1 Samuel 17 in Sunwar
1 पलिस्तीपुकीम लडाइ पचा कली आन लडाइ पाइब आन कली खुप्तमे बाक्त। मिनु यहूदा ङा सोकोहम बुक्मा बाक्त। मेकोपुकीमी सोकोह नु आजेका आस दाते एफेस-दाम्मीमम आन बाक्तीके सेल्मे बाक्त। यहोसु १५:३५
2 सावल नु इस्राएलीपुकी यो ग्रुम्शा एलाह ङा दिंमम आन बाक्तीके सेल्मे बाक्त। मेकोपुकी पलिस्ती आन ङोंइती लहर पा राम्मा बाक्त।
3 पलिस्तीपुकी डांडा का नु इस्राएलीपुकी अर्को डांडा पा बाक्मा बाक्त। मेको आन दातेमी दिंम का बाक्माक्त।
4 मिनु पलिस्ती आन बाक्तीक रे गाथ ङा गोल्याथ नें पाइश्शो बोल्यो लडाइ पाइब का ग्रूशा, पिमाक्त। मेको ६ कुबीत ३ इन्च लाइश्शो बाक्माक्त। कुबीत का ०.५ मिटर बाक्ब।यहोसु ११:२२
5 मेको आ पियामी कांसा के टोपी बाक्माक्त। ५ हजार शेकेल ङा कांसा के फेक्तीक फेक्शो बाक्माक्त। शेकेल का ११.५ ग्राम, तोला का खोदेंशो बाक्ब।
6 मेको आ खोइलीम कांसा के मुइक्तीक मुइश्शो बाक्माक्त। मेको आ बलाम ठेयब कांसा के या कुरशो बाक्माक्त।
7 मेको आ तूतीक आ ग्याइक्तीके वा प्रोव़ब आन शी खोमो बाक्माक्त। मेको आ तूतीके फलाम के बाक्माक्त। मेको ६० शेकेल ङा बाक्माक्त। मेको आ या कुरब मेको आ ङोंइङोंइती गाक्बाक्माक्त। शेकेल का ११.५ ग्राम बाक्ब। मेको या ६९० ग्राम बाक्त।१इतिहास ११:२३
8 मेको मुर राप्शा, इस्राएल ङा मुर नेल्ल आन कली ठेयब सेंदा पा “ए सावल आ गेय पाइबपुकी, गेपुकी मारदे लडाइ पथ जाक्नीनी? गो पलिस्ती नङ। गो नु लडाइ पचा कली इन मुर योव़ङीन। मिनु लडाइ पथ पिन। गे सावल आ गेय पाइब मननी ङा?
9 आ कान लडाइ पा मेकोम आं कली साइक्ने चाप्ती हना, गो इन वाइल दुम्नीकी। तन्न गो मेको कली ग्राती हना, गेपुकी आंइ वाइल दुम्शा, आंइ गेय पचा माल्नीनी” देंमाक्त।
10 मिनु लेंशा “गो मुलाक्ती इस्राएल ङा लडाइ पाइब आन कली आइक्च मिम्नुङ। मुर का सोइक्तीन। मिनु गो लडाइ पाइक्नस्कु” देंमाक्त। २राजा १९:१६; भजन संग्रह ७४:१८; सेफन्याह २:८
11 मिनु सावल नु इस्राएलीपुकी मेको पलिस्ती आ देंशो नेंशा, थाम्पा हिंमा बाक्त।
12 दाऊद बेथलेहेम, एफ्राथाह सहर ङा यहूदा ङा येस्से माइश्शो आ तौ बाक्माक्त। मेको येस्से के ८ जना तौ बाक्मा बाक्त। सावल आ पालाम मेको खाल्पा बाक्माक्त। १सामुएल १६:१-११
13 येस्से आ तौ, जेठा, माइला नु साइला लडाइ पचा कली सावल आ नोले खोइश्शो बाक्मा बाक्त। मेको जेठा एलीआब, आ माइला अबीनादाब नु आ साइला शम्माह बाक्मा बाक्त।
14 दाऊद चहिं कान्छा बाक्माक्त। मेको ठिटा सां चहिं सावल आ नोले खोइश्शो बाक्मा बाक्त।
15 मेना दाऊद सावल आ बाक्तीके नु बेथलेहेम आ आफ आ क्यारश भेडापुकी कोव़चा कली एर ओंथ पाइक्बाक्माक्त।
