1 Samuel 18 in Sunwar
1 मोपा दाऊदम सावल नु लोव़ पने थुमा बाक्त। नोले योनाथनमी, दाऊद कली आंम कली खोदेंशो पा आ थुं रेन दाक्चा गोवा बाक्त। मेको सावलम तुइक्ता बाक्त।
2 मिनु सावलमी दाऊद कली लदा बाक्त। आ आफ आ खिं लेश्शा लचा मगेवा बाक्त। १सामुएल १६:२२; १सामुएल १७:१५
3 मिनु योनाथन नु दाऊद आस थुं रेन थमा पा वारच बु दुम्सा बाक्त। मारदे हना मेको निक्शी काम अर्को कली आंम कली खोदेंशो पा दाक्मुसा बाक्त। मिनु कबल का पाम्से बाक्त। १सामुएल २३:१८; २सामुएल २१:७; १सामुएल १९:१; १सामुएल २०:१७; २सामुएल १:२६
4 मिनु योनाथनमी आ फेक्शो वा प्रुइश्शा दाऊद कली गेवा बाक्त। आ तरवार, लिब्रा नु पेटी सुन्दा प्रुइश्शा गेवा बाक्त।
5 दाऊदम सावल आ पथ सोइश्शो हिंचा ङा गेय यो रिम्शो पा पवा बाक्त। मिनु सावलमी दाऊद कली नेल्ल क्येङा सक्ति पाइश्शो कप्तान सेला बाक्त। मोपा मेको कली मान बारपाइश्शोमी सावल नु आ ठेयब मुरपुकी यो ग्येरसमा बाक्त।
6 दाऊदम पलिस्ती आन कली साइश्शा लेम्मेनु, इस्राएल ङा सहर नेल्ल ङा मीश मुर नेल्ल कोव़थ ग्रूमा बाक्त। सिल पाइब मीश मुरपुकी खैजडी ताप्शा, कुम्सो पना पन, सिल पना पन पिप सावल कली ग्रुम्थ जाक्मा बाक्त। न्यायाधीस ११:३४
7 मिनु मीश मुरपुकीम ग्येरसीशा “सावलम हजार हजार आन कली साइक्तीमी। तन्न दाऊदमी १० हजार, हजार आन कली साइक्तीमी” दे कुम्सो पामे बाक्त। १सामुएल २१:१२; १सामुएल २९:५
8 मिनु सावल थाम्पा गाइक्ता बाक्त। मेको लोव़ नेंशा थाम्पा आ थुं खुरसे बाक्त। मेकोमी दाऊद कली चहिं “१० हजार, हजार तन्न आं कली चहिं हजार हजार ला देंतेक्म। मुल मेको कली पिप सेल्चा का ला लीत” दे मिम्ता बाक्त।
9 मेको नाक्त रे सावलमी दाऊद कली गेहे पचा गोवा बाक्त।
10 आ दीसा परमप्रभु रे मरिम्शो पाइब सोक्त काम सावल कली सुमा बाक्त। मिनु सावलमी आ खिंमी हेंथे पवा बाक्त। मिनु दाऊदमी ङोंइती ङा खोदेंशो पा सावल आ पर्बम बीना तबा बाक्त। सावल आ गुइमी तूतीक का बाक्माक्त। १सामुएल १६:१४,२३
11 मेकोम “गो दाऊद कली गारोम क्येप्नुङ” दे मिम्शा, आ तूतीक आबा बाक्त। तन्न दाऊद निक्शी खेयप दिल्शा मख्रपांइसे बाक्त। १सामुएल १९:१०; १सामुएल २०:३३
12 मिनु सावल दाऊद कली तशा हिंमाक्त। मारदे हना परमप्रभु यावेम आ कली प्रोंइशा दाऊद नु बाक्शो बाक्ब, दे तुइक्ता बाक्त।
13 मोपतीके सावलम दाऊद कली आ दरवार रे ग्रुंइशा, हजार का मुर आन कप्तान सेला बाक्त। मिनु दाऊदमी आ मुर आन कली लडाइम लाइक्मी बाक्त।
14 मिनु परमप्रभु यावे मेको नु बाक्तीके आ पशो गेय नेल्लेमी मेको रिम्शो दुम्माक्त। १सामुएल १८:५
15 सावलमी दाऊद आ गेय नेल्ल रिम्शो दुम्शो तशा, ङोंइती क्येङा हिंमाक्त।
16 इस्राएल नु यहूदा ङा मुर नेल्लेमी दाऊद कली दाक्तमे बाक्त। मारदे हना मेको लडाइ पतीकेम लां कोंइशा ङोंइती गाक्बाक्माक्त।
