Isaiah 42 in Maale
1 ናንጊና ናንጋ ጎዳ ሂዚ ጋዓኔ፦ «ታኣኒ ማኣዳሢና ዶኦሬሢ ዒዚ ታና ዎዛሳ ታኣኮ ዓይላሢ ሃያኬ፤ ታኣኮ ዓያኖ ዒዛይዳ ታ ናንጊሻንዳኔ፤ ዒዚ ዴሮም ቢያ ፒዜ ዎጌ ዻዋንዳኔ።
2 ዒዚ ዒላቲ ኬኤዛዓኬ፤ ፔኤኮ ዑኡዞዋ ዞኦዜይዳ ዋይዚሳዓኬ።
3 ሃይቂ ጳሬ ፒሎዋ ዒዚ ሜንሣዓኬ፤ ሃይቃኒ ዑኬ ፆንፖዋ ዎዻዓኬ፤ ጉሙርቂንቲሢና ፒዜ ዎጌ ዒዚ ዻዋንዳኔ።
4 ሳዖይዳ ፒዜ ዎጌ ዎጊንታንዳጉዲ ማሃንዳያ ሄላንዳኣና ዒ ላባዓኬ፥ ሃጊ ማዓ ዎዛኣ ቲቃዓኬ፤ ሜሌ ዴራ ዒዛኮ ዔርዚፆ ዋይዛኒ ጶቂሣኔ።»
5 ጫሪንጮ ማዤሢና ሳዖኮ ጋፓፓ ጋፖ ሄላንዳኣና ዔቂሴሢ፤ ሳዖና ዒዞይዳ ናንጋ ባኮ ቢያ ኮሼሢ ሼምፔና ዑኡሲና ዔያቶም ዒንጌሢ ናንጊና ናንጋ ጎዳ ሂዚ ጋዓኔ፦
6 «ታኣኒ ናንጊና ናንጋ ጎዳ ፂሉሞና ኔና ዔኤሌኔ፤ ታ ኔኤኮ ኩጮ ዓርቂ ካፔኔ፤ ታኣኮ ዒጊኖም ጫኣቁሞጉዴያ ሜሌ ዴሮም ታ ኔና ፖዒ ማሄኔ።
7 ዬያሮ ዓኣፓ ባይቄ ዓሶኮ ዓኣፖ ኔ ፖዒሳንዳኔ፤ ዹሞ ዔቶ ቱኡዞ ማኣራ ዓኣ ቱኡቴ ዓሶ ኔ ኬሳንዳኔ።»
8 «ሱንፃ ታኣኮ ናንጊና ናንጋ ጎዳኬ፤ ታኣኮ ቦንቾ ታኣና ጊሽታያ ሜሌ ፆኦሲ ባኣሴ፤ ሜሌ ፆኦዛ ታኣኮ ጋላቶ ታኣና ዎላ ጊሽታንዳጉዲ ታ ኮዑዋሴ።
9 ዓካሪ ታኣኒ ቤርታዺ ዒንሢም ኬኤዜ ባካ ቢያ ማዺንቲ ኩሜኔ፤ ሃሢ ጋዓንቴ ሴካ ቤርቲም ማዓንዳ ዓኮ ባኮ ዛሎ ማዺንቲ ኩማንዳሢኮ ቤርታዺ ታ ኬኤዛኔ።»
10 ናንጊና ናንጋ ጎዳ ቦንቾም ማዓ ዓኪ ዓይኑሞ ዓይናዹዋቴ! ዓጮ ዴራ ቢያ ጋላታ ዓይኑሞ ዒዛም ሺኢሹዋቴ! ባዞ ሳዛ ናንጋ ዓሳ ቢያ ዓጮኮ ጋፖይዳ ናንጋ ዓሳኣ ቢያ ዒዛ ጋላቶንጎ!
