Psalm 30 in Yalunka
1 Dawudaa bɛtina. Sigi sariɲanxina. Batu Banxin nasariɲan bɛtina.
2 Alatala, n ni i batuma, amasɔtɔ i bata n yite. I mi tin n yaxune yi e xunnayeren n xun na.
3 Alatala n ma Ala, n ni i mafan nɛn malina fe ra, i yi n nakɛndɛya.
4 Alatala i n niin masiga nɛn laxira ra, i n faxamatɔɔn nakisi.
5 Alatalaa tɔgɔndiya muxune birin xa bɛtin ba a xa! Ɛ a matɔxɔ a wali sariɲanxine fe ra!
6 Bayo, a xɔlɔn mi xunkuya, koni a marafanna luma nɛn muxun siin sogen birin. Wuga xuiin minima nɛn kɔɛɛn na, koni sɛwan fama nɛn xɔtɔnni.
7 N yi laxi n ma hɛrin na waxatin naxan yi n naxa, “Sese mi n yimaxɛ!”
8 Alatala, n to yi i ya xanuntenyani, i n lu nɛn fangani alo geyana. Koni i to i yɛtagin luxun n ma, na yi n kɔntɔfili.
9 N yi i tan Alatala xili, n yi Marigin mafan,
10 n naxa, “N na faxa, i tɔnɔn mundun sɔtɔma nayi? N na sa gaburun kui, tɔnɔn mundun na ra? Faxa muxune nɔɛ i tantunɲɛ ba? E nɔɛ i ya lannayaan matɔxɛ ba?
11 Alatala, i tuli mati n na, i kininkinin n ma! Alatala, n mali!”
12 I bata n ma nimisan maxɛtɛ sɛwan na. I n makininkininna ba n ma, i yi n nabilin sɛwan na.
13 Nanara, n mi n dundɛ, n bɛtin bama i xa nɛn. Alatala n ma Ala, n barikan birama i xa nɛn habadan!