Numbers 31 in Sunwar
1 मिनु परमप्रभु यावेमी मोसा कली
2 “इस्राएली आन पर्बम गे मिदयान ङा मुर आन कली क्येक्क लेत्तीमी। मेको आ नोले गे बेक्नेवे” देंत।
3 मिनु मोसामी मुर आन कली “इन लडाइ पाइब आन दाते ङा मिदयान नु लडाइ पचा कली नु परमप्रभु यावेमी मेको आन कली क्येक्क लेत्चा कली इन मुर आन कली ठीक पने।
4 गे इस्राएली आन थर थर नेल्ल रे हजार का का मुर लडाइ पचा कली सोइक्तीने” देंत।
5 मोपतीके इस्राएली आन शुश मुर रे थर थर रे हजार का का पा, १२ हजार लडाइ पाइब मुर या कुरशा ठीक दुम्तेक्म।
6 मिनु मोसामी थर नेल्ल रे हजार का का मुर आन कली लडाइम सोइक्ताक्मी। मिनु मेकोपुकी नु चढ़ेब एलाजर आ तौ फिनेहास यो सोइक्ताक्व। मेकोमी परमप्रभु यावे आ ताम्बु ङा माल्शो नु लडाइ ङा तुराही ताप्तीक कुरशो बाक्त। गन्ती १०:२
7 परमप्रभु यावेमी मोसा कली अरेशो खोदेंशो पा मेकोपुकीम मिदयान ङा मुर नु लडाइ पाम्तेक्म। मिनु मेको आन वोंइश मुर नेल्ल आन कली साइक्तेक्म। ब्यवस्था २०:१३
8 मेकोपुकीमी मिदयान ङा ५ जना पिप एवी, रेकेम, सुर, हुर नु रेबा आन कली साइक्तेक्म। मिनु मेको नु बाक्ब अरु मुर यो साइक्तेक्म। मिनु बेओर आ तौ बालाम कली यो तरवारमी साइक्तेक्म। यहोसु १३:२१-२२; गन्ती २२:५
9 मिनु इस्राएलीपुकीम मिदयान ङा मीश मुरपुकी नु आल ब्रेप्च ग्याइक्तेक्म। मेको आन बी ब्यफ, क्यारश भेडा नु आन शोंप नेल्ल लाइक्तेक्म।
10 मिनु मेको आन बाक्शो सहर नेल्ल नु मेको आन ताम्बु नेल्ल क्रोइक्तेक्म।
11 मेको आन ग्राशो मुर, बी ब्यफ, क्यारश भेडा, नु शोंप नेल्ल लाइश्शा गाक्तेक्म।
12 मिनु यरीको आ आइक्ची हांबु यर्दन खोला आ शुंइचीम मोआब ङा दिंममी बाक्शो ताम्बुम मोसा, चढ़ेब एलाजर नु इस्राएली नेल्ल आन ङोंइती चाक्तेक्म।
13 मिनु मोसा, चढ़ेब एलाजर नु मेको आन दाते ङा ठेयब मुर नेल्ल मेको आन कली ग्रुम्थ, लाङगा ग्रूतेक्म।
14 मिनु मोसामी लडाइ रे ग्राशा, लेश्शा जाक्शो हजार का नु सहे का ङा कप्तान आन कली तशा गाइक्ताक्व।
15 मिनु मोसाम मेको आन कली “मार गे मीश मुर नेल्ल आन कली सेसीन प्रोंइनी?
16 एको मीश मुरपुकीमी बालाम आ देंशो पशा, इस्राएली आन कली पेओरम परमप्रभु यावे कली मरिम्शो पपाइश्शो बाक्तेक्म। मोपतीके परमप्रभु यावे आ मुर आन दातेमी मुर साइक्ब रोइ ग्रूत। गन्ती २५:१-३; प्रकाश २:१४
17 मोपतीके वोंइश आल नेल्ल वोंइश मुर नु बाक्शो मीश मुर नेल्ल आन कली सतीन। न्यायाधीस २१:११-१२
18 तन्न वोंइश मुर नु मबाक्शो मीश आल नेल्ल चहिं इन कली वोंइसीन।
19 गेपुकी सु सुम मुर साइश्शो बाक्नी नु बेक्शो मुर आन कली थिशो बाक्नी मेको नेल्ल ७ नाक्त सम्म इन बाक्तीक आ लाङगाम बाक्कीन। मिनु सां नाक्त नु ७ नाक्ती गेपुकीमी इन कली ग्रांग्रा मदिशो सेल्सीशा, इन ग्याइश्शो आन कली यो ग्रांग्रा मदिशो सेलीन। गन्ती १९:११-२०
20 गेपुकीम वा नेल्ले, कुशुल के मार मार, क्यारश आ चां के सेल्शो नु शी के मार मार नेल्ल ग्रांग्रा मदिशो सेलीन” देंत।
21 मिनु चढ़ेब एलाजरमी लडाइम लाइब मुर नेल्ल आन कली “परमप्रभु यावेमी मोसा कली फुल्लुम मुशा ब्रेक्शो आ अरेशो लोव़ मार बाक्त देंशा हना,
22 ‘सुन, चांदी, कांसा, फलाम, टीन नु सिसा,
23 मीम मनेक्ब मारेइ मारेइ थोव़क मीम क्रोइश्शा, ग्रांग्रा मदिशो दुम्ब। मीम नेक्चा ङा थोव़क चहिं ग्रांग्रा मदिशो दुम्तीक ब्वाक्कुमी ग्रांग्रा मदिशा सेल्ने चाप्नीमी।
