2 Kings 23 in Sunwar
1 मिनु नोले पिपम यहूदा नु यरूसलेम ङा खाल्पा नेल्ल आन कली आ ङोंइती बुक्चा, दे ब्रेत्थ सोइक्तीमी बाक्त।
2 मिनु पिप परमप्रभु यावे आ खिं लमाक्त। मिनु मेको नु यहूदा ङा मुर नेल्ल, यरूसलेम ङा मुर, चढ़ेबपुकी, परमप्रभु यावे आ लोव़ पाइबपुकी नु आइक्च नु ठेयब मुर नेल्ल पिप नु परमप्रभु यावे आ खिं लमा बाक्त। मिनु पिपमी नेल्ल नेंशा, परमप्रभु यावे आ खिंम थिश्शो कबल ङा लोव़ ब्रेक्शो कागज पढेवा बाक्त।
3 मिनु पिप थाम आ पुंम राप्शा, परमप्रभु यावे आ ङोंइती कबल का पवा बाक्त। मेको कबल मार बाक्त देंशा हना, “गो परमप्रभु यावे आ शेंशो, आ देंशो लोव़, आ फुल्लुम मुशा ब्रेक्शो लोव़ आं थुं नु रां नेल्लेमी टिशा पाइनुङ। मोपा एको कागजम ब्रेक्शो कबल ङा लोव़ नेल्ल खाप्नुङ” देंमाक्त। मिनु मेको नोले मुर नेल्लेमी “गोपुकीम यो मेको कबल खाप्नीकी” देंमा बाक्त। प्रस्थान २४:३-८; यहोसु २४:२५
4 मेको नोले पिपमी नेल्ल क्येङा ठेयब चढ़ेब हिल्कीयाह, मेको आ नोले ङा अरु चढ़ेबपुकी नु लाप्चो खाल पाइब आन कली “परमप्रभु यावे आ खिं रे बाल देवता, अशेराह देवी, नां तास्ला नु सोरुल आन कली सेल्शो मारेइ मारेइ बोसपुकी ग्रुंइदीन” दे अरेवा बाक्त। मिनु मेकोपुकीमी मेको नेल्ल यरूसलेम ङा किद्रोन खोल्साम चोव़मे बाक्त। मिनु पुलु चहिं बेथेलम लदमे बाक्त। २राजा २१:३
5 ङोंइती यहूदा ङा पिपपुकीम यहूदा ङा सहर नु यरूसलेम ङा डांडा ङा थानम बाक्शो देवी देवता आन कली चढ़ेब आन कली वोइश्शो बाक्मा बाक्त। मेकोपुकीमी बाल, नां, तास्ला, सोरुल आन कली धूप चोइबाक्मा बाक्त। मिनु पिपम मेको आन कली ग्रुंइपदा बाक्त।
6 मेकोमी अशेराह देवी आ मूर्ति पाइश्शो थाम परमप्रभु यावे आ खिं यरूसलेम रे ग्रुंइशा, किद्रोन खोल्साम लाइश्शा चोपाइक्मी बाक्त। मिनु मुरपुकीम मेको कली फुरक सेल्मे बाक्त। मिनु मेको आइक्च मुर आन तुरसुम फ्रामे बाक्त। २राजा २१:७
7 मेकोमी तेल्लेम वोंइश मुर आन बाक्तीक प्रेत्मे बाक्त। मेको खिं, अशेराह देवी आ मूर्ति कली नु मीश मुर आन तोव़ प्रोव़तीके परमप्रभु यावे आ खिं आ नेक्था बाक्शो बाक्माक्त। १राजा १४:२४
8 योसीयाहमी यहूदा ङा सहर रे चढ़ेब नेल्ल आन कली ग्रुंइदीमी बाक्त। मिनु गेबा सहर रे बेयर-शेबा सम्म ङा डांडा ङा थान आन कली ग्रांग्रा दिशो सेल्पदा बाक्त। मेकोमी सहर ङा लाप्चो ङा देवता थानपुकी प्रेप्पदा बाक्त। मेको सहर ङा सासन पाइब यहोसु आ लाप्चो आ ङोंइती गे बाक्माक्त। मेको सहर ङा ठेयब लाप्चो आ पेरा गे बाक्माक्त।
9 मेको डांडा ङा थान ङा गेय पाइब चढ़ेबपुकीम यरूसलेम ङा परमप्रभु यावे आ खिं ङा चढ़ेतीकेम जाक्ने मचाप्बमे बाक्त। तन्न मेकोपुकीम आन वारच चढ़ेबपुकी नु बोरब ओख्ती मसुप्शो शोब्ले जाइबाक्मा बाक्त।