16 मेको पलिस्ती ४० नाक्त सम्म नाक्दो सुनी आन ङोंइती जाक्शा आ राप्तीकेम राप्बाक्माक्त।
17 काबु नाक्ती येस्सेमी आ तौ दाऊद कली “इ लोक्ब आन कली एको ४ पाथी तांब्रा नु १० ओटा शोब्ले लाइश्शा रीब पा चोव़थ लावो।
18 एको १० ओटा दूध के सेल्शो जचा थोव़क चहिं आन हजार का मुर आन कप्तान कली लतो। इ लोक्बपुकी दोदेंशो पा बाक्मा कोव़ङो। मिनु मेको आन रे मारेइ चिनु कुरशा जाक्को” दे मदा बाक्त।
19 मेना सावल, दाऊद आ लोक्ब सां नु इस्राएली नेल्ले एलाह ङा दिंमम पलिस्ती नु लडाइ पना पन बाक्मा बाक्त।
20 मिनु आ दीसा सुनी कना दाऊद आ भेडापुकी मुर आन कली “कोव़ङीन” दे येस्से आ देंशो खोदेंशो पा, मेको चोव़थ गाक्माक्त। लडाइ पाइब नेल्ल आन आन राप्तीकेम राप्शा लडाइ के बाजा ताप्मे ना, मेको आन बाक्तीकेम जाक्दीम्माक्त।
21 इस्राएली पलिस्ती आन ङोंइतीमी, पलिस्ती इस्राएली आन ङोंइतीमी लहर पा राम्मा बाक्त।
22 मार मार वोइक्ब आन कली, मार मार गेशा, दाऊद आ लोक्ब आन राप्तीकेम मेको आन कली ग्रुम्थ दोरशा लमाक्त।
23 मिनु मेको आ लोक्बपुकी नु लोव़ पना पन बाक्मेनु, मेको गाथ ङा पलिस्ती गोल्याथ आ हुल रे ग्रूशा, ङोंइती ङा खोदेंशो पा ग्रीमाक्त। मेको लोव़ दाऊदम नेना बाक्त।
24 इस्राएलीपुकी मेको मुर कली तामे चोटीन प्रोक्बाक्मा बाक्त।
25 मेकोपुकीमी “कोव़ङीन, मेरे मुर नाक्त किंत किंत ग्रूशा इस्राएली आन कली ग्रीशा हिंपाइक्ब। मेरे मुर कली साइक्ब कली पिपम शुश इनाम गेब। आ तमी यो मेको मुर कली गेशा ग्युंबे पाइब। मेको आ खिं ङा मुर आन कली इस्राएलमी पिप आ गेय पतीक रे थमा पा प्रोंइब” देंमा बाक्त।
26 मिनु दाऊदमी आ नेक्था बाक्ब आन कली “मेरे पलिस्ती कली साइक्ब नु इस्राएली आन कली मुने दोक्तीक रे प्रोंइबमी मार ताइबा? गेना हना यो ब्रोंइशा बाक्ब परमप्रभु आ लडाइ पाइब आन कली शुक्शी पाइब मेरे ख्रोइक्तीक चिनु मख्रोइश्शो पलिस्तीम मार मिम्बा?” देंमाक्त।
27 मिनु मेको आ पर्बम मार दुम्बा? मेको कली साइक्ब मुर कली मार पांइसीबा, दे मुरपुकीमी दाऊद कली शेंदमे बाक्त।
28 मेको कली मुरपुकी नु लोव़ पा बाक्शो आ लोक्ब एलीआबम नेना बाक्त। मिनु मेको गाइक्ता बाक्त। मेकोम दाऊद कली “गे मारदे एक बाक्ङे? गोरशो रागीम बाक्शो मेको इच्का खोइ भेडापुकी यो सु कली कोव़पाइक्मी? गो इ कली तुइक्नुङ। गे मटीब नु हेंथे पाइब बाक्नेवे। गे एक लडाइ कोव़थ ला जाक्शो नवे” दे मदा बाक्त।
29 मिनु दाऊदमी “मुल गो मार पङा ङा? गो हिल्लो पचा यो मताइनुङा?” देंमाक्त।
30 मिनु मेको ब्राशा अर्को मुर आन बाक्तीक लशा, मेको लोव़ हिल्लो पामी बाक्त। तन्न नेल्लेमी मेको कली मोदेंशो लोव़ मदमे बाक्त।
