1 Samuel 10 in Sunwar
1 मिनु सामुएलमी तेल कुरतीक रे तेल ग्रुंइशा, सावल आ पिया तार लुक्ता बाक्त। मिनु मेको कली पुक्पु पा “परमप्रभु यावेमी इ कली आ मुर इस्राएली आन पिप सेल्तु। गे आ मुर आन कली सासन पाइक्नेवे। मिनु गे मेको आन एर ओंथ ङा जोरी सत्रु आन गुइ रे प्रोंइनेवे। परमप्रभु यावेम थमा पा इन कली आ मुर आन कली सासन पाइब सेल्शो आ चिन्ड मार बाक्ब देंशा हना,
2 गे मुलाक्ती एक रे लाइनीसी। मिनु बेन्यामीन आ सांद सेल्साह सहर आ नेक्था राहेल कली थिम्तीकेमी मुर निक्शी ग्रुम्नीसी। मेको निक्शीमी इस कली ‘इन माल्शो गधा थित्तेक्म। इन आफोमी मेको आन पर्बम सुर्ता पचा प्रोंइशा, इस पर्बम सुर्ता पा “मुल आं तौ आ पर्बम गो मार पाइनुङा?” देंत’ देंनीस। उत्पत्ती ३५:१९
3 मिनु मेकेर रे लाक्शा, ताबोर ङा ठेयब रवा आ नेक्था सम्म लाइनीसी। मेकेर परमप्रभु कली चढ़ेथ बेथेल गे लाइब मुर सां ग्रुम्नीसी। मेको ङोंइती ङा मुरुम पाठा सां, दाते ङा मुरुम शोब्ले सां नु नोले ङा मुरुम गर का अङगुर शांबु कुरशा गाक्शो बाक्नीम।
4 मिनु मेकोपुकीमी इस कली ‘रिम्शो बाक्नी?’ दे हिल्लो पाइनीम। मिनु इस कली शोब्ले निक्शी गेनीम। मिनु गे मेको ताक्चा माल्नीसी।
5 मिनु नोले गे परमप्रभु आ डांडा गिबेआथ-एलोहीम जाक्नीसी। मेकेर लडाइ पचा कली बाक्शो पलिस्ती बाक्नीमी। मिनु गे मेको सहर ओव़तीसी हना, डांडा रे यिन यिन पशो परमप्रभु यावे आ लोव़ पाइब आन हुल का ग्रुम्नीसी। मेको आन ङोंइती मार मार ताप्तीके ताप्बपुकी गाक्शो बाक्नीम। मिनु मेकोमी परमप्रभु यावे आ लोव़ पाइनीम।
6 मिनु परमप्रभु यावे आ सोक्त इन तार जुक्ब। मिनु गे यो परमप्रभु यावे आ लोव़ पाइनीनी। मिनु गे अर्को मुर दुम्नीनी। न्यायाधीस १३:२५
7 मिनु मोदेंशो चिन्ड नेल्ल दुम नोले इ ङोंइती मार गेय बाक्बा, मेको पावो। मारदे हना परमप्रभु गे नु बाक्ब।
8 मिनु गे आं ङोंइती गिल्गाल यिवो। मिनु गो चोशा चढ़ेचा नु दुशा बाक्चा आ पर्बम चढ़ेचा कली इ बाक्तीक जाक्नुङ। गो इ बाक्तीक मजाक्ङा सम्म, ७ नाक्त सम्म आं कली रिम्शा बाक्को। मिनु गो जाक्शा गे मार पचा माल्नेवे, इन कली शेंनुङ” दे सामुएलम सावल कली देंमाक्त। १सामुएल १३:८
9 मिनु सावल गाक्चा कली सामुएल नु ब्रामेनु, परमप्रभुम सावल आ थुं नक सेला बाक्त। मिनु मेको नोले मेको चिन्ड नेल्ल दुम्माक्त।
10 मिनु मेको गिबा जाक्दीस्सानु, परमप्रभु यावे आ लोव़ पाइब हुल मेको कली ग्रुम्थ, यिशो बाक्मा बाक्त। मिनु परमप्रभु आ सोक्तीम मेको कली सुमा बाक्त। मिनु सावल यो मेको आन दातेमी परमप्रभु यावे आ लोव़ पाइब दुम्माक्त। १सामुएल १९:२०-२४
11 मिनु मेको कली ङोंइती रे तुइक्ब मुरपुकीम, परमप्रभु यावे आ लोव़ पाइब आन दातेमी लोव़ पाइब दुम्शो तशा “कीश आ तौ कली मार दुम्मे? मार, सावल यो परमप्रभु यावे आ लोव़ पाइब आन दाते ङा का बाक्मे” देंमुमा बाक्त।
12 मिनु मेकेर ङा मुर कामी “मेरे आन आफ सु बाक्मे?” दे हिल्लो पवा बाक्त। मेना रे मुरपुकीमी “सावल यो परमप्रभु यावे आ लोव़ पाइब आन दाते ङा बाक्मे?” दे देंतीक लोव़ लीमाक्त।
