1 Corinthians 11 in Yucuna
1 Nula'acá que caja nuhuata ila'acá marí eja'ahuá chu. Uncá Jesucristo la'alá nacaje rijlúhuaja calé i'imacá. Rila'acá i'imacá que caja nula'acá. Ñaquele ila'á nula'acá que caja.
2 Nojena, palá nupura'acó inacu, ihue'epícale nucá. Ejo'ocaja ipechu nacú nacaje piyuque nohuíña'atacare nacú i'imacá. Aú calé nupura'ó caja inacu palá.
3 Nuhuata ihue'epica Jesucristo i'imacá achiñá huacára'ajeri. Tupana i'imacá Jesucristo huacára'ajeri que caja achiñá i'imacá inanaru huacára'ajeri.
4 Ina'uqué jahuacaño ca'ajná Tupana puráca'alo jema'ajé pajhua'atéchaca. Re ca'ajná pajluhuaja ne'iyá, pura'aró Tupana hua'até. Apú ca'ajná ja'apátari ina'uquejlo Tupana puráca'alo. Tupana quemacá rijló que ra'apátaca najló ricá. Marí que rila'acá quetana re ca'ajná risapéhuane richá. Marí que la'acana aú uncá riphala Jesucristo ja'apí. Uncá paala Jesucristo nacú ricá, achiñá huacára'ajeri ri'imacale.
5 Inanaru ca'ajná pura'ayó caja Tupana hua'até. Ro'opata ca'ajná ina'uquejlo Tupana puráca'alo rimacá rojló que. Uncachu ruhuíla'aru pajré i'imalá ra'apátaca najló ricá quetana, uncá paala rula'acá ruyajná nacú, ruhuacára'ajeri ri'imacale. Napiro'ó uncá ina'uquélaruna huilá. Ñaqué caja rula'acá pu'uhuaré ruyajná nacú, uncachu ruhuíla'aru pajré i'imalá ruchá, rupura'acó Tupana hua'até quetana ca'ajná, ro'opátaca ripuráca'alo quetana ca'ajná.
6 Uncachu ropára'ala ruhuilá ripajré aú, palani caja rojló ruhuilá piro'ocana. Ruhuilá i'imacachu piro'oqueja, ropáña'o raú. Ñaqué caja napáña'aco sara'aqueja nehuíla'aru i'imacachu. Marí que ri'imacale najló, ihuacára'a napára'aca nehuíla'aru ripajré aú.
7 Eyá achiñá uncá apára'ala rihuíla'aru ripura'acó ee Tupana hua'até. Uncá rapára'ala ricá, Tupana que caja ri'imacale nahuacára'ajeri. Achiñá huacára'ajeri Tupana. Inanaru huacára'ajeri achiñá.
8 Tupana queño'ótari achiñá i'imacá. Uncá inanaru napona naquiyana aú calé riqueño'óta ri'imacá. Inanaru riqueño'óta achiñá napona naquiyana aú i'imacá.
9 Uncá caja Tupana queño'ótala achiñá inanárujlo penaje. Riqueño'óta inanaru achiñajlo penaje, riñaté a'ajeyo penaje.
10 Marí que ri'imacale, inanaru apára'ayo ruhuíla'aru ripajré aú. Ruhuíla'aru pajré iná amaca aú iná hue'epí achiñana ja'apiyá jema'ajeyo rucá. Marí que ri'imacale, inaana apára'año nehuíla'aru. Palani caja Tupana hua'atéjena, je'echú chu i'imacaño, nacú marí que la'acana.
11 Achiñana, inaana hua'até i'imaño papalamánechaca pajhua'atéchaca. Que huajló ricá Jesucristo ja'apiyá jema'ajéñojlo. Uncá hue'emalá hue'emajohua paliyácaca.
12 Quehuaca achiñá napona naquiyá queño'ótacanami inanaru. Eyá inanaru palamane achiñá i'imacá. Piyuqueja nacaje i'imacá Tupana palamane.
