Colossians 3:11 in Algonquin 11 Ka8in dac pepakan apitendagozisi8ag a8iagog. Kicpin Coda8inni8i8adj kek8an ega ka Coda8inni8i8adj, kicpin pak8ej8agani8i8adj kek8an ka8in, kicpin pi8ide8i8adj konigotc kicpin pakan inakanezi8adj ega dac sabenimagani8i8adj, kicpin tibenimagani8i8adj kidji anokitage8adj kek8an tibenimidizo8adj, kakina tabickotc pejig8eiendagozi8ag. 8in dac eta Jesos Christ apitendagozi, acitc kakina okigicka8an ini8e 8inikag ka iji tibendagozindjin.
Other Translations King James Version (KJV) Where there is neither Greek nor Jew, circumcision nor uncircumcision, Barbarian, Scythian, bond nor free: but Christ is all, and in all.
American Standard Version (ASV) where there cannot be Greek and Jew, circumcision and uncircumcision, barbarian, Scythian, bondman, freeman; but Christ is all, and in all.
Bible in Basic English (BBE) Where there is no Greek or Jew, no one with circumcision or without circumcision, no division between nations, no servant or free man: but Christ is all and in all.
Darby English Bible (DBY) wherein there is not Greek and Jew, circumcision and uncircumcision, barbarian, Scythian, bondman, freeman; but Christ [is] everything, and in all.
World English Bible (WEB) where there can't be Greek and Jew, circumcision and uncircumcision, barbarian, Scythian, bondservant, freeman; but Christ is all, and in all.
Young's Literal Translation (YLT) where there is not Greek and Jew, circumcision and uncircumcision, foreigner, Scythian, servant, freeman -- but the all and in all -- Christ.
Cross Reference Matthew 12:18 in Algonquin 18 “Mi ka ikidodj Kije Manido: 8adan 8aa nidanodagan, kagi onabamag. Nikitci sagia acitc nikitci min8endamiig. Nimino Manidoman niga mina kidji kigickagodjin, acitc oga paba tibadjimota8an kakina a8iagon kidji pi nda ag8acimimagin.
John 6:56 in Algonquin 56 Aa8e ke midjig8en nia8ini acitc ke minik8eg8en nimisk8ini, ninikag iji tajike, acitc kabena ni8idji8a.
John 14:23 in Algonquin 23 Jesos ogi nak8e8ajian: “Aa8e ka sagiijidj, oga nosonean nikikinoamage8ini. Nidadaman dac oga sagiigon. Midac nin acitc Nidadam niga pi nazika8anan acitc niga 8idji tajikemanan.
John 15:5 in Algonquin 5 “Kitigan nidijinagozinan, kina8a dac 8adik8anijican kidijinagozim iima kitiganikag. Aa a8iag kabena ka 8idjiojidj acitc ka 8idji8ag, mi tabickotc 8adik8anijic ka kitci mini8ag ke ijinagozidj. Ka8in mega mino kegonan kigagi todasina8a, kicpin ega 8idjiojieg.
John 17:23 in Algonquin 23 Nin ni8idji8ag, acitc kin ki8idjiojinan. Nidaiamietama8ag dac maiagotc kidji pejig8eiendagozi8adj. Midac a8iagog ooma akig kidji kikendamo8adj egi pidjinijaojian, acitc kidji kikendamo8adj e sagiad8a maia pejig8an ka iji sagiijian.”
Acts 10:34 in Algonquin 34 Pien dac ki madjita kidji tibadjimodj: “Aja teb8e ninisidotan ega Kije Manido e pepakanenimadjin a8iagon.
Acts 13:46 in Algonquin 46 Midac Pon acitc Banabas ogi ina8an ega e kocima8adjin: “Kina8akag ka Coda8inni8ieg ijinag8anoban nitam kidji 8idamago8eg Kije Manido odikido8in. Kigi 8ebinana8a, ka8in dac kidinendagozisim kidji aiameg kagige pimadizi8in. Nda8adj dac, kiga naganinom, ega ka Coda8inni8i8adj niga nda 8abamananag.
