Isaiah 40 in Maale

1 ኑ ፆኦዛሢ ሂዚ ጋዓኔ፦ «ዴሮ ታኣኮ ዶዲሹዋቴ! ዶዲሹዋቴ!

2 ዓይሌ ማዒ ዒዞኮ ማዾ ዎዳ ጋፔኔ፤ ዒዞኮ ጎሞ ዛሎሮ ቢያ ፆኦሲዳፓ ጳንጬ ሜቶ ዒዛ ዔኬሢንታ ጎማኣ ዒዞኮ ዓቶም ጌይንቴሢ ዬሩሳላሜም ሌፔ ዑኡሲና ኬኤዙዋቴ።»

3 ሂዚ ጋዓ ዑኡሲ ዋይዚንታኔ፦ «ዓሲ ናንጉዋ ዳውሎይዳ ናንጊና ናንጋ ጎዳኮ ጎይፆ ጊኢጊሹዋቴ! ዳውሎይዳ ኑ ፆኦዛሢም ጎይፆ ጲሺ ኮሹዋቴ!

4 ዔታዻ ቤዞና ዶኦጫዻ ቤዛ ኩሚ ጊኢጎንጎ፤ ዹኮንታ ጌሜሮንታ ቢያ ሂርኪዲ ባኣሲንቶንጎ፤ ጌሜሮንታ ጌሊ ኬስኪ ጌዔ ሳዓኣ ቢያ ጊኢጎንጎ።

5 ዬኖ ዎዶና ናንጊና ናንጋ ጎዳኮ ቦንቻ ፔጋዺ ጴዻንዳኔ፤ ናንጊና ናንጋ ጎዳ ዬያ ኬኤዜያ ማዔሢሮ ዓሳ ቢያ ዬያ ፔቱሞና ዛጋንዳኔ።»

6 ፔቴ ዑኡሲ ታና «ዒላቴ!» ጌዔኔ፤ ታኣኒያ ማሃዖ፦ «ዎዚ ጌዒ ታ ዒላቶንዶይ!» ጌዒ ዖኦጬኔ፤ ዬና ዑኡዜላ «ዓሲ ቢያ ማኣቲጉዲኬ፤ ቦንቻኣ ቢያ ካይዚ ቡኒጉዲኬ፤

7 ናንጊና ናንጋ ጎዳኮ ዢባራ ዢባርሻ ዎዶና ማኣታ ሜላሢና ቡና ዲኢናሢጉዲ ዓሲያ ዬያጉዴያኬ።

8 ጎኔና ማኣታ ሜላኔ፥ ቡናኣ ዲኢናኔ፤ ናንጊና ናንጋ ጎዳሢኮ ቃኣላ ጋዓንቴ ናንጊና ዶዲ ናንጋኔ።»

9 ዒንሢ ፂዮኔም ኮዦ ባኮ ኬኤዛ ዓሳ! ሌካ ዼጌ ዹኮ ኬስኩዋቴ! ዒንሢ ዬሩሳላሜም ኮዦ ሃይሶ ኬኤዛ ዓሳ! ዑኡዞ ዒንሢኮ ዼጊዲ ዒላቱዋቴ! ዒላቱዋቴ ዒጊጪፖቴ! ዪሁዳ ካታሞም፦ «ፆኦዛሢ ዒንሢኮ ሃይሾ!» ጎዑዋቴ።

10 ናንጊና ናንጋ ጎዳ ፔኤኮ ዼኤፖ ዎልቆና ዎይሣኒ ሙካንዳኔ፤ ዒዚ ሙካሢ ዒንጋኒ ማሌ ባኮንታ ማዼሢ ዛሎ ጪጎንዶሢያ ዔኪኬ።

11 ቆልሞ ሄንቃ ዓሲጉዲ ዒዚ ሄንቃንዳኔ፤ ላኣቆ ማራናኣቶ ፔቴይዳ ዒ ቡኩሳንዳኔ፤ ፔኤኮ ቃሶይዳ ኮንቂ ዔያቶ ዔካንዳኔ፤ ናኣቶ ዻንሢሣዞንሢያ ጉኡዱዋዖ ታሢ ዒሻንዳኔ።

12 ዼኤፖ ባዞ ዋኣፆ ፔኤኮ ቃኣቆ ጋራ ጫሪንጮዋ ፔ ኬኤላና ሳዖ ዓጮ ማኪ ዔራኒ ዳንዳዓሢ ዖናዳይ? ዹኮንታ ጌሜሮንታ ዴኤሡሞ ዔሮ ባኮና ዛጊ ዔራንዳሢ ዖናዳይ?

13 ናንጊና ናንጋ ጎዳ፦ «ሂዲ ማዼ» ጌዒ ዓይሣሢ ዖናዳይ? ዒዛ ዔርዛኒና ዞራኒያ ዳንዳዓያ ዖናዳይ?

14 ዒዛም ኬኤዛንዳጉዲ ፆኦሲ ዖኦና ዞርቴይ? ፒዜ ዎጎ ዔርዜሢ ዒዛ ዖናዳይ? ዔራቶ ዒዛ ዔርዜሢንታ ማሊ ጶቂሦ ጎይፆዋ ዖ ዒዛ ዻዌይ?