10 मिनु पिप योसीयाहम मोलेक कली आन तमी तौ क्योरशा चढ़ेथ मजाक्मल, दे बेन-हिन्नोम बेंसीम बाक्शो तोफेथ थान कली ग्रांग्रा दिशो सेल्पदा बाक्त। २राजा १७:१७; लेवी १८:२१
11 मेकोम यहूदा ङा पिपपुकीम परमप्रभु यावे आ खिं ओव़तीक लाप्चो आ ङोंइती नां कली मान पचा कली सेल्शो शारा प्रेश्शा ताइक्पाइक्मी बाक्त। मेको चहिं नाथान-मेलेक नें पाइश्शो मुर आ कोठा आ नेक्था बाक्माक्त। मिनु योसीयाहम नां कली मान पचा कली सेल्शो बग्गीपुकी क्रोइक्पाइक्मी बाक्त।
12 आहाज आ तार ङा कोठा ङा कौसीम यहूदा ङा पिपपुकीम सेल्शो चढ़ेतीकपुकी नु परमप्रभु यावे आ खिं ङा लाङगा निम्फा गे ङा मनस्सेम सेल्शो चढ़ेतीकपुकी प्रेश्शा, फस पोक्शा, मेको नेल्ल किद्रोन खोल्साम ताइक्पदा बाक्त। २इतिहास २८:२४; २राजा २१:४-५
13 मिनु पिपमी यरूसलेम आ पूर्ब गे बाक्शो डांडा ङा थान ग्रांग्रा दिशो सेल्पदा बाक्त। मेको खतम सेल्ब डांडा आ दक्खिन गे बाक्माक्त। मिनु मेकेर पिप सोलोमनमी सीदोनी आन ग्रांग्रा दिशो अश्तोरेथ देवी आ मूर्ति, मोआब ङा ग्रांग्रा दिशो देवता केमोश आ मूर्ति नु अम्मोनी आन ग्रांग्रा दिशो देवता मोलेक आ मूर्ति आन थान सेल्पाइश्शो बाक्माक्त। मिनु योसीयाहमी मेको आ सेल्शो पूजा पतीक थान प्रेश्शा ग्रांग्रा दिशो सेल्पदा बाक्त।मेको मोलेक देवता कली मिल्कोम यो देंशो बाक्त।१राजा ११:७
14 मिनु योसीयाहमी थान ङा ख्रुक्शो फुल्लु जिक्शा फस पोक्पाइक्मी बाक्त। मिनु मूर्ति पाइश्शो थाम एश्शा मेको आ बाक्तीकेम मुर आन रुशेम प्रिंपाइक्मी बाक्त।
15 मिनु मेकोम इस्राएली आन कली पाप पपाइक्ब नेबात आ तौ येरोबामम बेथेल ङा डांडाम सेल्शो थान यो प्रेप्पदा बाक्त। मेकोम चढ़ेतीक नु थाम यो खतम सेल्पदा बाक्त। मेको थान क्रोइश्शा, पुलु सेल्पदा बाक्त। मेकोमी मेको मूर्ति पाइश्शो थाम यो चोपदा बाक्त। मिनु मेको कली फस पोक्पदा बाक्त। मेकोम अशेराह आ थाम यो चोपदा बाक्त। १राजा १२:३२
16 मेको नोले योसीयाहम एर ओंथ कोव़ङा बाक्त। मिनु मेकोमी डांडाम बाक्शो तुरसपुकी तवा बाक्त। मिनु मेकोमी तुरस रे रुश ग्रुंइपदा बाक्त। मिनु मेकोम चढ़ेतीक ग्रांग्रा दिशो सेल्चा कली मेको चढ़ेतीकेम चोपाइक्मी बाक्त। परमप्रभु आ मुरुमी, येरोबाम चढ़ेतीकेम बाक्मेनु, देंशो परमप्रभु यावे आ लोव़ गाप्चा कली योसीयाहमी मो पवा बाक्त। मिनु पिपमी एर ओंथ कोव़शा, मोदेंशो नोले दुम्ब लोव़ पाइब परमप्रभु आ मुर आ तुरस तवा बाक्त। १राजा १३:२
17 मिनु पिपमी “मेरे आं तशो तुरस सु के बाक्मे?” दे हिल्लो पामी बाक्त। मिनु मेको सहर ङा मुरपुकीमी “मेरे परमप्रभु आ मुर आ तुरस बाक्ब। मेको यहूदा रे जाक्शा, बेथेल ङा चढ़ेतीकमी येरोबाम आ ङोंइती मुल इन पशो गेय आ पर्बम नोले दुम्ब लोव़ पाइब, परमप्रभु आ मुर आ तुरस बाक्ब” देंमा बाक्त। १राजा १३:३०-३२