Acts 15:17 in Algonquin 17 Midac kakina kodagiag a8iagog oga pi nanada 8abama8an ka Tibendjigendjin, adigotc enakanezi8adj a8iagog kagi onabamag8a.
Acts 26:17 in Algonquin 17 Ka8in niga pagidinasig Coda8innig kek8an ega ka Coda8inni8i8adj kidji madji todaok8a. Mi igi a8iagog ke tatibadjimota8ad8a ini kegonan.
Acts 28:2 in Algonquin 2 Kimi8anoban acitc takaiaban. Nigi kitci mino todagonanag dac iima ka tajike8adj. Ki kitci poda8e8ag acitc nigi nd8e8emigonanag kidji nda a8azo8ag.
Acts 28:4 in Algonquin 4 Apitc a8iagog iima ka tajike8adj ka 8abama8adjin kinebigon e paba koja8eabikegodjinindjin Ponan onidjinikag kagi mag8amigodjin, ki inidi8ag kakina pepejig e taci8adj: “Ketcinam nici8e8inni8idok aa nabe. Aa manido ka k8aiak8akonadjin a8iagon e madji todamindjin, ka8in ododji pagidinasin kidji pimadizindjin, misa8adj egi pajinendjin kitcigamig.”
Romans 1:14 in Algonquin 14 Nigi inanonigo mega kidji paba tibadjimo8an min8adjimo8in kakina a8iagokag, Kanes (Grèce) akikag kek8an pakan akikag, acitc taji ka te8adj a8iagog kagi kitci kikinoamazo8adj kek8an taji ka te8adj a8iagog ega mane kagi iji kikinoamazo8adj.
Romans 3:29 in Algonquin 29 Kije Manido ketcinadj ka8in eta Coda8innig Okije Manidomi8an ini, kakina kodagiag a8iagog acitc Okije Manidomi8an.
Romans 4:10 in Algonquin 10 Anapitc dac ii ka iji8ebanigobanen? Ka ick8a pak8ej8agani8igobanen na Abanaam, kek8an na ab8amaci ka pak8ej8agani8igobanen? Apitc ka k8aiak8abamigogobanen Abanaam Kije Manidon, ka8in maci pak8ej8agani8isigoban.
Romans 8:10 in Algonquin 10 Kicpin dac kigickago8eg Jesos Christ, Mino Manido kiminigo8a pimadizi8ini, misa8adj e inendag8agin kia8i8an kidji nibomagagin egi patadieg. Kik8aiak8abamigo8a mega Kije Manido.
Romans 9:24 in Algonquin 24 Kina8it mega kagi nd8e8emigo8ak. Ka8in dac kakina ka taciak Kicoda8inni8isimin, nandam ka taciak pakan kidinakanezimin.
Romans 9:30 in Algonquin 30 Mi oo 8a ikido8ag. Ega ka Coda8inni8i8adj ka8in ok8ag8edjitosina8aban kidji k8aiak8abamigo8adjin Kije Manidon. Misa8adj dac ogi k8aiak8abamigo8an, osa mega ogi teb8eta8a8an.
Romans 10:12 in Algonquin 12 Ka8in dac pakan apitendagozisi8ag Coda8innig acitc ega ka Coda8inni8i8adj. Ka Tibendjigedj mega kakina ini otibeniman, acitc okitci ca8eniman kakina a8ian ka pagosenimigodjin kidji 8idoka8adjin.
Romans 15:9 in Algonquin 9 Acitc ki ijitcige iidi ega ka Coda8inni8indjin odji, kidji gi odji icpenima8adjin Kije Manidon egi kidimagenimigo8adjin. Mi ii ka ojibiigadenig Kije Manido Omazinaiganikag: “Apitc 8idji8ag8a ega ka Coda8inni8i8adj, kiga icpenimin, acitc kiga nigamotaon e manadjiinan.”
