Revelation 20 in Sunwar
1 मिनु नोले गो परमप्रभु यावे आ स्वर्ग ङा गेय पाइब स्वर्ग रे पुं मपाइश्शो ढोडोङगा ङा सांचो नु ठेयब साङलो शेशा, यिशो ताता। प्रकाश ९:१
2 मिनु मेकोमी ठेयब बुस्स कली ग्याइश्शा पाइक्ताक्व। मेको ठेयब बुस्स आ नें मार बाक्त देंशा हना, साइ ङोंइती ङा बुस्स, दियाबलस नु सैतान मेको आ नें बाक्त। मिनु मेको परमप्रभु यावे आ स्वर्ग ङा गेय पाइबमी मेको कली हजार का बर्स सम्म पाइक्ताक्व। दियाबलस आ देंशो “मुर आन कली खाल्ब” बाक्ब।प्रकाश १२:९
3 मिनु रागी रागी ङा मुर आन कली मरिम्शो लां मकोंइदल, दे मेको कली पुं मपाइश्शो ढोडोङगामी तोक्तु। मिनु परमप्रभु यावे आ स्वर्ग ङा गेय पाइबमी मेको एफिसस ढोडोङगा चोक्शा, सांचो पाइश्शा, छाप थोक्ताक्व। मोपा मेको ठेयब बुस्स कली हजार का बर्स सम्म चोक्तु। मिनु हजार का बर्स नोले मेको छिन का कली प्रोंइचा पुंइसीब।
4 मिनु नोले गो नित्तीकपुकी ताता। मेको नित्तीकपुकीमी मुर निश्शो बाक्तेक्म। परमप्रभु यावेमी मेको आन कली निसाफ पचा गेप्तु। मिनु नोले गो येसु कली थमा सुइश्शा, आ लोव़ नु परमप्रभु यावे आ लोव़ पतीके आन पिया ख्रोइक्चा पुंइसीब आन कली तातामी। मेकोपुकीमी ठेयब जन्तु नु मेको आ मूर्ति कली पूजा मपामे बाक्त। मिनु मेको ठेयब जन्तु आ छाप आन कुप्फीम नु आन गुइमी यो वोइक्चा मबिस्समा बाक्त। मिनु मेको लेंशा ब्रोंइशा, ख्रीस्त नु हजार का बर्स सम्म सासन पाम्तेक्म। प्रकाश ३:२१; मत्ती १९:२८; १कोरिन्थी ६:२
5 मिनु अर्को लीशो मुरपुकी चहिं हजार का बर्स नोले ला सेंसीनीम। मेको ङोंइती ङा सेंसीतीके बाक्ब। १थिस्सलोनिकी ४:१६
6 मिनु सु सु ङोंइती बेक्शो रे सेंसीनीमी, मेको ग्येरशो नु परमप्रभु यावे आ योव़शो मुरपुकी बाक्नीम। मेको लेंशा मबेक्नीम। मेकोपुकीमी लेंशा बेक्चा मताइनीम। परमप्रभु यावे नु ख्रीस्त आस ङोंइती बाक्नीमी। मिनु हजार का बर्स सम्म ख्रीस्त नु सासन पाइनीम।
7 मिनु मेको हजार का बर्स नोले सैतान पुं मपाइश्शो ढोडोङगा रे प्रोंइचा पुंइसाक्व।
8 मोपा ग्रूशा, रागी नेल्ल ङा मुर आन कली परमप्रभु यावे कली मटिथु, हेंथे गाक्पाइक्तु। हेंथे गाक्बपुकी चहिं गोग नु मागोग माइश्शो ङा मुरपुकी देंनीम। मिनु सैतानमी हिक्ने मचाप्चा ङा मुर आन कली लडाइ पचा कली खुप्ताक्व। इजीकीएल ३८:२
9 मिनु सैतान आ फौजपुकी रागी नेल्ल साप्शा, लडाइ पथ जाक्तेक्म। मेकोपुकीमी येसु ख्रीस्त कली थमा सुइक्ब, परमप्रभु यावे आ योव़शो आन बाक्तीके नु परमप्रभु यावे आ दाक्शो सहर कली पुम्ताक्म। तन्न स्वर्ग रे मी दोक्शा, मेको पुम्ब नेल्ल आन कली नेक्तीमी।
10 मिनु मुर आन कली मरिम्शो लां शेंब दियाबलस गन्धक रे हुरुर पा ब्रशो मी ब्रतीकेमी हुम्चा पुंइसाक्व। मेकेर ठेयब जन्तु नु जोल पा परमप्रभु यावे आ लोव़ पखु पाइब यो बाक्ताक्स। मिनु मेकेर बाक्बपुकी नाक्दो नाक्ती गेना हना यो श्येत गेचा पुंइसीनीम। प्रकाश १९:२०
11 मिनु नोले गो ठेयब बुश नित्तीके का नु मेकेर निप्ब कली ताता। रागी नु स्वर्ग मेको कली तशा प्रोक्ताक्स। मिनु मेको आस कली बाक्तीके मबा। मत्ती २५:३१-४६; २पत्रुस ३:७,१०,१२
12 गो ठेयब बुश नित्तीके आ ङोंइती ठेयब नु आइक्च बेक्शो मुरपुकी राप्शो तातामी। किताबपुकी प्राक्शो बाक्तेक्म। मिनु गो अर्को किताब का यो प्राक्शो ताता। मेको ब्रोंइतीक किताब बाक्त। मिनु मेको ठेयब बुश नित्तीके आ ङोंइती राप्शो बेक्शो मुर आन निसाफ पचा पुंइसीनीम। दोपा निसाफ पचा पुंइसीनीम देंशा हना, मेकोपुकीमी रागीमी बाक्मानु, मार मार पामे, मेको किताबमी ब्रेक्शो पढेशा, निसाफ पचा पुंइसीनीम। यूहन्ना ५:२८-२९; दानीएल ७:१०
13 मेको ठेयब बुश नित्तीके आ ङोंइती राप्शो बेक्शो मुरपुकी ते रे जाक्तेक्म देंशा हना, समुन्द्रमी बेक्शो मुरपुकी समुन्द्र रे जाक्तेक्म। बेक्पाइक्ब आ बेक्पाइश्शो नु बेक्शो आन बाक्तीके रे जाक्तेक्म। मिनु मेको नेल्ल रागीमी बाक्मानु, मार मार पामे, मेको निसाफ पचा पुंइसाक्म।
14 बेक्पाइक्ब नु बेक्शो आन बाक्तीके हुरुर पा ब्रशो मी ब्रतीकेमी हुम्चा पुंइसाक्स। मेको हुरुर पा ब्रशो मीमी हुम्सीशो मार बाक्त देंशा हना, मेको निक्शी खेयप बेक्चा ङा मेको नोले ङा बेक्चा बाक्त। १कोरिन्थी १५:२६,५५
15 सु सु आन नें ब्रोंइतीक किताबमी मब्रेक्शो बाक्मे, मेको हुरुर पा ब्रशो मीमी हुम्चा पुंइसाक्म।