Isaiah 26 in Yalunka
1 Na lɔxɔni, Yuda yamanan muxune bɛtin bama nɛn, e naxa, “Nxu bata taa makantanxi faɲin sɔtɔ. Ala bata a rabilin marakisin na alo yinna a xa nxu makantan.
2 Ɛ taan so dɛɛne rabi, yama tinxinxin xa so naxanye luxi tɔgɔndiyani.
3 Naxanye yugon fan, i tan Ala nan bɔɲɛ xunbeli kɛndɛn nagidima ne ma, amasɔtɔ e yigi saxi i tan nin.
4 Ɛ yigi sa Alatala yi habadan, bayo Alatala nan ɛ habadan kantan fanyen na, ɛ Alatala.
5 Muxun naxanye dɔxi yire matexini, a ne ragodoma nɛn, a yi e taa matexin kala, a yi a halagi bɔxɔ xɔnna ma, a a findi burunburunna ra.
6 Sɛnbɛtarene a yibodonma nɛn, a lu yiigelitɔne san tidene bun.”
7 Tinxin muxuna kiraan tinxin nɛn. I tan Ala faɲin kiraan malaxunma nɛn tinxin muxun xa.
8 Alatala, nxu xaxili tixi i tan nan na i ya kiti saxine kiraan xɔn ma. Nxu niin makoon naxan ma, nxu lu i xinla falɛ, nxu lu nxu mirɛ i ma.
9 I xɔnla n niin yɛtɛɛn suxuma kɔɛɛn na, n ni i fenma n sɔndɔmɛn birin na. I na kiti kɛndɛn sa bɔxɔni dunuɲa muxune yi tinxinyaan kolon.
10 Xa i hinan muxu ɲaxine ra, e mi tinxinyaan kolonɲɛ. Hali yamana faɲini, e tinxintareyaan nan nabama, e mi Alatalaa gboon toma.
11 Alatala, i yiini texi e xili ma, koni e mi a toma. Anu, e i ya xanuntenya gbeen toma nɛn i ya yamaan xa, e yi yagi. Tɛɛn naxan i yaxune raxɔrima, na xa e gan.
12 Alatala i bɔɲɛ xunbenla fima nxu ma, i tan nan nxɔ feene birin nakamalima nxu xa.
13 Alatala, nxɔ Ala, kari gbɛtɛne nxu nɔ nɛn, naxanye mi findixi i tan na, koni nxu i tan nan keden pe xili binyama.
14 Ne bata faxa, e mi fa xɛtɛma sɔnɔn. E bata findi yiyane ra, e mi fa kelima sɔnɔn. I bata e kɛwanle saran e ra, i yi e halagi, i yi e funfun birin naxɔri.
15 Alatala, i bata nxɔ bɔxɔn fari sa, i bata a fari sa. I bata i ya binyen mayita, i yi yamanan danne masiga.
16 Alatala, muxune e yɛɛ rafindima i tan nan ma tɔrɔni. I na e xuru mantɔrɔni, e yi xɛtɛ i xandɛ e dɛ bun.
17 Alatala, nxu lu nɛn i yɛtagi, alo ɲaxanla nɛma wugama sɔxɔlɛni tinna ma.
18 Nxu fan na sɔxɔlɛn sifan sɔtɔxi nɛn, nxu wuga, koni nxu foyen nan tun barixi. Nxu mi kisin fixi bɔxɔ xɔnna ma nxu mi muxu nɛnɛne raminixi dunuɲa yi.
19 Ɛ faxa muxune niin birama e yi nɛn, e yi keli. Ɛ tan naxanye saxi burunburunni, ɛ xulun, ɛ sɔnxɔ sɛwani. Marigina, i xiila rafama bɔxɔn ma alo kɛnɛnna, faxa muxune yi keli gaburun na.
20 N ma yamana, ɛ so ɛ konni, ɛ dɛɛn balan ɛ fɔxɔ ra. Ɛ luxun waxatidi, han Alaa xɔlɔn yi dangu.
21 Amasɔtɔ Alatala nan minima a dɔxɔdeni a yi bɔxɔn muxune hakɛne saran e ra. Bɔxɔ xɔnna muxu faxaxine wunla makɛnɛnma nɛn, a yi ba muxune wunla luxunɲɛ naxanye faxaxi a fari.