Isaiah 41 in Maale
1 ፆኦሲ ሂዚ ጋዓኔ፦ «ዒንሢ ዋኣፆ ሳዞ ዓጫ ናንጋ ዴራ! ዚቲ ጌዒጋፓ ዋይዙዋቴ! ዴራ ዎልቆ ፔኤሲ ጊንሣ ዶዲሺ፥ ሃኒ ሙኪያ ኬኤዞንጎ፤ ዎጎ ቤዛ ዎላ ኑ ካኣሞም።»
2 «ዎልቆሲ ዓባ ኬስካ ባንፃፓ ዔቂሲ ዔኪ ሙኬሢ ዒዛም ማዻንዳጉዲ ዔኤሌሢ ዖናዳይ? ዴሮ ዓኣሢ ዒዛም ዒንጌኔ፤ ካኣቶዋ ዒዛ ዴማ ዎርቃንዳጉዲ ማሄኔ፤ ዒዛኮ ጬንቾ ዓፓሮም ዔያቶ ዒ ሲላሊ ማሂ ሂኢዦማኣ ዲልባ ማሂ ዓኣሢ ዒንጌኔ።
3 ዬያኮ ቤርታ ፔ ቶኦኪና ዔያታ ዓኣዺ ቤቂባኣ ጎይሢና ዔያቶ ዒ ዳውሴኔ፥ ፔቴታዖ ዒዛ ቃዜ ባኣዚ ባኣሴ።
4 ዬይ ማዓንዳጉዲ ዓይሤሢ ዖናዳይ? ዓይፃፓ ዓርቃዖ ዓሲኮ ሾይንቶ ፓይዲ ዔራሢ ዖናዳይ? ታኣኒ ናንጊና ናንጋ ጎዳ ቤርታኣፓ ዓኣኔ፤ ጋፖይዳ ጴዻሢያ ታናኬ።»
5 «ዋኣፆ ሳዛ ዓኣ ዓጮይዳ ናንጋ ዴራ ታኣኒ ማዼ ባኮ ቢያ ዛጌኔ፤ ዬያሮ ሚርጌና ዔያታ ዲቃቲ ጎጋይቄኔ፤ ፔቱሞና ቡኪ ታ ባንሢ ዔያታ ሙኬኔ።
6 ፔቴሢ ባጋሢ ማኣዳኔ፤ ጌርሲ ፔ ጌርሲ፦ ‹ሃይ ኔ ዎይታይ ዶዴ!› ጋዓኔ።
7 ሃኣማሢ ዎርቆ ሼኤሻሢ ዶዲሻኔ፤ ሜሌ ፆኦዞ ሞቶሾና ዹይ ጊኢጊሻሢያ ሚስማሮና ጳርቃሢም፦ ‹ሃይ ኔ ዎይታይ ዶዴ! ኔ ቃራ ዺሽኪ ዓይሤኔ!› ጋዓኔ፤ ሜሌ ፆኦዞ ዓጊፁዋጉዲ ሚስማሮና ዔያታ ጳርቃኔ።»
8 «ጋዓንቴ ኔኤኒ ታ ዓይላሦ ዒስራዔኤሌ! ታ ኔና ዶኦሬሦ ያይቆኦቤ! ታ ላጋሢ ዓቢራሃሜ ዜርፃሢዮ!