31 मिनु दाऊदम देंशो लोव़ मुरपुकीम सावल कली शेंदमे बाक्त। मिनु मेकोमी दाऊद कली ब्रेत्थ सोइक्ता बाक्त। १सामुएल १७:३१
32 मिनु दाऊदम मेको कली “गे ग्येत्थ लुक्च मदुमीन। गो इन गेय पाइब लशा मेको पलिस्ती नु लडाइ पाइक्नुङ” देंमाक्त।
33 मिनु सावलमी “गे लशा, मेको पलिस्ती नु लडाइ पने मचाप्नेवे। गे नक ङा आलन बाक्नेवे। मेको साइ रेन लडाइ पाइब मुर बाक्ब” दे मदा बाक्त।
34 मिनु दाऊदमी सावल कली “गो आं आफ आ भेडा गोठला नङ। जोइ वां जाक्शा। भेडा बगाल रे योल्नीम।
35 मेना गो मेको आन कली खेदा पा लशा, आन शोव़ रे मेको रोइश्शा चाक्नुङ। आं कली क्राइक्चा कली मेको लेत्तेक्म हना, मेको आन कली आन शांपेम ग्याइश्शा तुप्शा साइक्नुङमी
36 गो जोइ वांपुकी साइश्शो बाक्नुङ। मेको ख्रोइक्तीक चिनु मख्रोइश्शो पलिस्ती यो मेको आन खोदेंशो दुम्ब। मेकोमी गेना हना यो ब्रोंइशा बाक्ब परमप्रभु आ लडाइ पाइब आन कली शुक्शी पशो बाक्ब।
37 आं कली जोइ नु वां आन शोव़ रे प्रोंइब परमप्रभु यावेमी मेको पलिस्ती आ गुइ रे यो प्रोंइब” देंमाक्त। मिनु सावलमी “लावो, परमप्रभु यावे गे नु बाक्ल” देंमाक्त।
38 मिनु सावलमी दाऊद कली आ लडाइम फेक्तीक फेक्पदा बाक्त। कांसा के टोपी आ पियाम गुप्ता बाक्त। मिनु आ कांसा के फेक्तीक यो फेक्ता बाक्त।
39 मेको नोले मेको आ तरवार पिप्ता बाक्त। मिनु दाऊद गाक्चा थुं पवा बाक्त। तन्न मचबा बाक्त। मारदे हना मेकोमी मेको गेना यो मफेक्शो, मपांइशो बाक्माक्त। मोपतीके मेकोम सावल कली “गो एको पांइशा, फेक्शा लने मचाप्नुङ। मारदे हना गो एको गेनायो मपांइशो मफेक्शो नङ” देंमाक्त। मिनु मेकोमी मेको नेल्ल प्रुइक्मी बाक्त।
40 मेको नोले मेकोमी आ कोक्के कुरा बाक्त। मिनु खोला रे ५ ओटा सिल सिल देंशो फुल्लु गुबा बाक्त। मिनु आ झोलाम कुर पवा बाक्त। मिनु आ हुरद शेशा, मेको पलिस्ती नु लडाइ पथ लमाक्त।
41 मेको पलिस्ती आ या कुरब कली ङोंइती गाक्पाइश्शा, दाऊद आ बाक्तीक गे पिमाक्त। मेको आ तेक्तीक कुरबमी मेको कली वारच पशो बाक्माक्त।
42 मिनु मेकोमी दाऊद कली तशा, रिस्से बाक्त। मिनु लल चोव़चो, पाइश्शो दारशो ठिटा कली तशा, शुक्शी पचा गोवा बाक्त। १सामुएल १६:१२
43 मिनु मेको पलिस्तीम दाऊद कली “मार, गो कुचुम नङा? मिनु कोक्के शेशा, गो नु लडाइ पथ जाक्ङे” मदा बाक्त। मिनु मेकोमी आ देवता आ नें थिशा दाऊद कली सराप पवा बाक्त।
44 मेकोमी “पिवो, गो इ श्ये चिक्ब नु ब्वाकी ङा जन्तु आन कली ब्वचा गेनुङ” दे मदा बाक्त।