1 Corinthians 1:29 in Algonquin 29 Ka8in dac a8iag kadagi kitci inadjimidizosi nigan Kije Manidokag.
1 Corinthians 3:21 in Algonquin 21 Misa dac ka8in a8iag oda kitci min8adjimasin kodagian a8ian, kidji ikidodj ma8adji e kitci apitendagozindjin acitc dac mi ini8e ke nosone8agani8indjin kidji ikidodj. Aja mega kakina kegon kigi minigom.
1 Corinthians 7:19 in Algonquin 19 Ka8in 8in ii kitci apitendag8asinon a8iag kidji Coda8inni8idj kek8an ka8in. Tebinak todamak adi Kije Manido eji nda8endag, mi ii8e ketci apitendag8ag.
1 Corinthians 7:21 in Algonquin 21 Kin dac, kicpin anokitage8inni ka tibenimagani8idj iji pimadjio8aban apitc Kije Manido ka nd8e8emik, ka8in nigod inendaken. Kicpin dac odji ijiseg kidji gi tibenimidizo8an, mi iji odapinan.
1 Corinthians 12:13 in Algonquin 13 Nandam mega ka taciak Coda8inni8i8ag, kodagiag dac ka8in Coda8inni8isi8ag, nandam anokitage8inni8i8ag ka tibenimagani8i8adj, kodagiag dac otibenima8an anokitage8innin. Misa8adj dac, apitc ka sigaadazo8ak, Mino Manido pejig eta 8ia8 kigi ijiigonan kakina ka taciak, Jesos Christ o8ia8 kidji ijinagoziak, acitc kakina kigi minigomin aa pejig8an Mino Manido kidji kigickago8ak.
1 Corinthians 14:11 in Algonquin 11 Kicpin dac ega nisidota8ag adi ejigij8edj a8iag apitc aiamiijidj, mi maia tabickotc pi8ideg ke inenimidiag.
Galatians 2:20 in Algonquin 20 Mi maia pejig8an ka 8idji nibomagiban Jesos Christ ejinagozian, apitc ka acidak8a8agani8idj tcibaiatigokag. Nogom dac ka8in nin nitibendasin nipimadizi8in, 8in sa Jesos Christ ka tibendag, egi pidigeckaojidj. Ka iji pimadizian dac nogom, e teb8eta8ag Kije Manido Og8izisan 8edji iji pimadizian, 8in ka sagiijidj acitc kagi pagidenimidizodj kidji nibodj nin odji.
Galatians 3:28 in Algonquin 28 Ka8in dac nogom pepakan kidapitendagozisim. Kicpin Coda8inni8ieg kek8an ega Coda8inni8ieg, kicpin a8iag tibenimigo8eg kidji anokita8eg kek8an ega a8iag tibenimigo8eg, kicpin nabe8ieg kek8an ik8e8ieg, kakina tabickotc kipejig8eiendagozim ka iji mama8iseieg Jesos Christikag.
Galatians 5:6 in Algonquin 6 Kicpin mega iji mama8iseiak Jesos Christikag, kidji pak8ejogo8ak kek8an ka8in, ka8in 8in ii nigod. Mi eta ii ketci apitendag8ag kidji teb8eta8aiak Jesos. Kicpin dac teb8eta8aiak, kiga sagiananag kodagiag a8iagog.
Galatians 6:14 in Algonquin 14 Nin dac 8in, nikitci inadodan egi nibodj ka Tibeniminak Jesos Christ tcibaiatigokag. Ka8in dac odji pejig kodag kegon ni8i min8adodasin. Jesos mega egi nibodj tcibaiatigokag, ka8in odji pejig nidapitendasinan ini kegonan ka kitci apitendamo8adjin igi8e a8iagog ooma akikag ega ka teb8eta8a8adjin Jesosan. 8ina8a dac, ka8in odji pejig odapitendasina8an ini kegonan ka kitci apitendamanin.
