2 Chronicles 13 in Sunwar
1 येरोबाम पिप पशो १८ बर्स दुम्मेनु, अबीयाह यहूदा ङा पिप दुम्माक्त।
2 मेकोमी बर्स सां यरूसलेमम सासन पवा बाक्त। आ ममा गिबा सहर ङा उरीएल आ तमी मीकाया बाक्माक्त। मिनु अबीयाह नु येरोबाम आस दातेम लडाइ दुम्ना दुम्न बाक्माक्त।
3 अबीयाहमी लडाइ पचा कली थम बोल्यो ४ लाख लडाइ पाइबपुकी ठीक पवा बाक्त। येरोबामम चहिं ८ लाख बोल्यो लडाइ पाइबपुकी खुप्ता बाक्त।
4 मिनु अबीयाह एफ्राइम ङा पहाड रागी ङा सेमाराइम डांडाम राप्शा, ठेयब सेंदा पा “येरोबाम नु इस्राएल ङा मुर नेल्ल, आं लोव़ नेनीन।
5 मार, गे परमप्रभु यावे, इस्राएली आन परमप्रभु दाऊद नु गेना हना यो लीब हिक्सी कबल पशो मतुइक्नीनी? मेको कबल मार बाक्ब देंशा हना, मेको इस्राएली आन राज्य नेल्ल दाऊद नु आ तौ आन कली गेना हना यो कली गेशो बाक्ब, दे मतुइक्नीनी? लेवी २:१३; गन्ती १८:१९
6 मो हना यो दाऊद आ तौ सोलोमन आ गेय पाइब नेबात आ तौ येरोबामम आ होव़प कली मटिथु, मेको आ पर्बम मरिम्शो पाप्तु।
7 मिनु शोर गाक्शो मुरपुकी मेको नु बाक्शा, सोलोमन आ तौ रेहोबाम कली शुक्शी पाम्तेक्म। मेना रेहोबाम आइक्च बाक्माक्त। मोपतीके मारेइ पने मचाप्बा बाक्त।
8 मुल गे दाऊद आ तौम सासन पशो, परमप्रभु यावे आ राज्य नु लडाइ पचा कली मिम्शो बाक्नीनी? गेपुकी थमा पा ठेयब हुल का बाक्नीनी। मार, गेपुकी नु येरोबामम सेल्शो सुन के बाछापुकी इन देवता दुम्चा कली गे नु बाक्नीमी? गे ग्रासीब, दे मिम्नीनी? १राजा २२:२८
9 मार, गेपुकीम हारून आ चच युइ परमप्रभु यावे कली चढ़ेब लेवी आन कली खेरशा, आंम मुर आन कली योव़शा, अर्को रागी खोदेंशो पा चढ़ेबपुकी मसेल्नी ङा? सुइ मुरुम चढ़ेब दुम्चा कली बाछा का नु ७ ओटा सांड चाक्शा जाक्त हना, गे मेको कली चढ़ेब सेल्नीनी। मिनु मेको मारेइ पने मचाप्ब मूर्ति कली चढ़ेब दुम्ब। प्रस्थान २१:४८; २इतिहास ११:१५
10 तन्न परमप्रभु यावे आंइ परमप्रभु बाक्ब। मिनु गोपुकीम मेको कली मप्रोंइक। मिनु परमप्रभु यावे कली चढ़ेब हारून आ चच युइ बाक्नीम। मिनु लेवीपुकीमी मेको आन कली वारच पाइनीम।
11 मेकोपुकीम नाक्दो नु सुनी परमप्रभु यावे कली चोशा चढ़ेतीक चढ़ेनीम। मेकोपुकीम ब्रोव़शो रिना पाइश्शो धूप चोइनीम। मेकोपुकीम कोंइतीक शोब्ले लहर पा क्येख सुन के टेबलम वोइक्नीम। मेकोपुकी नाक्दो कुस कुस सुन के बत्ती दातीकेम बत्ती दानीम। मोपा गोपुकीम आंइ परमप्रभु यावेम देंशो नेल्ल थमा पा पाइनीकी। तन्न गेपुकीम मेको कली प्रोंइतीनी। गन्ती २८:३-८