15 ናንጊና ናንጋ ጎዳኮ ቤርታ ዴራ ፔቴ ዖቲ ጋርካ ፆዼ ዋኣሢጉዲኬ፤ ዴኤሡሞ ዔሮ ባኮይዳ ዓኣ ሲላሊጉዲ ፓይዲንታኔ፤ ዋኣፆ ሳዛ ዓኣ ሳዓኣ ዒዛ ቤርታ ዓዳ ሲላሊ ሊኢቃጉዲ ሼሌዓያኬ።

16 ሊባኖኦሴይዳ ዓኣ ሚፃ ሚቺ ዒንጎ ዒንጊፆ ታሞ ዔኤሣኒ ቆልማኣ ዒዞኮ ሚቺ ዒንጎ ዒንጊፆም ጊዳያቱዋሴ።

17 ፆኦሲ ቤርታ ዴሮኮ ፓይዳ ባኣያኬ፤ ላኣፒፃፓ ዔቄያና ፓይዲዳ ጌሉዋያኬ።

18 ፆኦሲ ዒንሢ ዖኦና ዎላ ቤኤዛይ? ዖኦና ዎላ ዒንሢ ዒዛ ሄካሳይ?

19 ሜሌ ፆኦዞ ሃኣሚ ቆኦቂ ኮሻኔ፤ ዎርቆ ኮሻሢያ ጳርቂ ጊኢጊሻኔ፤ ቢሮ ዓንጎዋ ካኒ ቢራታ ኮሺ ማይሳኔ።

20 ዔኤቢባኣ ማንቃሢ ኮሳዹዋ ሚሢ ዶኦራኔ፤ ዶዑዋ ማላታ ዒዛም ኮሺንታንዳጉዲ ዔርቴ ሃኣሚ ዓሲ ዒ ኮዓኔ።

21 ፔቴታዖ ዬያ ዔሩዋዓዳ? ዒንሢ ዋይዚባኣዓዳ? ሚናኣፓ ዓርቃዖ ዒንሢም ኬኤዚንቲባኣዳ? ሳዓ ማዢንቴማኣፓ ዓርቃዖ ማሊ ዒንሢ ጶቂሡዋዓዳ?

22 ሳዓ ማዔ ካሮይዳ ፆኦሲ ፔ ሻኣሎ ጌሢ ዴዔሢ ጫሪንጮ ዓዳ ጎኦቦ ዓፒላጉዲ ዳሬሢ ዓፒላፓ ኮሾ ናንጎ ማኣሮጉዲ ዾቄሢ ዓጮ ዴራ ፃቆጉዲ ዻካ ማዔሢያ ዔሩዋዓዳ ዒንሢ?

23 ዒዚ ዼኤፖ ዓሶ ዻውሲሳኔ፤ ሃያ ዓጮ ሱኡጎ ባኣያ ማሃኔ።

24 ዔያታ ሃጊ ባቃሌያና ፃጲ ዳኪባኣ ባቃሊጉዲኬ፤ ናንጊና ናንጋ ጎዳ ዢባሮ ፔኤኮ ዳካዛ ቤዞና ዔያታ ሜላኔ፤ ዲልባጉዲ ላኣሊንቲያ ዔያታ ባይቃኔ።

25 «ሂዳዖ ታና ዒንሢ ዖኦና ዎላ ቤኤዛይ? ዖኦና ዎላ ዒንሢ ታና ሄካሳይ?» ጋዓኔ ዱማዼ ፆኦዛሢ።

26 ዼጊ ጌዒ ጫሪንጮ ሌካ ዛጉዋቴ፤ ዒንሢ ዛጋ ዦኦጋሢ ማዤሢ ዖናዳይ? ዒዚ ዖልዚ ዖላ ዓሲጉዲ ዔያቶ ዔኪ ዓኣዻኔ፤ ዎማዼታቴያ ፓይዶ ዔያቶኮ ዒዚ ዔራኔ፤ ፔቴ ፔቴሢ ፔ ሱንሢና ዔያቶ ዔኤላኔ፤ ዒዛኮ ቢታንቶንታ ዎልቆንታ ሚርጌና ዼኤፒኬ፤ ዬያሮ ዔያቶይዳፓ ፔቴታዖ ባይቃዓኬ።

27 ያይቆኦቤ፥ ዓይጋ ኔ ሃያ ጋዓይ? ዒስራዔኤሌ፥ ዓይጋ ኔ ሂዚ ጌዒ ጌስታይ? «ጎይፃ ታኣሲ ፆኦሲ ዓኣፓፓ ዓኣሺንቴኔ፤ ናንጊና ናንጋ ጎዳ ታኣም ዎጋንዳሢያ ሃሼኔ» ዓይጋ ኔ ጋዓይ?

28 ፔቴታዖ ኔኤኒ ዔሩዋዓዳ? ዋይዚያ ኔኤኒ ዋይዚባኣዓዳ? ፆኦሲ ናንጊና ናንጋ ጎዳኬ፤ ዓጮ ቢያ ማዤሢ ዒዛኬ፤ ዒዚ ፔቴታዖ ላቢንቱዋሴ፥ ማሊፆዋ ፔኤኮ ሺርሹዋሴ።

29 ላቤዞንሢም ዒዚ ዶዱሞ ዒንጋኔ፤ ዎልቃ ኬዴዞንሢማኣ ዎልቄ ቃሳኔ።

30 ጶሾራ ላላባኔ፥ ዎልቄባኣያ ማማዓኔ፤ ዼጌሢያ ባሺንቲ ሎሎኦማኔ።

31 ናንጊና ናንጋ ጎዳ ጉሙርቂ ናንጋዞንሢኮ ጋዓንቴ ዎልቃ ጊንሣ ዶዳንዳኔ፤ ዓዳ ኮኦኬጉዲ ጋኣሲና ባራናንዳኔ፤ ጳሽኪያ ጳሽካንዳኔ፥ ላቢንዱዋሴ፤ ሃንታንዳኔ፥ ላቢንቲ ዔያታ ሎኦማዓኬ።