Isaiah 58 in Boko

1 Wii lɛ́ gbã́ugbãu, ńsu ǹ nzĩa kṹkũo. Ǹ n lↄↄ fɛlɛ musu lán kuu'ↄwa. Ma gbɛ̃́ↄ tàae kpàwakɛnɛ́, Yakↄbu buipiↄ duunaↄ onɛ́.

2 Aaìↄ ma kĩ́i wɛɛlɛ lá gu lɛ́ dↄ, an mɛ̀sa ì wã ma yãkɛaↄ dↄ̃ai lán bui pↄ́ ì yãkɛ a zɛ́wa ìli pãkpa a Lua yãdilɛaↄziowa. Aaì yã́gↄ̃gↄ̃a a zɛ́wa gbɛaa, aaìↄ ye mà sↄ̃ńzi.

3 Ɔ̃ aaì ma la: Bↄ́yãi wa lɛyèi, kɛ́ ńlɛ wá gwao ni? Bↄ́yãi wa wázĩa bùsainɛ, kɛ́ ń wá fãn vĩo ni? Gwa! Á lɛyegↄↄ i ázĩa pↄeã kɛ, mɛ́ i á zĩkɛnaↄ wɛtã píi.

4 Gwa! Á lɛyea ì midɛ ń lɛkpaao ń sòleo, i kↄ̃ gbɛ̃ ń ↄkũ gbãao. Á fↄ̃ lɛye lá álɛ kɛ gbãɛwa mà á lↄↄ ma musue?

5 Lá ma lɛye dìlɛn wee? Zĩabusaa ado yã́ nɛe? I kɛ mipɛlɛa lán kpootɛ̃wa ge wúlɛa túfuu ń zwã̀nkasa kákaaálao yã́ no. Pↄ́ pↄ́ i mɛ lɛyen wea? Bee mɛ́ ì kamagua?

6 Lɛye pↄ́ má dìlɛ min kɛo lò? À vãikɛnaↄ gala polo gbɛ̃́ↄwa, à zuubↄlɛ gbɛ̃́ↄnɛ, à gbɛ̃́ pↄ́ wàlɛ ↄtↄ̃máↄ gbaɛ, í gbãamↄa gbɛ̃́ↄnɛ midɛ píi.

7 À blɛli nↄandɛnaɛ, à wɛ̃nade bɛsaide dilɛ. Tó a gbɛ̃́ è bɛ puizi, à pↄ́ nai. Tó i bàalɛ á mɛdoũdeɛo,

8 gu a puɛ́ lán ĩatɛ̃ bilɛawa, á gↄ̃a maa a bↄlɛ àannↄ, á maakɛa a zɛmikũɛ́, ma gawi iↄ tɛ́ á kpɛ.

9 Tó a lɛzùmazi sa, má wewá, tó a wiilɛ̀mazi, má oɛ́: Má kɛ́! Tó a gbãamↄa gbɛ̃́ↄnɛ mìdɛ á guu ń ↄtondↄakↄ̃wao ń yãpãsĩ'oao,

10 tó a nↄandɛna gbà á pↄeã blɛ, mɛ́ a pↄ́ kpà wɛ̃nadewa à kã̀, gu a puɛ́ gusiau, gubeebee a gↄ̃ɛ́ lán fãanɛwa,

11 míↄ dↄaaɛ́ gↄↄpii. Má tó pↄ́ mↄ́wá gu tɛ́kũau, má á wá baasaɛ́, íↄ dɛ lán swalu mↄ̀sɛdewa, lán nibↄna pↄ́ a í lí baowa.

12 Á á bɛzia zi fɛlɛ, á á wɛ̃́lɛ pↄ́ kálɛa à gɛ̃̀gɛ̃ vu, wi mɛɛ́ bĩ́igbooa ń uazĩↄ kɛ̀kɛnaↄ.

13 Tó álɛ gbabↄ kã́mabogↄↄzĩo, mɛ́ álɛ ázĩa pↄeã kɛ ma gↄↄpiwao, tó a mɛ̀ kã́mabogↄↄzĩ na, mɛ́ a ma gↄↄpi dìlɛ gbia, tó á dìlɛ gbia mɛ́ a á bↄↄlɛ tò, tó i ázĩa pↄeã kɛuo, mɛ́ i yãyaaabↄlɛuo,

14 á pↄ́ a kɛa na, mí tó àↄ kible bùsu gulɛsĩↄu, mí tó à á dezi Yakↄbu túbible. Ma Dii ma lɛ́ mɛ́ ò.