Psalm 50 in Yalunka
1 Asafi a bɛtina. Fangamana, Marigina Alatala falan tima, a dunuɲa muxune birin maxili, sa fɔlɔ sogetedeni han sa dɔxɔ sogegododen na.
2 Alaa nɔrɔn mayilenma keli Siyon yi na taa kamalixi tofaɲina.
3 En ma Ala fama, a mi dunduxi. Kala ti tɛɛ gbeena a yɛɛ ra, foye gbeena a rabilinxi.
4 A koren nun bɔxɔn xilima e xa findi seren na a yamaan makitideni.
5 A yi a fala, a naxa, “N ma muxu tɔgɔndiyaxine malan n fɛma, naxanye layirin xidixi n xɔn ma saraxa baan na.”
6 Koren xɔnna a tinxinyaan nalima nɛn, bayo Ala yɛtɛɛn nan kitisaan na.
7 “N ma yamana, ɛ ɛ tuli mati, n falan tima nɛn. Isirayila, n na ɛ maxadima, bayo Ala nan n tan na, ɛ Ala.
8 N mi ɛ maxadima ɛ saraxane xan ma fe ra. Ɛ saraxa gan daxine bama n xa waxatin birin.
9 Koni, n mi turaan xa tongoma ɛ sansanne yi xanamu kɔtɔn naxan ɛ kulane yi.
10 Amasɔtɔ n gbeen nan burunna subene birin na. N gbeen nan ɲingene ra naxanye geya wuli wuyaxine ma.
11 N tan nan xɔline ngaan kanna ra naxanye geyane ma e nun niimaseen naxanye birin fixɛne ma.
12 Xa kamɛn yi n suxun nɛn nun, n mi na falɛ i xa, amasɔtɔ n tan nan gbee dunuɲa nun ayi seene birin na.
13 N ɲinge suben donɲɛ ba? Ɛn-ɛn de! Xanamu n siin wunla min? Ɛn-ɛn de!
14 Nanara, barika biran xa findi ɛ saraxan na Ala xa. Ɛ ɛ dɛ ti xuine rakamali Kore Xɔnna Ala xa.
15 N xili tɔrɔ waxatini. N ni i kantanma nɛn, i yi n binya.”
16 Koni Ala a falama muxu ɲaxine xa nɛn, a naxa, “Nanfera ɛ xɛtɛma n ma tɔnne falan ma, ɛ yi n ma layirina fe fala,
17 koni n ma xaranna mi rafan ɛ ma? Ɛ mɛxi n ma falane ra!
18 Ɛ nun muɲadene na a ra. Ɛ nun yalundene na a ra.
19 Ɛ fala ɲaxin nan tun tima. Ɛ wulen nan tun falama.
20 Ɛ ngaxakedenne kansunma waxatin birin yi. Ɛ katama e tɔɲɛgɛdeni.
21 Ɛ bata ito birin liga n mi fala ti. Nanara, ɛ mirixi a n fan ligaxi alo ɛ tan. Koni iki, n na ɛ maxadima, n yi a yɛba ɛ xa.”
22 “Iki, ɛ ito famu, ɛ tan naxanye Ala bɔtɛ rabaxi. Xa na mi a ra, n na ɛ raxɔrima nɛn. Muxu yo mi ɛ xunbɛ.
23 Naxan na saraxa baan findi barika biran na, na nan n binyaxi. Naxan na siga kira faɲin xɔn, n na Ala kisin yitama nɛn na ra.”