांपुकी सिसा खोदेंशो मारेइ मब्वाइश्शो सुन के बाक्तेक्म।
22 मिनु गो मेको सहरमी परमप्रभु यावे आ खिं मतङ। मारदे हना परमप्रभु यावे, नेल्ल सक्ति पाइश्शो परमप्रभु नु पाठा आंमान मेकेर बाक्नीस।
23 मिनु मेको सहरमी नां नु तास्ला दाप्चा ममाल्ब। मारदे हना परमप्रभु यावे आ छेङछेङ नेल्ल सहरमी दाप्ब। पाठा मुर आन कली छेङछेङ गेब बत्ती बाक्ब। यसैया ६०:३,५,११,१९,२०
24 मिनु रागी रागी ङा मुरपुकी मेको सहर ङा छेङछेङमी बाक्नीम। मिनु रागी रागी ङा पिप आन शोंप नु दारस मेकेर चाक्नीम।
25 मेको सहर ङा लाप्चोपुकी गेना हना यो रोक्शो बाक्नीम। मारदे हना मेकेर गेनायो नाक्दो मदुम्ब। जकरिया १४:७
26 मिनु रागी रागी ङा मुरपुकीमी आन शोंप नु दारस मेको सहरमी चाक्नीमी।
27 मिनु जाम्शा लाइबपुकी, ग्रांग्रा दिचा ङा गेय पाइबपुकी नु जोल पाइबपुकी चहिं मेको सहरमी ओव़चा मताइनीम। पाठा आ ब्रोंइतीक किताबमी नें ब्रेक्शोपुकी ला ओव़चा ताइनीम।