Numbers 32 in Sunwar
1 मिनु रूबेन आ थर ङा मुर नु गाद आ थर ङा मुर आन के शुश बी ब्यफ बाक्तेक्म। मिनु मेकोपुकीम याजेर नु गिलादमी रिम्शो योव़तीक ताम्तेक्म।
2 मिनु गाद आ थर ङा मुर नु रूबेन आ थर ङा मुरुमी मोसा, चढ़ेब एलाजर नु ग्रुम्तीक ङा ठेयब मुर आन बाक्तीक जाक्शा
3 “अतारोथ, दीबोन, याजेर, निम्रा, हेश्बोन, एलेआले, सेबाम, नेबो नु बेओन,
4 परमप्रभु यावेमी मेको रागी इस्राएली आन ङोंइती खतम पोक्शो बाक्त। मेको रागी बी ब्यफ योव़चा कली रिम्शो बाक्ब। मिनु इन गेय पाइब, गोपुकी नु बी ब्यफ यो बाक्नीम।
5 गे आंइ कली दाक्ताक्नी हना, एको रागी आंइ कली गेकी। आंइ कली यर्दन आइक्ची हांबु मलाइक्की” देंतेक्म।
6 मिनु मोसामी गाद आ थर ङा मुर नु रूबेन आ थर ङा मुर आन कली “इन लोक्बपुकी एर लडाइम लमानु, गेपुकी चहिं एक बाक्नीनी?
7 मारदे गे परमप्रभु यावे आ गेशो आइक्ची हांबु ङा रागीम लचा कली इस्राएली आन थुं क्याल्नीनी?
8 गो इन आफ आन कली कादेश-बारनेआ रे एको रागी क्यारी पथ सोइक्तुनु, मेकोपुकीमी यो इन खोदेंशो पशो बाक्तेक्म। गन्ती १३:-
9 मिनु मेकोपुकी एश्कोल ङा खोला लशा, एको रागी ताम्तेक्म। मिनु परमप्रभु यावेमी गेशो रागीम मलचा, दे इस्राएली आन थुं क्याल्शो बाक्तेक्म।
10 मिनु मेको नाक्ती परमप्रभु यावे गाइक्ताक्व। मिनु मेकोमी कसम जशा
11 ‘इजीप्त रे जाक्शो २० बर्स गाप्शो नु मेको क्येङा लाक्शो सुइ मेको अब्राहाम, इसहाक नु याकूब नु कसम जशो रागी ओव़चा मताइनीम। मारदे हना आं कली मटीयीमी। गन्ती १४:२२-३८; गन्ती २६:६५
12 केनीज्जी यपुन्ने आ तौ कालेब नु नून आ तौ यहोसु ला ओव़चा ताइनीस। मारदे हना मेको निक्शीमी थमा पा आं नोले खोइक्तीस्सी’ दे कसम जाप्तु” दे मोसामी देंत। गन्ती १४:७-९; यहोसु १४:६-१५
13 मिनु मोसामी “परमप्रभु यावे इस्राएली आन पर्बम गाइक्ताक्व। मिनु मेकोमी मेको आन कली ४० बर्स सम्म गोरशो रागीम हिरपाइक्तीमी। परमप्रभु यावे आ ङोंइती मरिम्शो पाइब मबेक्म सम्म मोदेंशो पाप्तु।
14 मिनु मुल गे, पाप पाइबपुकी, परमप्रभु यावेमी इस्राएल आ पर्बम गाइश्शो बाक्त। मिनु गेपुकीमी चिनु तेम्शो बाक्नीनी।
15 गेपुकीम मेको आ नोले खोइक्ने मबिस्साक्नी हना, मेकोमी एको मुर नेल्ल आन कली एको गोरशो रागीमीन प्रोंइब। मिनु गे मेको मुर नेल्ल आन कली खतम सेल्ब दुम्नीनी” दे माइक्तीमी।
16 मिनु मेकोपुकी मोसा आ नेक्था जाक्शा “गो आंइ भेडा आन कली गोठ नु आंइ आल आन कली सहर सेल्चा दाक्नीकी।
17 तन्न गोपुकी चहिं इस्राएली आन कली मेको आन बाक्तीकेमी मचाक्दीश्शो सम्म मेको आन ङोंइङोंइती लडाइ पा लाइनीकी। मेना आंइ मीशपुकी नु आंइ आलपुकी चहिं एको रागी ङा मुर आन रे मारेइ पाइक्चा मपुंइसीथु, मेको सहर ङा गारो आगाम बाक्नीम।
18 इस्राएल ङा मुर नेल्लेमी आन योव़शो रागी मतामे सम्म गो आंइ खिं मलेत्नीकी।
19 गोपुकीमी यर्दन खोला आ आइक्ची हांबु नु मेको क्येङा एर गे रागी मताक्नीकी। मारदे हना, आंइ भाग यर्दन ओंथ हांबु पूर्ब गे दुम्शो बाक्ब” देंतेक्म। यहोसु १३:८
