2 Kings 22 in Sunwar

1 योसीयाह पिप दुम्‍मेनु ८ बर्स दुम्‍शो बाक्‍माक्‍त। मिनु मेकोमी यरूसलेमम ३१ बर्स सासन पवा बाक्‍त। मेको आ ममा आ नें येदीदाह बाक्‍माक्‍त। मेको बोस्‍कत ङा अदायाह आ तमी बाक्‍माक्‍त।

2 योसीयाहमी परमप्रभु यावे आ ङोंइती मार रिम्‍शो बाक्‍मे, मेको पवा बाक्‍त। मेको ग्‍युरा पेरा मपथु, आ किकी दाऊद आ लांम गाक्‍माक्‍त। २राजा १८:३

3 योसीयाह पिप दुम्‍मे आ १८ बर्सम मेकोमी मेशुल्‍लाम आ चच असाल्‍याह आ तौ ब्रेक्‍ब शाफान कली परमप्रभु यावे आ खिंम सोइक्‍ता बाक्‍त।

4 योसीयाहम मेको कली “ठेयब चढ़ेब हिल्‍कीयाह आ बाक्‍तीक लावो। मिनु लाप्‍चो खाल पाइबपुकीम ताक्‍शो, मुरपुकीम परमप्रभु यावे आ खिंम चाक्‍शो क्‍येट ठीक पा वोइक्‍चा माल्‍नीम, दे मतो। २राजा १२:११

5 मिनु मेको परमप्रभु यावे आ खिंम बाक्‍ब ठेयब गेय पाइब आन कली गेचा नम। मिनु मेकोपुकीम परमप्रभु यावे आ खिंम बिग्रेशो मार मार सेल्‍ब आन कली गेमेक्‍ल।

6 मेकोपुकीम परमप्रभु यावे आ खिं ङा बिग्रेशो लेंशा सेल्‍चा कली शी सेल्‍ब, गारो प्रोव़ब नु मार मार सेल्‍ब आन कली गेमेक्‍ल। मिनु शी नु ख्रोइश्‍शो फुल्‍लुपुकी ग्‍याप्‍मेक्‍ल।

7 मेको आन कली गेशो क्‍येट ब्रेक्‍शा वोइक्‍चा ममाल्‍नीम। मारदे हना मेकोपुकी थमा सुइश्‍शो गेय पाइब बाक्‍नीम” दे मदा बाक्‍त। २राजा १७:१६

8 मिनु ठेयब चढ़ेब हिल्‍कीयाहम ब्रेक्‍ब शाफान कली “गो परमप्रभु यावे आ खिंम अरेशो लोव़ ब्रेक्‍शो कागज थित्‍ता” देंमाक्‍त। मिनु हिल्‍कीयाहमी मेको कागज शाफान कली गेवा बाक्‍त। मिनु शाफानमी मेको पढेवा बाक्‍त।

9 मिनु मेको ब्रेक्‍ब शाफान पिप आ बाक्‍तीक लशा मेको कली “इन गेय पाइबपुकी परमप्रभु यावे आ खिंम लशा, मेकेर ङा क्‍येट परमप्रभु यावे आ खिं ङा गेय कोव़ब आन कली गेम्‍तेक्‍म” देंमाक्‍त।

10 मिनु नोले मेको ब्रेक्‍ब शाफानमी पिप कली “चढ़ेब हिल्‍कीयाहम आं कली कागज का गेती” दे शेंदा बाक्‍त। मिनु नोले शाफानम मेको ठेयब सेंदा पा पढेशा पिप कली नेंपदा बाक्‍त।

11 मिनु पिपमी मेको कागज ङा लोव़ नेंशा, आ वा खाक्‍गा बाक्‍त।

12 मिनु नोले पिपमी चढ़ेब हिल्‍कीयाह, शाफान आ तौ अहीकाम, मीकाया आ तौ आकबोर, ब्रेक्‍ब शाफान नु पिप आ गेय पाइब आसायाह आन कली येरमीया २६:२४

13 “गे आं पर्बम, आं मुर आन पर्बम नु यहूदा आ पर्बम मेको थिश्‍शो कागजमी मार ब्रेक्‍शो बाक्‍मे, दे परमप्रभु यावे कली हिल्‍लो पथ लने। मारदे हना परमप्रभु यावे थाम्‍पा गाइश्‍शो बाक्‍ब। इं किकी पिपीम एको कागजम ब्रेक्‍शो लोव़ मटीमे। मेकोपुकीम इं पर्बम मेकेर ब्रेक्‍शो लोव़ नेल्‍ल मपाम” देंमाक्‍त।

14 मोपतीके चढ़ेब हिल्‍कीयाह, अहीकाम, आकबोर, शाफान नु आसायाह पिप आ खिंम वासी कोव़ब हारहास आ चच, तिकवाह आ तौ शाल्‍लुम आ मीश परमप्रभु यावे आ लोव़ पाइब हुल्‍दा आ बाक्‍तीके यरूसलेमम हिल्‍लो पथ लमा बाक्‍त। मेको आ खिं यरूसलेम ङा नक सहरम बाक्‍बाक्‍माक्‍त।

15 मिनु हुल्‍दामी मेको आन कली “परमप्रभु यावे, इस्राएली आन परमप्रभुम इन कली आं बाक्‍तीके सोइक्‍ब कली मार देंत देंशा हना

16 मेकोमी ‘यहूदा ङा पिपम मेको कागजम पढेशो श्‍येत ङा लोव़, गो मेको श्‍येत यहूदा नु मेकेर बाक्‍ब मुर आन कली थमा पा गेनुङ।

17 मारदे हना मेकोपुकीम आं कली प्रोंइशा, देवी देवता आन कली धूप चोम्‍तेक्‍म। मिनु आन गुइम सेल्‍शो मूर्ति रे पा आं कली गाइक्‍पाइक्‍तीमी। मोपतीके गो एको रागी आ पर्बम गाइक्‍ताक्‍यी। मिनु मेको गाइश्‍‍शो मनाइक्‍ब’ देंत। ब्‍यवस्‍था ३१:२९; ब्‍यवस्‍था ३२:२१-२३

18 परमप्रभु यावे कली हिल्‍लो पथ सोइक्‍ब यहूदा ङा पिप कली परमप्रभु यावे, इस्राएली आन परमप्रभुमी मार देंत देंशा हना ‘गे आं लोव़ नेंतीवी।

19 गे आं कली टिचा दाक्‍शा, इ थुं आं ङोंइती ब्रेम्‍शो दुम्‍शा, गे सुर्ता पा इ वा खाक्‍शो ताता। मारदे हना गो यहूदा रागी नु मेकेर ङा मुर आन पर्बम सराप रशा, मुर मबाक्‍तीक दुम्‍ब, देंती। गे मेको आ पर्बम आं ङोंइती ङाक्‍शो नेंता।

20 मिनु गे इ थुं नाइश्‍शा बेक्‍नेवे। मिनु गो यहूदा कली गेशो ठेयब श्‍येत गे तचा ममाल्‍नेवे’ दे मतो” दे परमप्रभुमी देंमाक्‍त। मिनु मेकोपुकीम मेको लोव़ पिप आ बाक्‍तीकेम चाक्‍गमे बाक्‍त। २राजा २०:१९; यसैया ५७:१-२