13 मिनु मेकोमी परमप्रभु यावे आ लोव़ पने थुम्शा, आ खिं लमाक्त।
14 मिनु सावल आ बकान्छाम, सावल नु आ गेय पाइब आस कली “गे निक्शी ते लसी?” दे हिल्लो पवा बाक्त। मिनु सावलमी “जाम्शो गधा माल्दीशो नस्कु। गो थिन्ने मचाप्स्कु। मिनु गो सामुएल आ बाक्तीक यो लाइतस्कु” देंमाक्त।
15 मिनु सावल आ बकान्छाम “सामुएलम इ कली मार देंमे? आं कली शेंदीसी” देंमाक्त।
16 मिनु सावलमी “ ‘गधा थित्तेक्म’ देंत” देंमाक्त। तन्न पिप दुम्तीके आ पर्बम देंशो लोव़ मशेंदा बाक्त।
17 मेना सामुएलमी मुर आन कली परमप्रभु यावे आ बाक्तीके मिस्पामी ग्रुम्चा, दे ब्रेत्तीमी बाक्त। १सामुएल ७:५
18 मिनु मेकोमी इस्राएली आन कली “परमप्रभु यावे, इस्राएली आन परमप्रभुमी मार देंत देंशा हना ‘गो इस्राएली इन कली इजीप्त रागी रे ग्रुंइशा, एक चाक्तन्नी। इन कली श्येत गेब इजीप्ती आन गुइ रे प्रोंइतन्नी। मिनु नोले इन कली दिप्ब अर्को रागी ङा मुर आन गुइ रे यो प्रोंइतन्नी’ देंत।
19 तन्न मुलाक्ती गे इन कली हिंचा ङा श्येत नु मरिम्शो रे प्रोंइब इन परमप्रभु कली प्रोंइतीनी। मिनु गेपुकीमी ‘आंइ कली पिप का योव़शा गेने’ देंतीनी। मोपतीके मुल परमप्रभु यावे आ ङोंइती इन थर थर नु खिं खिं ङा मुर पा रपीन” दे माइक्मी बाक्त। १सामुएल ८:७
20 मिनु सामुएलमी इस्राएली नेल्ल आन थर आन कली राप्पाइक्मी बाक्त। मिनु बेन्यामीन आ थर योव़चा पुंइसे बाक्त। १सामुएल १४:४१-४२; यहोसु ७:१६
21 मिनु मेकोमी बेन्यामीन आ थर ङा खिं खिं ङा मुर आन कली राप्पदा बाक्त। मिनु मात्री आ खिं ङा मुर योव़चा पुंइसमा बाक्त। मिनु मेको नोले कीश आ तौ सावल योव़चा पुंइसे बाक्त। मिनु मेको कली माल्शा, मथित्मे बाक्त।
22 मिनु मेकोपुकीम परमप्रभु यावे कली “मार, मेको मुर एक बाक्बा?” दे हिल्लो पामे बाक्त। मिनु परमप्रभु यावेमी “मेको मार मार आन दातेमी ख्रुइश्शा बाक्शो बाक्ब” देंमाक्त।
23 मिनु मुरपुकी दोरशा लशा, मेको कली चाक्गमे बाक्त। मिनु मेको मुर आन दातेमी राम्मेनु, नेल्ल आन क्येङा लाइश्शो बाक्माक्त। मुर नेल्ले मेको आ बला ङा लुक्च ला बाक्मा बाक्त।
24 मिनु सामुएलम मुर नेल्ल आन कली “परमप्रभु यावेमी योव़शो मुर कली कोव़ङीन। मुर नेल्ल आन दातेमी एको खोदेंशो सुइ मबाक्म” देंमाक्त। मिनु मुर नेल्ल ग्येरशा “पिप शुश ब्रोंइल” दे ग्रीमा बाक्त। मत्ती २१:९
25 मिनु सामुएलमी मुर आन कली पिप आ अधिकार आ पर्बम शेंदीमी बाक्त। मिनु मेको नेल्ल कागजम ब्रेक्शा, परमप्रभु यावे आ ङोंइती वोदा बाक्त। मिनु नोले मेकोमी मुर आन कली आन खिं खिं सोइक्तीमी बाक्त।
26 मिनु सावल यो आ खिं गिबा लमाक्त। मिनु परमप्रभुम आन थुं थिशो रिम्शो लडाइ पाइबपुकी मेको नु लमा बाक्त।
27 मेकेर मरिम्शो मुर यो बाक्मा बाक्त। मेकोपुकीमी “एको मुरुम आंइ कली आंइ जोरी सत्रु रे दोपा प्रोंइने चाप्बा ङा” देंमा बाक्त। मिनु मेकोपुकीमी सावल कली शुक्शी पा मेको कली मान पतीके यो मारेइ मचाक्ग्मे बाक्त। तन्न सावल सिक्सी पा बाक्माक्त। १सामुएल ११:१२