Ezekiel 30 in Yalunka
1 Alatala yi falan ti n xa, a naxa,
2 “Adamadina, nabiya falan ti, i naxa, Marigina Alatala ito nan falaxi, a naxa: Ɛ gbelegbele, ɛ naxa, ‘Ee! Ɲaxankata lɔxɔn fama!’
3 Amasɔtɔ lɔxɔn bata maso, Alatalaa lɔxɔn bata maso, kundaan nun gbalon lɔxɔn siyane xa.
4 Yɛngɛn soma nɛn Misiran yamanani. Kɔntɔfinla soma nɛn Kusi yamanani. Muxune faxama nɛn Misiran yi, e nafunle yi xali, e banxine yi rabira, sese mi luma.”
5 Misiran kaane nun Kusi kaane nun Puti kaane nun Ludu kaane nun Arabi kaane nun Libiya kaane nun n ma yamaan muxuna ndee faxama nɛn silanfanna ra e bode xɔn.
6 “Alatala ito nan falaxi, a naxa: Misiran yamanan xɔyine kalama nɛn, a wason nun sɛnbɛn yi ɲan. Keli Migidoli ma siga han Sinimi yamanana muxune faxama nɛn silanfanna ra e konni. Marigina Alatalaa falan nan na ra.
7 A taane findima nɛn yamana rabeɲinxine yire rabeɲinxin na, a taane yi lu taa xɔnne yɛ.
8 Nayi, e a kolonma nɛn a Alatala nan n na, n na tɛɛn so Misiran yamanan na waxatin naxan yi, a fɔxɔ ra birane birin yi gan.”
9 Na lɔxɔni, n ma xɛrane sigama nɛn kunkine kui, e sa Kusi yamanani maxa a bɔɲɛ xunbenli. E kuisanma nɛn Misiran yamanana gbalon lɔxɔni, amasɔtɔ na lɔxɔna a lima nɛn yati!
10 “Marigina Alatala ito nan falaxi, a naxa: N Misiran yama gbeen naxɔrima nɛn Babilɔn mangan Nebukadanesari xɔn.
11 A tan nun a ganla naxanye ɲaxu siyane birin xa, ne nan nasigama yamanan kaladeni. E sa e silanfanne botinma nɛn Misiran yamanan xili ma e yi yamanan nafe faxa muxune ra.
12 N Nila baa igen xɔrima nɛn, n yi yamanan mati muxu ɲaxine ma. N tinma nɛn xɔɲɛne yi yamanan kala, e nun seen naxanye birin a yi. N tan Alatala nan falan tixi.”
13 “Marigina Alatala ito nan falaxi, a naxa: N suxurene halagima nɛn, n yi batu seene ɲan Nofi taani. Kuntigi yo mi fa luma Misiran yamanani, n yi gaxun naso yamanan birin yi.
14 N Misiran yamanan faxa binna raxɔrima nɛn, n yi tɛɛn so Soyan taan na, n yi n ma kiti ragidixine rakamali No taan ma.”
15 “N na n ma xɔlɔn nagodoma nɛn Sin taani, Misiran yamanan taa makantanxina, n yi No taana gali gbeen birin halagi.
16 N tɛɛn soma nɛn Misiran yamanan na, Sin taan yi yimaxa gaxuni. No taan nabilinna yinna rabirama nɛn, yaxune yi Nofi taan tongo yanyin na.
17 Hon taan nun Pi-Beseti taan banxulanne faxama nɛn silanfanna ra, taan muxune yi xali konyiyani.
18 Lɔxɔ yidimixin na a ra Tapanese taan xa n na Misiran yamanan sɛnbɛn kala lɔxɔn naxan yi, a wasoma a fangan naxan yi, na yi ɲan. Kundaan soma nɛn taan xun na, a banxidɛne muxune yi xali konyiyani.
19 N na n ma kiti ragidixine rakamalima nɛn Misiran ma, e yi a kolon a Alatala nan n na.”
20 Yamaan xali konyiyani waxatin naxan yi, na ɲɛɛ fu nun kedenden kike singen xi soloferede lɔxɔni, Alatala yi falan ti n xa, a naxa,
21 “Adamadina, n bata yi Misiran mangan yiini gira. Muxu yo munma a dandan singen, a yiin munma maxidi alogo a xa yalan, a fangan sɔtɔ, a fa nɔ silanfanna tongɛ.
22 Nanara, Marigina Alatala ito nan falaxi, a naxa: N bata keli Misiran mangan xili ma, n mɔn a yiine yigirama nɛn, a yiin naxan fan, e nun a yigiraxina, n yi a silanfanna rabira a yii.
23 N Misiran kaane raxuyama ayi nɛn siyane yɛ, n yi e rayensenɲɛ ayi yamanane xun xɔn.
24 Koni n Babilɔn mangan yiine sɛnbɛ soma nɛn, n yi n ma silanfanna so a yii, n yi Misiran mangan yiine yigira, a yi lu kutunɲɛ a yɛtagi alo muxu maxɔlɔxin faxamatɔna.
25 N Babilɔn mangan yiine sɛnbɛ soma nɛn, koni Misiran mangan tan sɛnbɛn ɲanma nɛn. Nayi, e a kolonma nɛn a Alatala nan n na, n na n ma silanfanna so Babilɔn mangan yii waxatin naxan yi, a yi a yite Misiran yamanan xili ma.
26 N Misiran kaane raxuyama ayi nɛn siyane yɛ, n yi e rayensenɲɛ ayi yamanane xun xɔn. Nayi, e a kolonma nɛn a Alatala nan n na.”