18 मिनु मेकोमी “मो हना बाक्चा गेन। सुइम मेको आ रुश मथिने” देंमाक्त। मोपतीके मुरपुकीम मेको सामरीया रे जाक्शो परमप्रभु यावे आ लोव़ पाइब आ रुश नु यहूदा रे जाक्शो परमप्रभु आ मुर आ रुश चहिं मशोल्मे बाक्त।
19 मिनु मेको प्रोंइशा पिप योसीयाहम इस्राएल ङा पिपपुकीम सामरीया ङा सहरपुकीम सेल्पाइश्शो डांडा ङा थान प्रेप्पदा बाक्त। मुरपुकीमी मेको थान सेल्शा पूजा पा परमप्रभु यावे कली गाइक्पाइश्शो बाक्मा बाक्त। मिनु योसीयाहमी मेको आन कली बेथेलम पशो खोदेंशो ग्रांग्रा दिशो सेल्पाइक्मी बाक्त।
20 पिप योसीयाहमी मेको डांडा ङा थानपुकीम बाक्शो चढ़ेतीक तार आन चढ़ेब नेल्ल साइक्पाइक्मी बाक्त। मिनु मेको चढ़ेतीक आन तार मुर आन रुश चोपाइक्मी बाक्त। मिनु मेको नोले यरूसलेम लेम्माक्त।
21 मिनु पिपमी मुर नेल्ल आन कली “परमप्रभु यावे, इन परमप्रभु आ कबल ङा लोव़ ब्रेक्शो खोदेंशो पा पास्सा नाक्त ङा चाड मानेचा माल्नीनी” दे माइक्मी बाक्त। ब्यवस्था १६:१-८; यहोसु ५:१०-११
22 इस्राएली आन कली निसाफ पाइबपुकीम हुकुम पामे रे नु इस्राएल नु यहूदा ङा पिपपुकीम सासन पामे ना रे मुल सम्म मोदेंशो पा पास्सा चाड ममानेशो बाक्मा बाक्त। न्यायाधीस २:१०,१६,१७
23 तन्न पिप योसीयाहम सासन पवा आ १८ बर्सम यरूसलेमम मेको परमप्रभु यावे आ पास्सा नाक्त ङा चाड मानेमे बाक्त।
24 परमप्रभु यावे आ खिंमी चढ़ेब हिल्कीयाहमी थिश्शो ब्रेक्शो लोव़ खाप्चा कली योसीयाहम बेक्शो मुर नु लोव़ पाइब, लिंक्यु कोव़ब नु खिं ङा मूर्ति नेल्ल, यहूदा नु यरूसलेमम बाक्शो ग्रांग्रा दिशो मारेइ मारेइ नेल्ल ताइक्पाइक्मी बाक्त। लेवी २०:२७; ब्यवस्था २९:१६-१७
25 मोपा योसीयाह खोदेंशो पा आ थुं नेल्ले आ रां नेल्ले नु आ सक्ति नेल्लेमी मोसा आ ब्रेक्शो लोव़ टिशा गाक्शा परमप्रभु यावे गे लेप्ब मेको आ ङोंइती नु नोले तेकोइ पिप मदुम्मा बाक्त। २राजा १८:५; ब्यवस्था ६:५
26 मो हना यो परमप्रभु यावेम आ ठेयब पा गाइश्शो चुरशो मलेत्ता बाक्त। यहूदा आ पर्बम मेको आ गाइश्शो मनांइसे बाक्त। मिनु मनस्सेमी यो मेको कली थाम्पा गाइक्पाइश्शो बाक्माक्त। २राजा २१:११-१६
27 मिनु परमप्रभु यावेमी “गो दोपा इस्राएल कली ग्रुंइदु, मोपा यहूदा कली यो आं ङोंइती रे ग्रुंइनुङ। मिनु गो आं योव़शो यरूसलेम सहर नु आं नें बाक्ब देंशो आं खिं प्रोंइनुङ” देंशो बाक्माक्त। २राजा १७:१८; १राजा ८:२९
28 योसीयाह आ पशो अरु गेय, मेको आ पशो नेल्ल, मार, मेको यहूदा ङा पिप आन इतिहासम ब्रेक्शो मबाक्बा ङा?
