1 Samuel 11 in Sunwar
1 मिनु महिना का नोले अम्मोन ङा नाहाशमी याबेश-गिलादम लडाइ पा पुम्दमे बाक्त। याबेश ङा वोंइश मुरपुकीम नाहाश कली “गोपुकी नु गरीन। मिनु गो इन गेय पाइब दुम्नीकी” देंमा बाक्त। १सामुएल ३१:११
2 मिनु अम्मोन ङा नाहाशमी मेको आन कली “गो गेपुकी नु गारचा कली नेल्ल इन ग्युरा मिक्च पुक्शा ला गेपुकी नु गारनुङ। मोपा इस्राएली नेल्ल इन कली मुने तोक्नुङ” देंमाक्त।
3 मिनु याबेश सहर ङा खाल्पापुकीमी “इस्राएली नेल्ल आन कली नेंपाइक्चा कली आंइ कली ७ नाक्त सम्म रिम्दीन। मिनु नोले आंइ कली सुइमी प्रोंइने मचाप्तेक्म हना, गो इन जिम्मा गेंसीनीकी” देंमा बाक्त।
4 मिनु लोव़ कुरबपुकी सावल आ बाक्तीक गिबा जाक्मा बाक्त। मिनु मुर आन ङोंइती मेको लोव़ शेंदमे बाक्त। मिनु मुर नेल्ले ठेयब सेंदा पा ङाक्मा बाक्त।
5 मेना सावल रू रे पा ब्यफ खुल्शा जाक्ना जाक्न बाक्माक्त। मिनु मेकोमी “मुरपुकी मारदे ठेयब सेंदा पा ङाक्मा” दे हिल्लो पामी बाक्त। मिनु याबेश-गिलाद ङा मुरपुकीमी देंशो लोव़ मेको कली शेंदमे बाक्त।
6 मिनु सावलम मेको लोव़ नेनानु, परमप्रभु आ सोक्तीम मेको कली सुमा बाक्त। मिनु सावल थाम्पा गाइक्ता बाक्त। न्यायाधीस १३:२५
7 मिनु मोपा गाइश्शा, हाल का ब्यफ टुक्रा टुक्रा पा चेक्गा बाक्त। मिनु मुर आन कली मेको टुक्रा कुरपाइश्शा इस्राएल रागी नेल्लेमी “सु मुर लडाइ पथ सावल नु सामुएल आस नोले मखोइक्नीमी, मेको आन ब्यफ यो ओदेंशो टुक्रा टुक्रान दुम्नीम देनीन” दे सोइक्तीमी बाक्त। परमप्रभु यावेमी मुर आन कली शुश हिंपाइश्शो बाक्माक्त। मोपतीके मेकोपुकी थुं का दुम्शा, सावल नु सामुएल आस नोले खोदमे बाक्त। न्यायाधीस १९:२९
8 मिनु सावलम मेको आन कली बेसेकम लडाइ पचा कली ठीक पामी बाक्त। मेकेर इस्राएल ङा लाख सां नु यहूदा ङा ३० हजार मुर दुम्मा बाक्त।
9 मिनु मेको ङोंइती लोव़ चाक्ब मुर आन कली “याबेश-गिलाद ङा मुर आन कली ‘गे दीसा नाक्त उइक्थ दुम्मेनु, ब्रोंइचा ताइनीनी’ दे मतीन” देंमाक्त। मिनु मेकोपुकीमी याबेश ङा मुर आन कली मेको लोव़ शेंदमे बाक्त। मिनु मेको नेंशा, शुश ग्येरसमा बाक्त।
10 मिनु याबेश ङा मुरपुकीमी अम्मोनी आन कली “गो दीसा इन बाक्तीक जाक्नीकी। मिनु गे मार पचा दाक्नीनी, मेको पने” देंमा बाक्त।
11 मिनु आ दीसा सावलमी आ मुर आन कली हुल सां सेल्मी बाक्त। सुनी कना रिम्शो पा हाम्सो मदुम्थु, मेको आन जोरी सत्रु आन बाक्तीके ओव़शा, नाक्ती उइक्थ दुम सम्म लडाइ पा अम्मोनी आन कली फ्रूमे बाक्त। मोपा मुरपुकी निक्शी सम्म काथा मदुम्चा ङा पा ब्राशा प्रोक्मा बाक्त।
12 मिनु मुरपुकीम सामुएल कली “ ‘सावलम आंइ कली सासन पने चाप्बा ङा?’ देंब सु बाक्मा? मेको आन कली साइक्चा कली आंइ गुइम गेने” देंमा बाक्त। १सामुएल १०:२७
13 तन्न सावलमी “ममाइ, मुलाक्ती परमप्रभु यावेमी इस्राएली इं कली ग्रापदा नाक्त सुइ साइक्चा मदुम्ब” देंमाक्त। १सामुएल १४:४५
14 मिनु सामुएलम मुर आन कली “गो गिल्गालम लशा, एको राज्य कली लेंशा सेल्य” देंमाक्त। १सामुएल १०:८
15 मोपतीके मेको नेल्ल गिल्गालम लशा, परमप्रभु यावे आ ङोंइती सावल कली पिप सेल्मे बाक्त। मिनु परमप्रभु यावे आ ङोंइती दुशा बाक्चा आ पर्बम चढ़ेतीक चढ़ेमे बाक्त। मिनु सावल नु इस्राएली नेल्ले शुश ग्येरसमा बाक्त।