11 ዳውሎና ዳውላዻ ቤዞናይዳ ዓኣ ካታማ ዬያጉዲ ሃሣ ቄዳኣሬ ዴራ ናንጋ ጉርዳ ዑኡዞ ፔኤኮ ዼጊዶንጎ፤ ሴኤላ ካታማ ናንጋ ዓሳ ዎዛና ዓይናዾንጎ፤ ዹኮ ቶኦካ ዔቂ ሂላሾንጎ።
12 ዔያታ ናንጊና ናንጋ ጎዳ ቦንቾንጎ፤ ጋላቶ ዒዛሲ ዋኣፆ ሳዞይዳ ዓኣ ዓጮም ዋይዚሶንጎ።
13 ናንጊና ዖልዚና ዔርቴ ፖኦሊሴጉዲ ኬስካኔ፤ ዖላ ዓሲጉዲ ጫርቂ ዔቃኔ፥ ሶራይቲያ ሶራይታኔ፤ ፔኤኮ ሞርኮዋ ባሻኔ።
14 «ናንጊና ናንጋ ጎዳ ሂዚ ጋዓኔ፦ ዖዶሲ ዎዴ ታኣኒ ጊቢ ዴዔኔ፤ ዚቲዮ ጌዒ ታና ታኣኒ ዓርቄኔ፤ ሃሢ ጋዓንቴ ሾይሢ ዓርቄ ላኣሊጉዲ ታ ዒላታኔ፤ ዑኡዞ ታ ሆኦሚንቲ ዔካኔ።
15 ዹኮንታ ጌሜሮንታ ታኣኒ ዶይሳንዳኔ፤ ዬያቶይዳ ባቃሌ ባኮ ቢያ ታኣኒ ሜልዛንዳኔ፤ ዎሮ ዋኣፆ ባዚ ሳዛ ዓኣ ሳዓ ማሃንዳኔ፤ ቦቆሎ ዋኣፆዋ ታኣኒ ሚጪሳንዳኔ።»
16 «ዓኣፖ ባይቄ ዓሶ ዓኣዺ ቤቂባኣ ጎይሢና ታ ዔኪ ዓኣዻንዳኔ፤ ቤርታ ዔያቶኮ ጎኦቢንቴ ዹሞዋ ታ ፖዒሳንዳኔ፤ ጌሊ ኬስኪ ጌዔ ቤዞ ታኣኒ ጊኢጊሻንዳኔ፤ ዬይ ታኣኒ ማዺ ኩንሣንዳ ባኮኬ፤ ታኣኒ ዔያቶም ዬያይዱዋዖ ሃሻዓኬ።
17 ሜሌ ፆኦዞ ጉሙርቃዞንሢ ዔያቶኮ ማላቶዋ ‹ዒንሢ ኑ ፆኦዞኬ› ጋዓዞንሢ ጋፒ ቦርሲንታንዳኔ።»
18 «ዒንሢ ዋዮ ባይቄ ዓሳ ዋይዙዋቴ! ዒንሢ ዓኣፓ ባይቄ ዓሳኣ ጊዥ ጌዒ ዛጉዋቴ!
19 ታ ዓይላሢዳፓ ዓታዛ ዓኣፒ ባይቄይ ዖናዳይ? ታኣኮ ኪኢቶ ናዓሢዳፓ ዓታዛ ዋይዚ ባይቄይ ዖናዳይ? ፔና ታኣም ጉሙርቂንታያ ማሄ ዓሢጉዲ ዓኣፒ ባይቄይ ዖናዳይ? ፆኦሲ ዓይላሢጉዲ ዓኣፒ ባይቄያ ማዔይ ዖናዳይ?
20 ዒስራዔኤሌ ዓሲዮቴ! ሚርጌ ባኣዚ ዒንሢ ዛጌኔ፤ ጋዓንቴ ዒናፓ ማሊ ዒንሢ ጶቂሢባኣሴ፤ ዋያ ዒንሢኮ ቡሊሢኬ፥ ጋዓንቴ ዒንሢ ዋይዙዋሴ።»
21 ናንጊና ናንጋ ጎዳ ፔ ፂሉሞሮ ጌዒ ፔኤኮ ዎጎ ዼኤፒ፥ ሃሣ ቦንቺንታያ ማሃኒ ኮዔኔ።
22 ሃይ ዴራ ጋዓንቴ ዎልቄና ቡሪንቴያኬ፤ ዴኔ ዔቴ ጋርሲ ጌልዚ ዔያቶ ዑፃ ካራ ዎዾናያኬ፤ ቱኡሲ ማርካ ዔያቶ ዓኣቾናኔ፤ ዎልቄና ዔያቶ ቡሮናኔ፤ ዖኦኒያ ዔያቶ ዓውሳኒ ዳንዳዒባኣሴ።
23 ዒንሢ ባኣካፓ ዬያ ባኮ ዛሎ ቶኦኪ ኬሲ ሙካ ዎዶም ዛጊ ዒናፓ ዋይዛይ ዖናዳይ?
24 ያይቆኦቤ ቡሪንታንዳጉዲ ዒስራዔኤሌያ ዲዒንቲ ዔውታንዳጉዲ ዓኣሢ ዒንጌሢ ዖናዳይ? ዬያ ማዼሢ ናንጊና ናንጋ ጎዳቱዋዓዳ? ዬይ ማዺንቴሢ ኑኡኒ ዒዛም ዋይዞ ዒፄሢሮ ዒዚ ናሽካ ጎይፆዋ ኑ ዓኣዺባኣሢሮ ዒዛኮ ዎጎዋ ዓይሢንቲ ኑ ካፒባኣሢሮኬ።
25 ዬያሮ ዒዛኮ ዔኤታ ዻጎንታ ዒጊቻ ዖሎዋ ኑኡም ዒ ዳኬኔ፤ ዓጮ ኑኡኮ ሺርሺ ታሚ ዓጌኔ፤ ኑኡኒ ጋዓንቴ ዬያ ቢያ ዔሪባኣሴ፤ ኑና ሚቼኔ፥ ጋዓንቴ ዒና ኑ ዔኪባኣሴ።