17 मिनु सावलम दाऊद कली “गो आं ठेयब तमी मेराब इ कली गेशा ग्युंबे पपाइक्नुङ। तन्न गे मेको आ पर्बम बोल्यो पा आं गेय पचा माल्नेवे। मिनु परमप्रभु यावे आ पर्बम लडाइ पावो” दे मदा बाक्त। मारदे हना सावलम दाऊद कली आंम आ गुइम ममाइ पलिस्ती आन गुइ रे साइक्पाइक्चा माल्शो बाक्माक्त।
18 मिनु दाऊदमी “गो सु नङा ङा? आं आफ आ खिं ङा मुर इस्राएली सु नमी ङा? गो पिप आ चांइवा दुम्नुङा?” देंमाक्त। २सामुएल ७:१८
19 मो हना यो सावल आ तमी मेराब नु दाऊद आस ग्युंबे दुम्तीक नाक्त जाक्चा क्येङा ङोंइती, मेराब कली मेहोला आ मुर अद्रीएल नु ग्युंबे पा सोइक्ता बाक्त।
20 तन्न सावल आ अर्को तमी मिकाल दाऊद नु दाक्मुसा बाक्त। मेको लोव़ सावलम नेनानु “आं मिम्शो गाप्ब दुम्त” दे मिम्ता बाक्त।
21 मेको आ थुंमी “गो मेको कली दाऊद नु ग्युंबे पपाइक्नुङ। पलिस्ती आन गुइम बेक्पाइक्चा कली मेको वाल्पाइक्तीक गेय बाक्ब” देंमाक्त। मोपतीके सावलमी आ चांइवा सेल्चा कली लोव़ पवा बाक्त।
22 मेकोमी आ गेय पाइब आन कली “एको लोव़ सुइम मतुइक्चा ङा पा दाऊद कली मतीन” देंमाक्त। मिनु मेकोपुकीम दाऊद कली “पिप इन क्येङा थाम्पा ग्येरशो बाक्ब। मिनु आ गेय पाइब नेल्ल आन दाक्शो यो गे बाक्नीनी। पिप आ खिं ङा मुर नु ग्युंबे पतीक नाक्ती यो मुलन बाक्ब” देंमा बाक्त। १सामुएल २२:१४
23 सावल आ मुरपुकीम दाऊद कली मोदेंशो लोव़ पामेनु, दाऊदम मेको आन कली “गेपुकीम पिप आ तमी नु ग्युंबे पचा आइक्च लोव़ मिम्तीनी? आं खोदेंशो मारेइ मथीब मुरुम ओदेंशो पने चाप्नुङा?” दे माइक्मी बाक्त।
24 मिनु दाऊद आ देंशो लोव़ आ गेय पाइबपुकीम सावल कली शेंदमे बाक्त।
25 मिनु मेकोमी दाऊद कली “जोरी सत्रु आन क्येक्क लेत्चा कली पिपम ग्युम्ली आ पर्बम सहे का पलिस्ती आन ख्रोइक्तीक चिनु ख्रोइक्तीक ङा कुशुल ला पुंइब मतीन” देंमाक्त। मारदे हना पलिस्ती आन गुइ रे दाऊद बेक्ल देंशो बाक्माक्त।
26 मिनु सावल आ देंशो लोव़ आ गेय पाइब मुरपुकीम दाऊद कली नेंपदमे बाक्त। मिनु मेको लोव़मी मेको पिप आ तमी नु ग्युंबे पचा बिस्से बाक्त।
27 मिनु देंशो नाक्त आ ङोंइती, नाक्त दाऊद आ मुरपुकी नु लशा सहे निक्शी पलिस्ती आन कली सदमे बाक्त। मिनु मेकोम मेको आन ख्रोइक्तीक चिनु ख्रोइक्तीक ङा कुशुल लाइश्शा, चांइवा सेल्यीनी, दे पिप आ ङोंइती हिक्शा, गेवा बाक्त। मिनु सावलमी आ तमी मिकाल दाऊद कली गेशा ग्युंबे पाइक्ता बाक्त।
28 मिनु सावलमी परमप्रभु यावे दाऊद नु बाक्ब, दे तुइक्ता बाक्त। आ तमी मिकालम मेको कली दाक्ब, दे यो तुइक्ता बाक्त।
29 मिनु सावल दाऊद क्येङा शुश हिंचा गोवा बाक्त। मिनु आ लीशो ब्रोंइतीक नाक्त सम्मन मेको दाऊद आ जोरी सत्रु दुम्माक्त। १सामुएल १८:१२
30 पलिस्ती आन कप्तान का का पा लडाइ पथ जाक्बाक्मा बाक्त। मेकोपुकी मोपा जाक्मानु, सावल आ अरु गेय पाइब आन क्येङा दाऊदमी रिम्शो गेय पवा बाक्त। मोपा मेको आ नें ठेयब दुम्माक्त।