Ephesians 1:23 in Algonquin 23 Igi8e ka teb8etamo8adj ka ma8adjiidi8adj kidji aiamie8adj tabickotc Jesos o8ia8 ijinagozi8ag. Apanigotc Jesos opidigecka8an ka teb8etamindjin, tabickotc 8in kabe ka kigickagodjin Kije Manidon.
Ephesians 3:6 in Algonquin 6 Misa oo min8adjimo8in kagi kadjigadegiban. Igi8e ega ka Coda8inni8i8adj mi ke8ina8a okackitona8a Kije Manidon oca8endjige8ini kidji odisigo8adj, ka8in 8in eta Coda8innig kidji odisigo8adj ii. Aja mega e mama8ino8adj Coda8innig acitc ega ka Coda8inni8i8adj, mi pejig8an epitendagozi8adj kakina ka taci8adj, ma8asag Kije Manido odanicinabeman e ijinagozi8adj. Kakina oga odisigona8an ini mino kegonan kagi ikidodj Kije Manido kidji minadjin ini8e ka teb8eta8andjin Jesos Christan.
Ephesians 3:17 in Algonquin 17 Midac apanigotc Jesos Christ kidji tajikedj kidei8akag, egi teb8eta8eg. Nidaiamie 8edjidagotc kidji sagieg Kije Manido acitc kidji sagiidieg kakina pepejig e tacieg, midac kidji sogigaba8ieg kiteb8etamo8ini8akag, tabickotc mitig ka kitci sogakicig kidji ijinagozieg, acitc tabickotc migi8am kagi kitci sogakisidjigadeg e ojitcigadeg.
Ephesians 6:8 in Algonquin 8 Mamik8endamok dac oo8e. Kakina mino kegoni ke todag a8iag ooma akikag, ka Tibendjigendjin oga kijikagon adi kagi iji kackitamadizodj, misa8adj e tibenimagani8idj kidji anokitagedj kek8an 8in tibina8e tibenimidizodj.
Philippians 3:7 in Algonquin 7 Kakina ini8edi ka pi mikodamanin “niga 8idokagonan” nidinendanaban. Nogom sa dac ninisidotan teb8e ega e apitendag8agin kakina ini. Jesos Christ ka pi todag nin odji, mi ii e apitendag8ag.
Colossians 2:10 in Algonquin 10 Kigi odisigona8a dac kekina8a ii pimadizi8in Kije Manidokag ka odjimagag, Jesos Christikag egi iji mama8iseieg, 8in ka tibenimadjin kakina manidon ka ogima8indjin acitc ka macka8izindjin.
1 John 5:11 in Algonquin 11 8adan dac oo8e ka ikidodj Kije Manido. Kigi minigonan kagige pimadizi8ini, egi teb8eta8aiak Og8izisan.
1 John 5:20 in Algonquin 20 Kikikendananan Kije Manido Og8izisan egi pijandjin ooma akikag. Kigi minigonan kidji nisidotamak, kidji gi odji kikenimaiak Kije Manido, 8in e teb8edj. Kitibenimigonan dac Kije Manido e teb8edj, e mino 8idji8aiak Og8izisan Jesos Christan. Mi sa 8aa ka Kije Manido8idj e teb8edj, e minigo8ak kagige pimadizi8ini.
2 John 1:9 in Algonquin 9 Mi panima a8iag 8e8enda ki nosoneag Jesos Christan okikinoamage8ini. Kicpin kodag kikinoamage8ini iji mama8atodj, ka8in okikenimasin Kije Manidon. Aa8e dac 8e8enda ka nosoneag Jesosan okikinoamage8ini, 8in okikeniman Kije Manidon Kidadaminani acitc Og8izisini.