Titus 3 in Sunwar
1 मिनु गेमी हुकुम पाइब नु सरकार ङा अधिकार पाइश्शो मुर आन कली टिचा, दे थमा सुइक्ब आन कली मिम्पतो। थमा सुइक्बपुकी टीब मुर दुम्चा माल्नीम। मिनु मार मार रिम्शो गेय बाक्मे, मेको पचा माल्नीम। रोमी १३:१; १पत्रुस २:१३
2 मिनु सुइ आन पर्बम काइ शुक्शी मपचा, जिचा मपोक्चा, मुर आन कली रिम्शो पा फाल्चा, ठेयब मलेत्थु, मुर आन कली वारच पचा माल्नीम। फिलिप्पी ४:५
3 ङोंइती गो मरुप्ब बाक्तय। परमप्रभु यावे कली मटीब बाक्तय, हेंथे गाक्ब, मार मार दाक्तय, मेको दला दाक्स पाइब बाक्तय। ग्रांग्रा दिचा ङा गेय पाइब बाक्तय। गो मरिम्शो पा गेहे पाइतय। मिनु गोपुकी काइ मदाक्मुय। १कोरिन्थी ६:११; एफिसी २:२; एफिसी ५:८; १पत्रुस ४:३
4 तन्न पाप रे प्रोंइब परमप्रभु यावे आ रिम्शो पतीके, आ दाक्तीके नु शिशी जाक्त। तीतस २:११
5 मेकोमी इं कली मरिम्शो गेय रे प्रोंइतु। इं पशो ठीक गेय तशा मप्रोन, तन्न आ शिशीमी इं कली प्रोंइतु। दोपा पाप रे प्रोंइतु देंशा हना, इं कली मरिम्शो गेय रे चिक्शो खोदेंशो पा, आ सोक्त आ पशोमी नक मुर सेल्तु। योएल ३:१; २तिमोथी १:९; यूहन्ना ३:५; एफिसी ५:२६
6 मिनु परमप्रभु यावेमी आ सोक्त इं तारी मोइक्तु। दोपा मोइक्तु देंशा हना, इं पाप रे प्रोंइब येसु ख्रीस्त आ पतीकेमी मोइक्तु।
7 मोदेंशो पा, परमप्रभु यावे आ शिशी आ पतीकेम इं कली ठीक सेल्तु। मिनु परमप्रभु यावे नु बाक्चा शिरशो दुम्तय। परमप्रभु यावे नु गेना हना यो बाक्चा कली आस पा बाक्तय। रोमी ३:२६
8 एको लोव़ थमा बाक्ब। मिनु एको लोव़ शुश शेंदो। मोदेंशो पा शेंताक्वी हना, परमप्रभु यावे कली थमा सुइक्ब दुम्शो मुरपुकी रिम्शो गेय पचा कली होस पा बाक्नीम। आं देंशो शेंतीके मुर आन कली रिम्शो नु गारचा ङा बाक्ब।
9 मिनु गे मूर्ख खोदेंशो पा हिल्लो पतीके, यहूदी आन बङसावली ङा शेंतीके नु अरेतीक लोव़ रे सेल्शो पतीके आ पर्बम गाइक्पाइक्ब नु जिचा पोक्ब रे ङोन बाक्को। मारदे हना मेको शोर गाक्शो नु जाम्शा लाइब बाक्नीम। १तिमोथी १:४; १तिमोथी ४:७; २तिमोथी २:१४
10 गे मोदेंशो दूली शेंब आन कली खेयप निक्शी सम्म लोव़ पावो। मेकोम मटिप्तु हना, मेको रे ङोन बाक्को। २यूहन्ना १०; मत्ती १८:१५-१७
11 मोदेंशो मुर नेल्ल दूली नु मरिम्शो पाइब दुम्शा, आन मरिम्शो पतीकेमी आंम कली खतम सेल्ब बाक्नीम, दे तुइक्नेवे। १तिमोथी ६:४-५
12 गो अरतीमास हना यो, तिखीकस हना यो इ कली ग्रुम्चा कली सोइक्ताक्ङ हना, गे आं कली ग्रुम्चा कली निकोपोलीस सहर पिवो। मारदे हना गो हिउंदमी मेकेर बाक्चा कली मिम्ताक्ङ। एफिसी ६:२१
13 मिनु गे चीनास माइश्शो वोकील नु आपोल्लोस आस कली रीब पा सोइक्तीम्सी। मेको निक्शीम मार मार माल्नीसी, मेको आस कली गेम्सी। प्रेरित १८:२४; १कोरिन्थी ३:५-६
14 मिनु इं मुरपुकीमी यो रिम्शो गेय पचा कली शेंसीचा माल्नीमी। मोपा शुश श्येत जाइब आन कली वारच पशा, फल सिप्ब रवा खोदेंशो दुम्नीम। तीतस २:१४; मत्ती ७:१९
15 गो नु बाक्बपुकी नेल्लेमी इ कली “रिम्शो बाक्को” दे ब्रेक्पाइक्तीमी। आंइ कली दाक्ब थमा सुइक्ब नेल्ल आन कली “रिम्शो बाक्कीन” ने माइक्मी। परमप्रभु यावे आ शिशी गे नेल्ल नु लील।