29 पिप योसीयाहम सासन पवा ना इजीप्त ङा पिप फाराओ नेको अस्सुर ङा पिप नु लडाइ पचा कली युफ्रेटीस खोला गे लमाक्त। मिनु पिप योसीयाह फाराओ नेको नु लडाइ पचा कली मेकेर लमाक्त। तन्न नेकोम योसीयाह नु लडाइ पा मेको कली मेगीददोम सदा बाक्त।
30 मिनु मेको आ गेय पाइबपुकीम मेको आ बेक्शो रां बग्गीम कुर पा मेगीददो रे यरूसलेमम चाक्गमे बाक्त। मिनु मेको कली आ तुरसुमीन वोदमे बाक्त। मिनु मेको रागी ङा मुरपुकीम मेको आ तौ येहो-अहाज कली तेल लुक्शा, मेको आ पा ङा पिप सेल्मे बाक्त।
31 येहो-अहाज पिप दुम्मेनु २३ बर्स दुम्शो बाक्माक्त। मेकोम यरूसलेममी महिना सां सासन पवा बाक्त। मेको आ ममा आ नें हामुतल बाक्माक्त। मेको लिब्ना ङा येरमीया आ तमी बाक्माक्त।
32 मेकोमी आ किकी पिपी खोदेंशो पा, परमप्रभु यावे आ ङोंइती मार मरिम्शो बाक्मे, मेको पवा बाक्त।
33 मिनु फाराओ नेकोमी मेकोम यरूसलेमम सासन मपवल, दे साङलोम फ्रेंशा हमाथ रागी ङा रिब्लामी चोक्शा वोदा बाक्त। मिनु मेकोमी यहूदा कली सहे का टलेन्ट चांदी नु टलेन्ट का सुन तिरो थाप्पदा बाक्त। टलेन्ट का ३४ किलो बाक्ब। इजीकीएल १९:४
34 मिनु फाराओ नेकोमी योसीयाह आ तौ एल्याकीम कली मेको आ आफ योसीयाह आ पा ङा पिप सेल्शा वोदा बाक्त। मिनु फाराओ नेकोमी मेको आ नें एल्याकीम रे येहो-याकीम वोदा बाक्त। तन्न मेकोमी येहो-अहाज कली इजीप्त रागी लदा बाक्त। मिनु मेको इजीप्त उइ बेक्माक्त। १इतिहास ३:१५
35 मिनु फाराओ नेको आ पुंइशो सुन नु चांदी थाप्चा कली येहो-याकीमम आ रागी ङा मुर आन कली तिरो थाप्पाइक्मी बाक्त। मिनु देंशो खोइ तिरो थाप्चा कली मेकोमी आ रागी ङा मुरपुकी रे सुन नु चांदी पोक्गा बाक्त। २राजा १५:२०
36 येहो-याकीम पिप दुम्मेनु मेको २५ बर्स दुम्शो बाक्माक्त। मेकोम यरूसलेममी ११ बर्स सासन पवा बाक्त। मेको आ ममा आ नें जेबीदाह बाक्माक्त। मेको रूमाह सहर ङा पेदायाह आ तमी बाक्माक्त।
37 मिनु मेकोमी आ किकी पिपी खोदेंशो पा, परमप्रभु यावे आ ङोंइती मार मरिम्शो बाक्मे, मेको पवा बाक्त।