13 Icá hue'epiño jahuacaco ee, uncá paala inaana pura'acó Tupana hua'até, uncachu nehuíla'aru pajré i'imalá.
14 Necoja piyuque ina'uqué hue'epica achiñana huilá pituca'acá aú ajopana ina'uqué apáña'año na'apí.
15 Inaana amaño palá nehuilá chojé. Nehuíla'aru pajré queja nehuilá.
16 Marí que numacale ijló rinacu inaquiyana huátaño ca'ajná nujhua'até aca'ácacano. Ihue'epí marí: Marí queja hue'emacá pajhua'atéchaca huahuacaco Tupana puráca'alo jema'ajé. Ajopana Jesucristo hua'atéjena, ajopana Jesucristo hua'atéjena que la'añó ñaqué caja. Uncá inaana pura'alaño Tupana hua'até, uncachu nehuíla'aru pajré i'imalá. Caja marí queja hue'emacá.
17 Numájicare nacú ijló me'etení, uncá numalaje inacu: “Palá ila'acá” que. Jesucristo hua'atéjena jahuacaño pajhua'atéchaca, palá napechu i'imacáloje Tupana nacú raú penaje. Eyá ijló ta uncá ñaqué calé ricá. Jahuacaco aú ila'á icó chapú.
18 Marí que numacá inacu, ajopana i'imacale nojló riyucuna. Nemá nojló marí que: —Ne'iyajena i'imaño ajopana, ajopana que paliyácaca, nahuacácochu Tupana puráca'alo jema'ajé —que ne'emacá iyucuna nojló. Nuhue'epí apala quehuaca ca'ajná nemacá inacu.
19 Caja queja ricá, ramácoloje mecajenaca e'iyohuá ja'apaño palani puráca'aloji chuhuá.
20 Icá jahuacaño pajluhuaja chojé a'ajnehuá ajñaje pajhua'atéchaca, ihue'epícaloje méqueca Jesucristo la'acá huachaya penaje. E'iyonaja uncá huani ila'alá Jesucristo quemacá que rinacu.
21 Riphaca aú rená chojé, ajñácaloje a'ajnehuá pajhua'atéchaca penaje, e'iyajena ajñaño a'ajnejí ijña'acare ijhua'ató icámica que ajopana liyá. A'apona que ajopana ña'acá me'epejí panacu. Eyá ajopana yuhuéra'año caja nahua'á.
22 Re iñacaré ta, ajñácaloje a'ajnehuá richu penaje. Uncá naje calé ila'á majopéjaruna queja ajopana Jesucristo hua'atéjena, ijhua'até jahuacácaño. Icá apáña'ataño camu'ují la'acaño nacú. ¿Meque ihuátaca numacá ilé caje nacú? ¿E ihuátaca nupura'acó inacu palá raú? Ilé que ila'acá pachá, uncá meño'ojó nupura'aló inacu palá.
23 Hue'emacana Jesucristo liyaje hue'epícanami marí puráca'aloji, no'opátacare ijló i'imacá: Pajluhuaja Jesucristo ja'apiyateje a'arí ripinánajlo ricá i'imacá. Rihuacajé lapí, ra'acá ripinánajlo ricá yámona, Jesucristo ajñari ra'ajnehuá ra'apiyatéjena hua'até. E rijña'á ricápojo pan.
24 Rimá Tupánajlo: —Palá pila'acá huecá marí pan aú. Aú ritupa'á najló rinaquiyana. Rimá najló: —Ijlojé penaje no'ó nunapona. Marí que ajñájica pan pajhua'atéchaca nuyámijo, ipechu capicháñaca piyá nutaca'ajícare ichaya —que rimacá najló i'imacá.