9 ሳዓ ማዔ ካራፓ ታ ኔና ዔኪ ሙኬኔ፤ ዓጮኮ ጋፓፓ ታኣኒ ኔና ዔኤሌኔ፤ ‹ኔ ታ ዓይሌኬ› ጌዒ ታ ኔና ዶዶኦሬኔ፤ ታኣኒ ኔና ኬኤሪባኣሴ።
10 ታኣኒ ኔኤና ዎላታሢሮ ዒጊጪፖ! ታ ኔኤኮ ፆኦዛሢኬ፥ ሃጊ ማዓ ዎዛ ቲቂፖ! ታኣኒ ኔና ዶዲሻንዳኔ፥ ማኣዳንዳኔ፤ ታኣኮ ዶዶ ኩጮና ታ ኔና ዓርቃንዳኔ።
11 ኔ ዑፃ ዻጋዻ ዓሳ ቢያ ባሺንቲ ቦርሲንታንዳኔ፤ ኔና ሜታሳኒ ዔቃዞንሢያ ቤሲ ባይቃንዳኔ።
12 ሞርኮ ኔኤኮ ኔ ኮዓንዳኔ፤ ጋዓንቴ ኔኤኒ ዔያቶ ዴንቃዓኬ፤ ኔ ዑፃ ዖሎ ቡሌዞንሢ ጋፒ ባይቃንዳኔ።
13 ‹ሃይ ኔኤኒ ዎይታይ፥ ዲቃቲፖ፤ ኔኤኮ ሚዛቆ ኩጮ ዓርቂ ታ ኔና ማኣዳንዳኔ› ጌዒ ኔና ዶዲሻሢ፥ ታና ኔኤኮ ናንጊና ናንጋ ጎዳ ማዔ ፆኦዛሢኬ።»
14 ናንጊና ናንጋ ጎዳ፦ «ኔኤኒ ዛኣሌጉዲ ማዔሦ ያይቆኦቤ! ላኣፓ ማዔሦ ዒስራዔኤሌ! ዒጊጪፖ ታ ኔና ማኣዳንዳኔ፤ ኔና ዓውሳ ዒስራዔኤሌኮ ዱማዼሢ ታናኬ» ጋዓኔ።
15 ዓኪ፥ ዓጬ ማዔ ቶኪ ዓኣ ሃኣኮ ሺርካ ዓንጎጉዲ ታ ኔና ማሃንዳኔ፤ ዹኮ ቢያ ኔኤኒ ሺርኪ ባይዛንዳኔ፤ ጌሜሮዋ ሄርቂ ዳኣፂ ሲላሊ ኔ ማሃንዳኔ።
16 ኔኤኒ ዔያቶ ፒዺሳንዳኔ፤ ዢባራኣ ፒፂ ዔያቶ ዔኪ ዓኣዻንዳኔ፤ ዓልጋሢ ዢባራ ዔያቶ ላኣላንዳኔ፤ ኔኤኒ ጋዓንቴ ናንጊና ናንጋ ጎዳና ዎዛዻንዳኔ፤ ዒስራዔኤሌኮ ዱማዼሢ፥ ታና ጉሙርቂ ኔ ዖቶርቃንዳኔ።
17 «ማንቆንታ ሜታዼ ዓሶንታ ዋኣሢ ኮዓንዳኔ፥ ጋዓንቴ ዴንቃዓኬ፤ ቆርጫ ዔያቶኮ ዼኤቦና ፃኣዼኔ፤ ታኣኒ ናንጊና ናንጋ ጎዳ ሺኢጲፆ ዔያቶሲ ዋይዛንዳኔ፤ ታኣኒ ዒስራዔኤሌኮ ፆኦዛሢ ፔቴታዖ ዔያቶ ሃሻዓኬ።
18 ቦኦሬ ጌሜሮይዳፓ ዎርዚ ታ ዎይሳንዳኔ፤ ዶኦጫዻ ጊንፆይዳ ዋኣሢ ታ ዑራንዳኔ፤ ዳውላዻ ዓጫ ቦቆሊ ታ ዴይሣንዳኔ፤ ሳዖ ሜላ ዋኣሢ ዓልቃያ ማዓንዳኔ።