20 मिनु मोसामी मेको आन कली “दुम्ब। गेपुकी परमप्रभु यावे आ ङोंइती लडाइम लाइनीनी हना, यहोसु १:१२-१५
21 नु परमप्रभु यावेमी आ जोरी सत्रु आन कली खेरशा मेको रागी मफ्रुवा सम्म गेपुकी परमप्रभु यावे आ ङोंइती लडाइ पा यर्दन आइक्ची हांबु लाइतीनी हना,
22 मिनु मेको रागी परमप्रभु यावे आ ङोंइती ग्रानी नोले, गे लेन्ने चाप्नीनी। मिनु इन पुंइशो रागी परमप्रभु यावे आ ङोंइती इन के दुम्ब।
23 तन्न गेपुकीम मो मपाइतीनी हना, परमप्रभु यावे आ ङोंइती पाप पाइनीनी। मिनु इन पाप थमा पा राइनीनी।
24 गेपुकी इन मीश नु आल आन कली सहर नु इन बी ब्यफ, क्यारश भेडा आन कली गोठ सेलीन। तन्न इन गेशो लोव़ खाप्चा माल्नीनी” देंत।
25 मिनु गाद नु रूबेन आस थर ङा मुरपुकीमी मोसा कली “इन गेय पाइब, गोपुकी इन अरेशो पाइनीकी।
26 आंइ आलपुकी, आंइ मीशपुकी, आंइ बी ब्यफ, क्यारश भेडा नेल्ल एको गिलाद सहरमी बाक्नीम।
27 तन्न इन गेय पाइब, गोपुकी इन अरेशो खोदेंशो पा परमप्रभु यावे आ ङोंइती लडाइ पचा कली या कुरशा लाइनीकी” देंतेक्म।
28 मिनु मोसामी मेको आन पर्बम चढ़ेब एलाजर, नून आ तौ यहोसु नु इस्राएली आन थर थर ङा ठेयब मुर आन कली अरेम्तीमी।
29 मिनु मोसाम मेको आन कली “गाद नु रूबेन आस थर ङा मुर गेपुकी नु या कुरशा, परमप्रभु यावे आ ङोंइती लडाइ पा यर्दन आइक्ची हांबु लाम्तेक्म हना, नु मेको रागी इन गुइम दुम नोले, गेपुकीमी गिलाद रागी मेको आन कली गेचा माल्नीनी।
30 तन्न मेकोपुकी या कुरशा लडाइ पा गेपुकी नु यर्दन आइक्ची हांबु लने मबिस्साक्म हना, मेकोपुकी इन दातेमी कनान रागीमीन आन रागी तचा माल्नीम” दे माइक्तीमी।
31 मिनु गाद नु रूबेन आस थर ङा मुरपुकीमी “परमप्रभु यावेमी इन गेय पाइब, आंइ कली मार देंमे मेको पाइनीकी।
32 गोपुकी या कुरशा परमप्रभु यावे आ ङोंइती आइक्ची हांबु कनान रागी लाइनीकी। तन्न आंइ योव़शो रागी यर्दन ओंथ हांबुमी बाक्ल” देंतेक्म।
33 मिनु मोसामी गाद आ थर, रूबेन आ थर नु योसेफ आ तौ मनस्से आ उइक्थ थर ङा मुर आन कली एमोरी आन पिप सीहोन आ राज्य नु बाशान ङा पिप ओग आ राज्य, मेको रागी नु आ एर ओंथ ङा सहर नेल्ल गेम्तीमी। यहोसु १३:१५-३२
34 मिनु गाद आ थर ङा मुरपुकीमी दीबोन, अतारोथ, आरोएर,
35 अत्रोथ-शोफान, याजेर, योग-बेहा,
36 बेथ-निम्रा, बेथ-हारान नेल्ल गारोम हिरशो सहर सेल्तेक्म। मिनु भेडा आन कली गोठ यो सेल्तेक्म।
37 मिनु रूबेन आ थर ङा मुरपुकीमी हेश्बोन, एलेआले नु किरयथ-थाइम,
38 नेबो, बाल-मेओन नु सिब्मा लेंशा सेल्तेक्म। मिनु मेकोपुकीमी आन लेंशा सेल्शो सहर कली नक नें वोइक्तेक्म।
39 मनस्से आ तौ माकीर आ चच युइ गिलादम लशा, मेको आन के सेल्शा, मेकेर बाक्ब एमोरी आन कली खेरतेक्म।
40 मोपतीके मोसामी मनस्से आ तौ माकीर आ चच युइ आन कली गिलाद गेप्तु। मिनु मेकोपुकी मेकेर बाक्तेक्म। ब्यवस्था ३:१४; न्यायाधीस १०:३-४
41 मनस्से आ तौ याइर लशा, मेकेर ङा गाउं आंम के सेल्तु। मिनु मेको नेल्ल आन नें हव्वोथ-याइर वोइक्तु।
42 मिनु नोबाह लशा केनाथ नु मेको आ गाउंपुकी आंम के सेल्तु। मिनु मेको नेल्ल आन नें आ नें रे पा नोबाह वोइक्तु।