2 Chronicles 12 in Sunwar
1 रेहोबाम आ राज्य बोल्यो दुम नोले मेको सक्ति पाइश्शो दुम्माक्त। मिनु मेकोमी परमप्रभु यावे आ अरेशो लोव़ प्रोना बाक्त। मिनु मेको नु इस्राएली नेल्लेमी यो परमप्रभु यावे आ अरेशो लोव़ प्रोन्मे बाक्त।
2 मिनु रेहोबामम पिप पशो ५ बर्स दुम्मेनु, इजीप्त ङा पिप शीशक यरूसलेम कली लडाइ तोचा कली जाक्माक्त। मारदे हना इस्राएलीपुकीमी परमप्रभु यावे कली प्रोंइशो बाक्मा बाक्त।
3 पिप शीशक हजार का सहे निक्शी बग्गी नु ६० हजार शारा ङोइक्ब लडाइ पाइबपुकी चाक्शा जाक्माक्त। शीशक नु इजीप्त रे हिक्ने मचाप्चा ङा पा लिबीया, सुक्कीम नु एथीयोपीया ङा लडाइ पाइब मेको नु जाक्मा बाक्त।
4 मिनु मेकोमी यहूदा ङा बोल्यो सहरपुकी ग्राना ग्रान यरूसलेम सम्म जाक्माक्त। २इतिहास ११:५-१०
5 मिनु परमप्रभु यावे आ लोव़ पाइब शेमायाह नु रेहोबाम यहूदा ङा ठेयब मुर आन बाक्तीक जाक्सा बाक्त। मेकोपुकी शीशक आ लडाइ तोशो रे ब्रोंइचा कली प्रोक्शा, यरूसलेमम बुक्शो बाक्मा बाक्त। मिनु शेमायाहम मेको आन कली “परमप्रभु यावेमी मार देंत देंशा हना ‘गेपुकीम आं कली प्रोंइतीनी। मोपतीके गो इन कली प्रोंइशा, शीशक आ गुइमी गेतन्नी’ देंशो बाक्ब” दे माइक्मी बाक्त।
6 मिनु इस्राएल ङा ठेयब मुरपुकी नु पिप आन थुं ब्रेम्शो दुम्शा “परमप्रभु यावेम थमा लोव़ पवा बाक्त” देंमा बाक्त।
7 मिनु परमप्रभु यावेमी मेको आन थुं ब्रेम्शो दुम्शो तशा, मेको शेमायाह कली “मेकोपुकी ब्रेम्शो दुम्तीके, गो मेको आन कली खतम मसेल्नुङमी। तन्न गो मेको आन कली ब्रोंइचा गेनुङमी। आं गाइश्शो शीशक आ पतीके रे पा यरूसलेमम ममोइक्नुङ।
8 मो हना यो मेकोपुकी मेको शीशक आ गेय पाइब दुम्नीम। मोपा मेकोपुकीमी आं कली गेय पचा नु अर्को राज्य ङा मुर आन कली गेय पचा गिश फरक दुम्बाक्मे, मेको तुइक्नीम” देंशो बाक्माक्त।
9 मिनु इजीप्त ङा पिप शीशकम यरूसलेम कली लडाइ तोशा ग्राशा, परमप्रभु यावे आ खिं ङा शोंप नु पिप आ दरवार ङा शोंप लदा बाक्त। मिनु सोलोमन आ सेल्शो सुन के तेक्तीकपुकी यो योल्दा बाक्त।
10 मिनु पिप रेहोबामम मेको सुन के तेक्तीक आन पा ङा कांसा के तेक्तीक सेल्शा, पिप आ दरवार ङा लाप्चो खाल पाइब आन ठेयब मुर आन कली जिम्मा गेशा वोइक्पदा बाक्त।
11 मिनु पिप परमप्रभु यावे आ खिं ओव़मेनु, मेको खाल पाइबपुकीम मेको तेक्तीक कुरशा, मेको नु आगा ओव़बाक्मा बाक्त। मिनु नोले मेकोपुकीम मेको तेक्तीक खाल पाइब आन बाक्तीकेम वोइक्बाक्मा बाक्त।
12 मारदे हना परमप्रभु यावेमी रेहोबाम ब्रेम्शो दुम्शो तशा, मेको आ पर्बम गाइक्तीके प्रोना बाक्त। मिनु नेल्ल खतम मसेला बाक्त। मिनु यहूदामी रिम्शो दुम्शो यो बारना बारन लमाक्त। २इतिहास ३२:२६
13 मोपा पिप रेहोबाममी यरूसलेममी आ राज्य बोल्यो सेल्शा, सासन पवा बाक्त। रेहोबाम पिप दुम्मेनु, ४१ बर्स दुम्शो बाक्माक्त। मिनु मेकोमी यरूसलेम सहरम १७ बर्स सासन पवा बाक्त। परमप्रभु यावेम इस्राएल ङा थर नेल्ल आन दाते रे आ नें कली मान पा बाक्चा, दे यरूसलेम सहर योव़शो बाक्माक्त। रेहोबाम आ ममा आ नें नामा बाक्माक्त। मेको अम्मोनी बाक्माक्त। २इतिहास ६:२०
14 रेहोबामम मरिम्शो पवा बाक्त। मारदे हना मेकोमी आ थुं नेल्लेमी परमप्रभु यावे आ नोले मखोदा बाक्त।
15 मिनु रेहोबाम आ ङोंइती रे ङा नोले सम्म पशो नेल्ल परमप्रभु यावे आ लोव़ पाइब शेमायाह नु इददोम इतिहासम मब्रेक्शो बाक्बा ङा? मेकोपुकीम मुर आन किकी पिपी ब्रेक्तसे बाक्त। रेहोबाम नु येरोबाम आस दातेमी गेना हना यो लडाइ दुम्ना दुम्न बाक्माक्त। २इतिहास १३:२२
16 मिनु रेहोबाम बेक्माक्त। मिनु मुरपुकीम मेको कली दाऊद आ सहर, यरूसलेममी थिम्मे बाक्त। मिनु आ तौ अबीयाह पिप दुम्माक्त।