19 ሊባኖኦሴ ሚፆንታ ሻሮንታ ባርሴኔቴ ጌይንታ ሚፆንታ ዛይቶ ሪሚቶንታ ዳውሎይዳ ታ ባቃልሳንዳኔ፤ ዓሲ ናንጉዋ ዳውላ ዴኤሎ ዚቢቆንታ ዓስታ ጌይንታ ሚፆንታ ሪሚቲንታ ዱማ ዱማ ሚሢ ኩሜ ዴኤሊ ታ ኬሳንዳኔ።
20 ዬያ ታኣኒ ማዻንዳሢ ታና ናንጊና ናንጋ ጎዳኮ ኩጫ ማዼያ ማዒፆ ታኣኒ ዒስራዔኤሌኮ ዱማዼሢ ዬያ ማዤያ ማዒፆ ቢያሢ ዛጊ ዔራንዳጉዲና ማሊ ጶቂሣንዳጉዲኬ።»
21 ናንጊና ናንጋ ጎዳ ሂዚ ጋዓኔ፦ «ዒንሢኮ ጌኤዞ ሂንዳ ሺኢሹዋቴ፤ ማርኮዋ ዒንሢኮ ዔኪ ሙኩዋቴ ጋዓኔ፥ ያይቆኦቤ ካኣቲ።
22 ዒንሢኮ ሜሌ ፆኦዞዋ ዔኪ ሙኪ ማዺንቲ ኩማንዳ ዎዶ ኑ ዔራንዳጉዲ ሴካ ቤርቲም ማዓንዳ ባኮ ቢያ ሂንዳ ኑኡም ዔያታ ኬኤዞንጎ፤ ሃጊ ማዓንዳ ባካ ዓይጎታቴያ ማሊ ኑ ጶቂሣንዳጉዲ ሚና ቤርታኣ ባካ ዎማዺታቴያ ኑኡም ዔያታ ኬኤዞንጎ።
23 ዒንሢ ሜሌ ፆኦዞ ማዔሢ ኑ ዔራንዳጉዲ ሴካ ቤርቲም ማዓንዳ ባኮ ቢያ ሂንዳ ኑኡም ኬኤዙዋቴ፤ ኑ ዲቃቲ ፔቱሞና ዒንሢ ዛጋንዳጉዲ ኮሺ ማዔቴያ ፑርታ ባኣዚ ሂንዳ ማዹዋቴ።
24 ሃይሾ ዒንሢ ዔኤቢዳ ፓይዲንቱዋያኬ፤ ማዻኣ ዒንሢኮ ዔኤቢ ፓሡዋያኬ፤ ዒንሢ ዶኦሬ ዓሳኣ ሻኣካያኬ።»
25 «ታኣኒ ፔቴ ሱኡጌ ኬዶ ባንፃፓ ዔቂሴም ሃይሾ ሙኬኔ፤ ዒዚ ታ ሱንፆ ቦንቻያ ማዒ ዓባ ኬስካ ባንፃፓ ሙካያኬ። ማኒ ዢኢጮ ዓጮ ቶርጳሢ ሄርቃሢጉዲ ዒዚያ ሱኡጎ ቢያ ሄርቃንዳኔ።
26 ኑኡኒ ዒዛ ዔራንዳጉዲና ዒዚ ፒዜኬ ጋዓንዳጉዲ ቤርታኣፓ ዓርቃዖ ዬያ ኬኤዜሢ ዖናዳይ? ዬያ ባኮ ዛሎ ሃኣዺኬ ጌዒ ኬኤዜያ፥ ዒላቴያ ዒንሢዳፓ ፔቴ ዑኡሲታዖ ኬሴይ ባኣሴ።
27 ቤርታዺ ሃያ ሃይሶ ፂዮኔም ፔጋሲ ኬኤዜሢ ታናኬ፤ ዬሩሳላሜማኣ ኮዦ ሃይሶ ኬኤዛሢ ዳኬሢያ ታናኬ።
28 ሺሪ ታኣኒ ዛጌ ዎዶና ዖኦኒያ ባኣሴ፤ ሜሌ ፆኦዞይዳፓ ዞሮ ዒንጋያ ባኣሴ፤ ታኣኒ ዖኦጫዛ ማሂ ኬኤዛያ ባኣሴ።
29 ዬያሮ ሃይ፥ ሜሌ ፆኦዛ ቢያ ጉሪኬ፤ ፔቴ ባኣዚታዖ ማዻኒ ዔያታ ዳንዳዑዋሴ፤ ዔያቶ ማሊሲ ማዦና ባካ ጉሪ ዢባሬኬ።»