Jeremiah 46 in Yalunka
1 Alatala falani itoe nan ti Nabi Yeremi xa lan siyane ma:
2 A ito nan fala lan Misiran yamanan nun Misiran mangan Neko a ganla ma, Babilɔn mangan Nebukadanesari naxan nɔ yɛngɛni Efirati baan dɛ Karakemisi taani, Yuda mangan Yehoyakimi a mangayaan ɲɛɛ naanindeni, Yosiyaa dii xɛmɛna.
3 “Ɛ yɛ masansan wure lefa xungbene nun a xurine yitɔn! Ɛ maso, ɛ yɛngɛn so!
4 Ɛ soone yitɔn, soo ragine xa te e fari! Ɛ xunna makantan wure kɔmɔtine so, ɛ ti ɛ yirene yi! Ɛ tanbane yitɔn! Ɛ kanke yɛ masansanne ragodo ɛ ma!
5 Nanfera, n fa e gaxuxin nan toma iki? E xɛtɛma e xanbi ra, e sofane bata faxa. E xɛtɛma e giyɛ! E e gima, e mi e xanbi rato. E gaxuxin yiren birin yi,” Alatalaa falan nan na ra.
6 “Hali xulunlane mi nɔɛ e giyɛ! Hali fangamane mi nɔɛ e futuxulɛ! E sanna radinma, e sa bira fɔ kɔmɛn fɔxɔn yamanani Efirati baan dɛ.”
7 “Nde ito ra naxan tema alo Nila baana, naxan igeye bɔxɔnma a ma a findi fufaan na?
8 Misiran nan tema alo Nila baana, naxan igeye bɔxɔnma a ma a findi fufaan na. A a falama, a naxa, ‘N tema nɛn, n sa bɔxɔn birin xun ma, n yi taane nun e muxune birin naxɔri.’
9 Soo ragine, ɛ te yɛngɛni! Wontoro ragine ɛ fɔn e ma! Sofane, ɛ mini ɛ yɛ masansan wure lefane ra, ɛ tan Kusi kaane nun Puti kaane nun Ludu kaan xali wonle!”
10 “Marigina Alatala Sɛnbɛn Birin Kanna nan gbee na lɔxɔn na, a gbeeɲɔxɔ lɔxɔna, a gbeen ɲɔxɔma a yaxune ra lɔxɔn naxan yi. Silanfanna faxan tima nɛn na lɔxɔni han a wasa wunla ra, bayo a luxi nɛn alo saraxana Marigina Alatala Sɛnbɛn Birin Kanna xa, kɔmɛn fɔxɔn yamanani Efirati baan dɛ.
11 Misiran yama faɲina, ɛ siga Galadi yamanani ɛ sa senna fen. Koni ɛ dandan fɛrɛne fenma fuyan, seri mi fa ɛ yiyalanɲɛ sɔnɔn.
12 Siyane bata i ya yarabina fe mɛ. I gbelegbele xuiin bata bɔxɔn birin suxu. Amasɔtɔ sofane tema e bode fari, e birin yi bira.”
13 Alatala falani ito nan ti Nabi Yeremi xa lan Babilɔn mangan Nebukadanesari fa feen ma Misiran yamanan yɛngɛdeni:
14 “Ɛ a rawanga Misiran yamanani, Migidoli kaane xa a mɛ, Nofi kaane nun Tapanese kaane xa a mɛ! A fala e xa, ɛ naxa, ‘Ɛ keli, ɛ yitɔn, bayo yɛngɛn bata ɛ konna li!’
15 Nanfera ɛ sofane bata raxɔri? E mi tiyɛ, bayo Alatala bata e radin bɔxɔni.
16 A muxu wuyaxi rabirama nɛn. E tema nɛn e bode ma, e bira, e naxa, ‘En keli, en xɛtɛ en konne yi, en bari taane! En na en masiga halagi ti yɛngɛni ito ra!’
17 E a falama nɛn mɛnni, e naxa, ‘Misiran mangani ito a sɔnxɔn gbo de! Koni na waxatin bata a dan!’”
18 Mangana falan ni ito ra naxan xili Alatala Sɛnbɛn Birin Kanna, a naxa, “Habadan Ala nan n na, n bata n kɔlɔ n yɛtɛni, fa fala muxuna nde fama naxan sɛnbɛn gbo alo Taboro geyana geyane tagi, alo Karemele geyana baan dɛxɔn.
19 Misiran kaane, ɛ goronne yitɔn ɛ siga konyiyani! Bayo Nofi taan findima nɛn yire magenla ra, a ganma nɛn, muxu yo mi luma a yi.
20 Misiran yamanan findixi ɲinge faɲin nan na. Sigin fama nɛn a xili ma sa keli sogeteden kɔmɛnna ma.
21 Misiran kaane bata xɔɲɛ sofa yɛbaxine ramara e ganli naxanye masuxi e xɔn alo tura raturaxine. Hali ne fan e xun xɛtɛma nɛn, e gi e bode xɔn. E mi tiyɛ e funfuni yɛngɛn lɔxɔni, bayo gbalon lɔxɔn bata fa e ma, n na e kɛwanle saranma e ra lɔxɔn naxan yi.
22 Misiran kaane e gima nɛn e yaxu sɛnbɛmane bun alo saɲina. E fama e xili ma nɛn e nun bunbine, alo naxanye wudine sɛgɛma.
23 Alatalaa falan ni ito ra, e a fɔtɔnna sɛgɛma nɛn, hali muxun mi nɔɛ soɛ fɔtɔnna naxan na bayo e wuya alo tuguminne, e yatɛn mi nɔɛ kolonɲɛ.
24 Yagin nan a ra Misiran yamana faɲin xa. A bata sa yamaan sagoni, naxanye sa kelixi kɔmɛnna ma.”
25 Alatala Sɛnbɛn Birin Kanna, Isirayilaa Ala naxa, “N kelima nɛn No taana ala xili ma, Amɔn e nun Misiran yamanan nun a mangan nun a alane nun a kuntigine e nun naxanye birin e yigi sama Misiran mangani.
26 N na e sama nɛn e yaxune sagoni, naxanye waxi e faxa feni, Babilɔn mangan Nebukadanesari nun a kuntigine. Na xanbi ra, muxune mɔn yi dɔxɔ Misiran yi alo a fɔlɔni,” Alatalaa falan nan na ra.
27 “Ɛ tan Yaxuba yixɛtɛne, n ma walikɛne, ɛ nama gaxu, Isirayila kaane, ɛ nama kuisan! Bayo, n na ɛ rakisima nɛn, n yi sa ɛ ba yire makuyeni, n yi ɛ bɔnsɔnna ba yamanani e sa konyiyani dɛnaxan yi. Yaxuba bɔnsɔnna muxune mɔn xɛtɛma nɛn, e yi lu maraxaran nun bɔɲɛ xunbenli. E mi fa yimaxɛ sɔnɔn!
28 Alatalaa falan ni ito ra, a naxa, ‘Ɛ tan Yaxuba yixɛtɛne, n ma walikɛne, ɛ nama gaxu, bayo n luma nɛn ɛ xɔn. N siyane birin naxɔrɛ nɛn, n na ɛ raxuyaxi ayi naxanye yɛ, koni n mi ɛ tan naxɔrima. N na ɛ xuruma nɛn alo a lan kii naxan yi, bayo n mi ɛ yatɛma sɔntarene ra.’”