25 Ejomi najñá na'ajnehuá rijhua'até. Pan rijña'acá ricápojo que caja rijña'acá ricápojo chiyela. E caja rimá najló: —Marí nura aú Tupana la'ajeri huajé nacaje ina'uquéjloje penaje, ne'emacáloje ra'apiyá raú penaje. Marí que caja i'irajica ricá pajhua'atéchaca nuyámijo, ipechu capicháñaca piyá nutaca'ajícare ichaya penaje —que rimacá najló i'imacá.
26 Marí que ri'imacale huajñá pan pajhua'atéchaca, najñaca ri'imacá que caja huajñaca ricá quehuá, hue'ejnatácano huapéchuhua rinacu. Jesucristo taca'acá huachaya huajlojé penaje, ricá hue'epéjona penaje ricá. A'ajná majó riphájica ejená huala'ajé ñaqué ricá. Hue'erá cajmú caje jalá pajhua'atéchaca, ne'eracá ri'imacá que caja hue'eracá ricá quehuá, hue'ejnatá huapéchuhua rinacu. Marí que ila'ajica, Jesucristo taca'acá huachaya hue'epéjona penaje ricá. A'ajná majó riphájica ejená huala'ajé ñaqué ricá.
27 Ina'uqué ajñácachu majopeja ricá pan, nala'á pu'uhuaré raú, uncá pachá napechu i'imalá palá Jesucristo napona nacú. Ra'á ri'imacá huajlojé penaje, hue'emacóloje capichácajo liyá raú penaje. Ne'eracachu caja majopeja nacaje jalá, nala'á caja pu'uhuaré raú, uncá pachá napechu i'imalá palá méqueca rila'acá huachaya i'imacá. Rita'acá huacajé rira i'ijnari raphú chiyá huachaya i'imacá.
28 Pamineco iná i'imá iná pechu co'oná, iná hue'epícaloje na aú ca iná la'acá pu'uhuaré. Iná ca'acáloje ricá iná naquiyó penaje, iná i'imá iná pechu co'oná. Rica'acana ejomi iná ajñaca ricá, iná i'iracá caja ralá.
29 Jesucristo taca'arí huachaya rinapona aú i'imacá. Huajñá pan pajhua'atéchaca, rihue'epíjona penaje. Uncachu iná hue'epila na penájeca inajlo ricá, iná la'á pu'uhuaré rajñacana aú. Richona Tupana huajari iná. Ñaqué caja inajlo ricá ralá i'iracana aú.
30 Majopeja inaquiyana ajñaca ricá. Ñaqué caja ne'eracá ralá. Uncá nahue'epila na penájeca ricá, pachá cajrú inaquiyana i'imaño natámina. Ajopana inaquiyana i'imaño natámina pojlo'ocajo nacú. Ne'iyajena taca'añó rinacu i'imacá.
31 Hue'emacachu huapechu co'oná huajñaca ricá yámona, huayurícaloje pu'uhuaré huala'acare hualiyó raú penaje, uncá na chona calé Tupana huajari huecá marí que huala'acá aú.
32 Pu'uhuaré huala'acare chona Tupana huajari huecá, huala'acá piyá ñaqueja caja piño. Marí caje aú uncá hue'emalaje capichátaquejami que riliyá. Uncá hue'emalaje ajopana ina'uqué i'imacá que huani, uncá jema'alaño Tupana ja'apiyá que. Capichájeño penájena i'imajícaño necá.
33 Ñaquele, nojena, jahuacájico ee a'ajnehuá ajñaje pajhua'atéchaca, ihuata pecohuácaca, ajñácaloje pajñacani ricá penaje.
34 Quehuí me'epejí i'imacárenajlo, ajñajeño na'ajnehuá nañacaré chu. Marí que la'acana aú uncá Tupana huajálaje icá. Uncá pachá ina'uqué la'alá palá pajhua'atéchaca nahuacaco huacajé, Tupana huajari necá. Re ejo'ocaja nacaje uncá nulamá'atalare ijhua'até. Nuphájica inacu huacajé nulamá'ataje ricá ijhua'até.