24 मिनु ७ नाक्ती गेपुकीमी इन वा मुरचा माल्नीनी। मिनु गेपुकी ग्रांग्रा मदिशो दुम्नीनी। मेको नोले गे इन बाक्तीके ओव़ने चाप्नीनी’ ” देंत।
25 मिनु परमप्रभु यावेमी मोसा कली
26 “गे, चढ़ेब एलाजर नु मुर आन थर ङा ठेयब मुरपुकीम ‘ग्याइश्शो मुर नु बी ब्यफ, क्यारश भेडा आन कली हिक्शा ब्रेक्चा माल्नीनी।
27 मेको नेल्ल के भाग निक्शी सेलीन। भाग का लडाइम लाइब आन कली नु भाग का अर्को मुर नेल्ल आन कली बाक्ब। यहोसु २२:८; १सामुएल ३०:२४-२५
28 लडाइम लाइब मुर आन भाग रे मुर, बी ब्यफ, गधा नु क्यारश भेडा ५ सहे रे का परमप्रभु यावे कली गेचा माल्नीनी।
29 मेको लडाइ पाइब आन भाग रे ताक्शा, चढ़ेब एलाजरमी परमप्रभु यावे कली चढ़ेचा माल्ब।
30 मिनु इस्राएली आन भाग रे मुर, बी ब्यफ, गधा नु क्यारश भेडा ५० रे का ताक्शा, परमप्रभु यावे आ ताम्बुम गेय पाइब लेवी आ थर ङा मुर आन कली गेचा माल्नीनी’ देनो” देंत।
31 मिनु परमप्रभु यावेमी मोसा कली अरेशो खोदेंशो पा मोसा नु चढ़ेब एलाजरमी पाम्ताक्स।
32 मेको लडाइ पाइबपुकीमी रोइश्शो गिश बाक्तेक्म देंशा हना, क्यारश भेडा ६ लाख ७५ हजार
33 बी ब्यफ ७२ हजार
34 गधा ६१ हजार
35 वोंइश मुर नु मबाक्शो मीश आलपुकी ३२ हजार जना बाक्तेक्म।
36 मेको लडाइम लाइब आन भाग गिश बाक्तेक्म देंशा हना, क्यारश भेडा ३ लाख ३७ हजार ५ सहे,
37 मेको रे पा ६ सहे ७५ ओटा परमप्रभु यावे कली गेशो बाक्तेक्म।
38 बी ब्यफ ३६ हजार बाक्तेक्म। मेको रे पा ७२ ओटा बी ब्यफ परमप्रभु यावे कली गेशो बाक्तेक्म।
39 गधा ३० हजार ५ सहे बाक्तेक्म। मेको रे पा ६१ ओटा गधा परमप्रभु यावे कली गेशो बाक्तेक्म।
40 मिनु मीश आल १६ हजार जना बाक्तेक्म। मेको रे पा ३२ जना परमप्रभु यावे कली गेशो बाक्तेक्म।
41 परमप्रभु यावेमी मोसा कली देंशो खोदेंशो पा मोसामी परमप्रभु यावे कली गेशो भाग चढ़ेब एलाजर कली गेप्तु।
42 मोसामी लडाइम लाइब मुर रे योक्शा अर्को इस्राएली आन कली गेशो,
43 क्यारश भेडा लाख सां ३७ हजार ५ सहे बाक्तेक्म,
44 बी ब्यफ ३६ हजार बाक्तेक्म,
45 गधा ३० हजार ५ सहे बाक्तेक्म,
46 नु मीश आल १६ हजार जना बाक्तेक्म।
47 परमप्रभु यावेमी अरेशो खोदेंशो पा मोसामी इस्राएली आन भाग रे मुर नु बी ब्यफ, क्यारश भेडा हिक्शा, ५०, ५० रे का का ग्रुंइशा परमप्रभु यावे आ बाक्तीकेमी गेय पाइब लेवी आ थर ङा मुर आन कली गेप्तु।
48 मिनु लडाइ पाइब आन हजार का नु सहे का ङा कप्तान मोसा आ बाक्तीके जाक्तेक्म।
49 मिनु मेकोपुकीमी मोसा कली “इन गेय पाइब, गोपुकीमी आंइ लडाइ पाइब आन कली हिक्तक। मिनु आंइ के मुर का यो मजाम्शो बाक्नीम।
50 मिनु गो नेल्ल आंइ थिश्शो सुन के गहाना, बाला, छाप थोक्तीक औंठी, नचे नु साङलीपुकी परमप्रभु यावे कली चढ़ेशा, आंइ पर्बम पाप क्याम्तीक गेय पचा, दे चाक्शा जाक्ताक्क” देंतेक्म। न्यायाधीस ८:२४-२६
51 मिनु मोसा नु चढ़ेब एलाजरमी मेको आन चाक्शो सुन के गहाना नेल्ल ताक्ताक्से।
52 मिनु हजार, हजार ङा कप्तान नु सहे, सहे ङा कप्तान आन चाक्शो परमप्रभु यावे कली चढ़ेशो सुन १६ हजार ७ सहे ५० शेकेल बाक्तेक्म। शेकेल का ११.५ ग्राम बाक्ब।
53 लडाइम लाइब आन रोइश्शो मार मार आंम आंमा लांइसीशो बाक्तेक्म।
54 मिनु मोसा नु चढ़ेब एलाजरमी हजार का, हजार का, नु सहे का, सहे का मुर आन कप्तानपुकीमी चाक्शो सुन ताक्शा, परमप्रभु यावे आ ग्रुम्तीक ताम्बुम वोइक्ताक्स। मेको परमप्रभु यावे आ ङोंइती इस्राएली आन कली मिम्पाइक्चा कली वोइक्ताक्स। प्रस्थान ३०:१२-१६