Isaiah 45 in Yalunka
1 Alatala ito nan falaxi a muxu sugandixin xa, a naxa, “Kirusi, n naxan yii suxi, alogo n xa siyane magodo a yɛtagi, n yi mangane yɛngɛ so seene ba e ma, n yi dɛɛn fɔxɔ firinne rabi a yɛɛ ra, alogo taan so dɛɛne nama fa ragali sɔnɔn,
2 n tan yɛtɛɛn tima nɛn i yɛɛ ra, n yi gbingbinne malaxun, n yi sulan dɛɛne kala, n yi dɛɛne balan wurene bolon.
3 N bɔxɔ bun nafunla soma nɛn i yii, e nun nafulu luxunxina, alogo i xa a kolon fa fala a n tan nan Alatala ra, naxan i xilima i xinla ra, n tan Isirayilaa Ala.
4 N bata i xili i xinla ma, n yi tide binyen fi i ma, n ma walikɛɛn Yaxuba yixɛtɛne fe ra, Isirayila kaane, n naxanye sugandixi, koni i mi n kolon.
5 Alatala nan n tan na, gbɛtɛ mi na. Ba n tan na, Ala gbɛtɛ mi na. N bata i yitɔn yɛngɛn xili yi, hali i to mi n kolon,
6 alogo muxune xa a kolon, keli sogen teden ma han a gododena, fa fala ba n tan na, se gbɛtɛ mi na. N tan nan Alatala ra, gbɛtɛ mi na.
7 N tan nan kɛnɛnna daxi, n yi dimin da, n yi bɔɲɛ xunbenla fi, n yi tɔrɔn nafa. N tan Alatala nan feen birin ligama.”
8 “Tulen xa a yitɔn kore, tinxinna yi godo alo tulena! Bɔxɔn xa rasɔnɔya alogo kisin xa mini alo sansina, e nun tinxinyaan yi sabati e bode xɔn! N tan Alatala nan ne birin daxi.”
9 Gbalon na kanna xa naxan yɛngɛn nakelima a dali marigin ma, muxun naxan luxi alo fɛɲɛna fɛɲɛne tagi. Fɛɲɛ bɛndɛna a falɛ a rafala muxun ma ba, a naxa, “I nanse ligama?” hanma a naxa, “Sese mi i ya wanla ra!”
10 Gbalon na kanna xa naxan a falama a fafe ma, a naxa, “I nanse barixi ito ra?” hanma a naxa a nga ma, “I diin barin nanfera?”
11 Alatala ito nan falaxi, Isirayilaa Ala Sariɲanxina, naxan Isirayila daxi, a naxa, “Ɛ tan nan n maxɔdinma fe famatɔne ma, lan n ma diine fe ma, ɛ yi yamarine so n yii lan n yii fɔxɔn ma?
12 N tan nan bɔxɔ xɔnna rafalaxi n adamadiine da a fari! N tan yɛtɛɛn nan kore xɔnni fulunxi. N tan nan a sarene birin yamarima.
13 N tan nan Kirusi rakelixi n ma tinxinyana fe ra, n yi a ti kira yitɔnxin xɔn. A n ma taan tima nɛn. N ma muxun naxanye yi suxi yɛngɛni, a ne beɲinma nɛn, e mi e xun saren fi.” Alatala Sɛnbɛn Birin Kanna naxa na kiini.
14 Alatala ito nan falaxi, a naxa, “Misiran kaane nun Kusi yamanan yulaya seene, na Sabe kaa muxu kuyene wanle tɔnɔn luma nɛn i xa. E fama nɛn i konni, e findi i gbeen na, e bira i fɔxɔ ra, e xidixi e bode ra, e yi e xinbi sin i yɛtagi e yi i maxandi, e naxa, ‘Ala i tan nan xɔn. Ala gbɛtɛ mi na, sese mi ala gbɛtɛye ra!’”
15 I tan Isirayilaa Ala, Marakisi Tiina, i findixi Ala luxunxin nan na.
16 Suxure rafalane birin yagixi, e xun sinxi, e birin xun sinxin sigama e bode xɔn.
17 Koni Isirayila kaane tan kisin sɔtɔma Alatala nan na habadan. Ɛ mi fa yarabɛ, ɛ xun sin mumɛ!
18 Amasɔtɔ Alatala ito nan falaxi, a tan naxan kore xɔnna daxi, a tan Ala, naxan bɔxɔ xɔnna daxi, naxan a bɛtɛn saxi, a mi a magenla lu, koni a yi a da alogo muxune xa lu a yi. A naxa, “N tan nan Alatala ra, gbɛtɛ mi na.
19 N mi falan tixi luxunna xan yi, dimini bɔxɔn yirena nde yi. N mi a falaxi Yaxuba yixɛtɛne xa, n naxa, ‘Ɛ n fen fuyan!’ N tan Alatala, n ɲɔndin nan falama, n fe faɲin nan nalima.”
20 “Ɛ tan siyane muxu gixine, ɛ fa ɛ malan, ɛ birin yi ɛ maso be! Xaxilitarene nan wudi suxurene tongoma, e yi batu seene maxandi naxanye mi nɔɛ e rakisɛ.
21 Ɛ falane ti, ɛ yi ɛ xɔnba. Ɛ bode kawandi! Nde muxune rakolonxi feni ito ra xabu a fɔlɔni? Nde bata yi a rali nun xabu to mi na ra? N tan Alatala mi a ra ba? Ba n tan na, Ala gbɛtɛ mi na, Ala naxan tinxin, Marakisi Tiina. Ba n tan na, gbɛtɛ mi na.
22 Ɛ yɛɛ rafindi n ma, ɛ xa kisi, ɛ tan naxanye birin bɔxɔn danne ra! Bayo Ala nan n na, gbɛtɛ mi na.
23 N bata n kɔlɔ n yɛtɛni, n yɛtɛɛn bata fala tinxinxini ito ti, falan naxan mi maxɛtɛma, n naxa, ‘Xinbin birin sinma nɛn n bun ma, lɛnna birin yi a kɔlɔ n yi.
24 E naxa: Tinxinna nun sɛnbɛna Alatala nan keden pe yi.’” Naxanye birin yi xɔlɔxi a ma, ne birin yagixin fama nɛn a fɛma.
25 Isirayila kaane birin tinxinna sɔtɔma nɛn Alatala xɔn, e yi e kanba Ala yi.