Isaiah 57 in Boko

1 Gbɛ̃maaↄ lɛ́ midɛ, mɛ́ a yã́ lɛ́ kã̀ada gbɛ̃elao. Wà luayãmanaↄ sɛ̀lɛ lɛ́ táńnↄ, mɛ́ gbɛ̃e làasoo i kawào. Lua lɛ́ gbɛ̃́ maapiↄ si músi pↄ́ lɛ́ mↄ́wa.

2 Zɛmaasɛnapiↄ lɛ́ gↄ̃ ń aafiao, aa kã́mabo ń wúlɛkĩiↄwa miau.

3 Ápiↄ sↄ̃, à mↄ la á màsokɛn nɛ́ↄ! Gbãsĩde ń káaluao buiↄn á ũ!

4 Dé álɛ a láanikɛi? Dé álɛ á lɛ́ yàasa ɛlɛwà álɛ á lɛ́na bↄɛ̀i? Á tàae nɛ́ↄ! Á bui mↄafilideↄ!

5 Á mɛ ì lua tã́ai lí gbɛ̃̀nɛↄ gbáu ń ligↄ̃n yàasaↄ píi. I sa'o ń á nɛ́ↄ swai ń gbɛ̀ lookpaaↄ zíɛo.

6 A zɛ ń swa gbɛ̀ pↄ́lↄpↄlↄↄ, ↄ̃mɛ á baa ũ. Ao, ampiↄ a itↄ̃̀lɛmá, a ń gbá pↄ́wɛnti. Lá màaɛ, má gí tↄsiiwáe?

7 A dↄɛ'ĩikɛkĩi kɛ̀kɛ sĩ̀sĩ lɛsĩ musu, wekĩi i dɛdɛ gɛ sa'ou.

8 I á zeeↄ pɛ́lɛ kpɛ́ kpɛɛlɛli saɛ. A pãkpàmazi, a á zwãa wòlowá, a dɛdɛ a da á wúlɛkĩi yàasaa. A lɛdoũkɛ̀ ń á yenzideↄ, a wulɛńnↄ, a ↄlìa ń plɛi.

9 A nísi gbɛ̃̀wá, a fɛlɛ ń kibɛgɛtao, a tulalelɛ̀ maamaa. A a zĩnaↄ zĩ̀ bùsu zã̀zãu, a ázĩa bùsa e bɛdau.

10 A ázĩa kpàsa ń tá dasi oao, i dↄ̃ kɛ́ a zɛ́ kuoo. A ázĩa lɛ̀ ń láo, ↄ̃ á yɛ̃̀ɛɛ i láao.

11 Dé álɛ bílikɛwà álɛ vĩakɛɛ̀ ↄ̃ a fɛlɛ ń mↄafilioi? Ma yã́ i dↄáguo, i ma yãda á sↄ̃uo. Kɛ́ ma nilɛ à gɛ̃̀gɛ̃ yã́i álɛ vĩakɛmɛɛoa?

12 Má á yãnakpaa ázĩawa ń á yãkɛao ɛɛkaɛ́ á ↄzĩ, a kã́fĩakɛɛ́o.

13 Tó a wɛ̃na wii lɛ̀, á zĩadↄ̃abↄ pↄ́ á kã̀aaↄ á bↄ mɛ̀! Aa gɛ̃ ń ĩ́anao píi, baa lɛ́'ĩana a ń sɛ́lɛ. Gbɛ̃́ pↄ́ nàmazi mɛ́ a bùsu túbible, ↄ̃mɛ a gↄ̃ ma gbɛ̀sĩsĩ pↄ́ a kua adoa vĩ.

14 Dii mɛ̀: À zɛ́kpa! À zɛ́kpa! Àli miↄnaↄ bibi! À pↄ́ pↄ́ wa gɛ̃nalɛwà gága ma gbɛ̃́ↄ zɛ́u!

15 Asa ma Lua Musude má dɛńla, má kú gↄↄpii mɛ́ ma tↄ́ kua adoa. Ma mɛ̀: Ma bɛ ku gulɛsĩ pↄ́ a kua adoau, má kú lↄ ń nↄ̀sɛniɛ sùuudeo. Mi sùuudeↄ gba wɛ̃ni dafu, mi nↄ̀sɛniɛdeↄ gba sↄ̃.

16 Máↄ yã́gagańnↄ láasaio, ma pↄ aↄ paańzi gↄↄpiio. Tó màaɛ, ma pↄkɛaↄ yɛ̃̀ɛɛ a láa, an ĩ́an wɛ̃nide pↄ́ bↄ̀ ma kĩ́i a gɛ̃zɛa.

17 An gbɛ̃ble'ai tàae mɛ́ ma pↄ fɛ̃̀, ↄ̃ ma ń gbɛ̃́ ma ulɛnɛ́ ń pↄkpɛ̃nɛo, ↄ̃ aa gì bↄ̀ ma kpɛ, aa ń pↄeã zɛ́ sɛ̀.

18 Baa kɛ́ ma ń yãkɛaↄ è màa, má ń gbã́gbã, má ń tàlakpa, má ń sↄ̃ níninɛ́ vlɛ̃́vlɛ̃.

19 Má tó ma sáaukpaa aↄ dↄ ↄↄlↄnapiↄ lɛ́u. Ma Dii ma mɛ̀ má aafia kpá gbɛ̃́ pↄ́ kú zã̀ↄ ń gbɛ̃́ pↄ́ kú kãiↄwa, mí ń gbã́gbã.

20 Vãikɛnaↄ dɛ lán ísia í pãpãakↄ̃wawa. A í líↄ ku kílikilio, a ikooaↄ ì fɛlɛ ń pɛ̀lɛao ń gbãsĩo.

21 Ma Dii ma mɛ̀ vãikɛnaↄ aaↄ aafiao.