Psalm 47 in Maale
1 ፆኦሲ ዓጮኮ ቢያ ካኣቲ ማዔሢ ዴሬዮቴ ቢያ ኩጮ ዒንሢኮ ባዑዋቴ! ዑኡዞዋ ዒንሢኮ ዼጊዲ ፆኦሲም ዒላሹዋቴ!
2 ዓጮ ቢያይዳ ዼኤፒ ማዔ ካኣታሢ ዼኤፒ ማዔ ናንጊና ናንጋ ጎዳ ዒጊቻያኬ።
3 ዒዚ ዴሮ ኑ ቢታንቶ ዴማ ማሄኔ፤ ካኣታ ኑ ዴማ ማዒ ዎርቃንዳጉዲ ማዼኔ።
4 ዒዚ ናሽካ ያይቆኦቤም ቦንቾ ማዔ ኑኡኮ ዴኔሎዋ ዒዚ ኑም ዶኦሬኔ።
5 ዓሳ ዒላሻኣና፥ ዛያሢያኣ ዋርቃኣና ፆኦሲ ፔ ካኣቱሞ ዖይቶ ቤዞ ናንጊና ናንጋ ጎዳ ሌካ ዒ ዴዓ ቤዞ ኬስኬኔ።
6 ዓይናዹዋቴ፥ ኑ ፆኦዛሢም ዓይናዹዋቴ! ዓይናዹዋቴ፥ ኑ ካኣቲም ዓይናዹዋቴ!
7 ኑ ፆኦዛሢ ዓጮ ቢያኮ ካኣቲኬ፤ ዬያሮ ጋላታ ዓይኑሞ ዒዛም ዓይናዹዋቴ!
8 ፆኦሲ ፔኤኮ ዱማዼ ካኣቱሞ ዖይታ ዴዔኔ፤ ዓጮ ዴሮዋ ዎይሣሢ ዒዛኬ።
9 ዓብራሃሜ ፆኦዛሢ ዴሮና ዎላ ዓጮ ዴሮኮ ሱኡጋ ቡኪንቴኔ፤ ዓጮ ካኣታኣ ዒዛሮኬ፤ ዒዚያ ኮሺ ዼግ ዼጊ ጌዔያኬ።