12 परमप्रभु गोपुकी नु बाक्शा, आंइ ङोंइती गाक्ब। मेको आ चढ़ेब आन तुराही गे नु लडाइ पचा कली ताप्चा चिक्शो बाक्नीम। गे इस्राएली मुरपुकी, गे परमप्रभु यावे, इन किकी पिपी आन परमप्रभु नु लडाइ मपने। गे मग्रानीनी” देंमाक्त। गन्ती १०:९
13 येरोबामम नोले रे जाक्शा लडाइ पचा कली हुल का बाप्पाइश्शा वोइश्शो बाक्माक्त। मिनु मेको आन लडाइ पाइब आन ठेयब हुलम चहिं यहूदा नु लडाइ पामे बाक्त। येरोबाम आ बाप्पाइश्शो हुल चहिं नोले रे जाक्मा बाक्त।
14 मिनु यहूदा ङा मुरपुकीम लेश्शा कोव़ङमेनु, लडाइ आन ङोंइती नु नोले यो बाक्माक्त, दे तुइक्तमे बाक्त। मिनु मेकोपुकीम “वारच पाइक्की” दे परमप्रभु यावे कली वाइ ब्रेश्शा थोव़मे बाक्त। मिनु चढ़ेबपुकीम आन तुराही ताप्मे बाक्त।
15 मिनु यहूदा ङा मुरपुकी लडाइ पचा कली वाइ ब्रेश्शा, ग्रीमा बाक्त। मोपा ग्रीमानु, परमप्रभुमी येरोबाम नु इस्राएली नेल्ल आन कली अबीयाह नु यहूदा ङा मुर आन ङोंइती ब्रुपदा बाक्त।
16 मिनु इस्राएलीपुकी यहूदा ङा मुर आन ङोंइती रे प्रोक्मा बाक्त। मिनु परमप्रभुमी मेको आन कली यहूदा ङा मुर आन गुइमी गेवा बाक्त।
17 मोपा अबीयाह नु आ लडाइ पाइबपुकीम इस्राएली आन कली खतम पोक्शा, ग्रामा बाक्त। मिनु इस्राएल ङा योव़शो बोल्यो लडाइ पाइब ५ लाख मुर साइक्चा पुंइसमा बाक्त।
18 मेना इस्राएलीपुकी ब्रुशा, दिप्चा पुंइसमा बाक्त। मिनु यहूदा ङा मुरपुकी ग्रामा बाक्त। मारदे हना मेकोपुकीमी परमप्रभु यावे, आन किकी पिपी आन परमप्रभु कली थमा सुइश्शो बाक्मा बाक्त।
19 अबीयाहमी येरोबाम कली खेदा पवा बाक्त। मिनु मेकोमी बेथेल सहर नु आ एर ओंथ ङा गाउंपुकी, येशाना सहर नु आ एर ओंथ ङा गाउंपुकी नु एफ्रोन सहर नु आ एर ओंथ ङा गाउंपुकी आंम के सेला बाक्त।
20 मिनु अबीयाह आ पालाम येरोबामम लेंशा लडाइ तोने मचबा बाक्त। मिनु परमप्रभु यावेमी येरोबाम कली रोइ पपाइश्शा, बेक्पदा बाक्त।
21 मिनु अबीयाह बोल्यो दुम्माक्त। मेकोमी १४ जना मीश चाक्गा बाक्त। मिनु मेको २२ जना तौ नु १६ जना तमी आन आफ दुम्माक्त।
22 अबीयाह आ पशो नेल्ले, दोपा बाक्मे मार मार पवा, परमप्रभु यावे आ लोव़ पाइब इददो आ किताबम ब्रेक्शो बाक्ब। २इतिहास १२:१५