45 मिनु दाऊदमी पलिस्ती कली “गे, गो नु लडाइ पचा कली तूतीक तरवार कुरशा, पिशो बाक्नेवे। तन्न गो गे नु लडाइ पचा कली मुर नेल्ल आन परमप्रभु यावे, इस्राएल ङा लडाइ पाइब आन परमप्रभु आ नेंमी पिशो बाक्नुङ।
46 मुलाक्ती परमप्रभु यावेम इ कली आं गुइम गेब। गो इ कली साइक्नन। मिनु इ पिया ख्रोइश्शा। इ रां नु पलिस्ती आन रां चिक्ब नु ब्वाकी ङा जन्तु आन कली ब्वचा गेनुङ। मिनु इस्राएलम परमप्रभु का बाक्ब, दे रागी नेल्ल ङा मुरुम तुइक्नीम।
47 मिनु एक बाक्शो मुर नेल्लेम परमप्रभु यावेम तूतीक नु तरवारम मप्रोंइब, दे तुइक्नीम। मारदे हना एको लडाइ परमप्रभु यावे केन बाक्ब। मेकोमी गे नेल्ल इन कली आंइ गुइमी गेब” दे मदा बाक्त। प्रस्थान १५:३; भजन संग्रह २०:८; जकरिया ४:६
48 मिनु मेको पलिस्ती दाऊद गे पिमाक्त। मिनु दाऊदम मेको नु लडाइ पचा कली, आ ङोंइती गे दोरशा लमाक्त।
49 मेकोमी आ गुइ झोलाम कुर पा फुल्लु का ग्रुंइदा बाक्त। मिनु हुरदम वोदा बाक्त। मिनु हिरशा, मेको पलिस्ती आ कुप्फीम आबा बाक्त। मिनु मेको फुल्लुम कुप्फ होदा बाक्त। मिनु मेको खपीम गोल्माक्त।
50 मोपा दाऊद आ हुरद नु फुल्लुम ग्रामाक्त। मेको नु तरवार मबाक्त हना यो, पलिस्ती गोल्याथ कली सदा बाक्त।
51 मेको दोरशा मेको पलिस्ती गोल्याथ गे लमाक्त। मिनु आ नेक्था राम्माक्त। मेको आ तरवार खोत रे शोइश्शा, मेको कली साइश्शा आ पिया ख्रोदा बाक्त। पलिस्तीपुकीमी आंम बोल्यो लडाइ पाइब साइश्शो तामे बाक्त। मिनु मेकोपुकी हिंशा प्रोक्मा बाक्त।
52 मिनु इस्राएली नु यहूदीपुकीमी लडाइ ङा ग्रीतीक ग्रीमा बाक्त। गाथ नु एक्रोन ङा ठेयब लाप्चो सम्म मेको आन कली थाम्पा खेदा पामे बाक्त। शा-आराइम, गाथ नु एक्रोन लतीक लां सम्म आन बेक्शो रां नेल्ल थाम्पा ब्रमाक्त।
53 पलिस्ती आन कली खेदा पा लेम्मानु, मेकोपुकीमी मेको आन बाक्तीक ङा मारेइ मारेइ खुप्तमे बाक्त।
54 दाऊदमी गोल्याथ आ या मेको आ ताम्बुमीन प्रोंइशा, मेको आ पिया चहिं कुरशा यरूसलेम चाक्गा बाक्त।
55 मिनु सावलमी दाऊद कली पलिस्तीपुकी नु लडाइ पथ लशो तशा, मेकोम आ लडाइ पाइब आन कप्तान आब्नेर कली “मेको ठिटा सु का आ तौ बाक्मे?” दे हिल्लो पवा बाक्त। मिनु आब्नेरमी “गो इन नेंमी कसम जशा देंनुङ, गो मेको कली मतुइक्नुङ” देंमाक्त।
56 पिपम आब्नेर कली “मेको सुका आ तौ बाक्मे रुपो” देंमाक्त।
57 मिनु दाऊद मेको पलिस्ती कली साइश्शा, लेम नोले आब्नेरमी दाऊद कली सावल आ ङोंइती चाक्दीदा बाक्त। दाऊदमी मेको पलिस्ती आ पिया गुइम ग्याइश्शो बाक्माक्त।
58 मिनु सावलम मेको कली “ए ठिटा, गे सुका आ तौ नवे” दे हिल्लो पवा बाक्त। मिनु दाऊदमी “गो इन गेय पाइब बेथलेहेम ङा येस्से आ तौ नङ” देंमाक्त।