Song of Solomon 6 in Sunwar
1 ए नेल्ल क्येङा दारशो मीश आल, इ दाक्शो वोंइश मुर ते लमे? गो गारशा मेको कली माल्थ लय?
2 आं दाक्शो वोंइश मुर आंम फल फुल रू लत। मेको आ ब्रोव़शो रिना पाइश्शो मस्ला रू मेर लत। मेको क्यारश भेडा योव़चा कली नु लिली फू खुप्चा कली लत।
3 आं दाक्शो वोंइश मुर आं केन बाक्ब। मिनु गो मेको के बाक्नुङ। मेकोमी आ क्यारश भेडा लिली फू आन दातेम योव़ब। ठेयब कुम्सो २:१६
4 आं दाक्शो मीश आल, गे तिरचा सहर खोदेंशो बाक्नेवे। यरूसलेम सहर खोदेंशो रिम्शो तांइसीनेवे। गे छेदर क्युक्शो लडाइ पाइब खोदेंशो सक्ति पाइश्शो बाक्नेवे।
5 इ मिक्चीम आं कली मकोव़यी। मारदे हना इ मिक्चीम आं कली मार पचा ना मार पचा सेल्ब। इ चां गिलाद डांडा रे पा ब्रुप्शो क्यारश आन हुल खोदेंशो बाक्ब।
6 इ ख्रुइ ऊन प्रेक्शा चिक्शो भेडा आन हुल खोदेंशो बाक्नीम। मेको नेल्ल आन के जौंले पाठा बाक्ब। नेल्ल मोदेंशो बाक्नीम। ठेयब कुम्सो ४:१-२
7 इ सुम्तीके आगाम इ चोव़चो चेश्शो दारीम खोदेंशो बाक्नीस। ठेयब कुम्सो ४:३
8 मिनु ६० जना पिपीम बाक्तेक्म हना यो, ८० जना नोले चाक्शो मीश बाक्तेक्म हना यो, नु शुश मीश आल बाक्तेक्म हना यो,
9 आं मीश आल, आं ढुकुर, आं नेल्ल क्येङा दारशो मीश आल, आ ममामी दाक्शो तमी बाक्ब। आ ममामी “थम दारशो मीश आल बाक्ब” देंब। मिनु मीश आलपुकीम मेको कली तशा “ग्येरसीशो मीश आल बाक्ब” देंतेक्म। पिपीम नु नोले चाक्शो मीशपुकीम मेको कली ठेयब सेल्तेक्म।
10 सुनी खोदेंशो पा दारशो, तास्ला खोदेंशो पा दाप्शो, नां खोदेंशो पा छेङछेङ देंशो, हिंचा ङा लडाइ पाइब खोदेंशो सु बाक्बा?
11 गो फोरो रवा ङा रू मेर दोशो कोच्वा दम्मा, दे कोव़थ लती। अङगुर बोटमी कोच्वा दम्मा कों, दारीम फू बोइश्शो बाक्मा कों मबाक्मा, दे कोव़थ लती।
12 मिनु गो आं तुइक्चा क्येङा ङोंइती आं मिम्शोमी आं कली आं दाक्शो मुर आ नेक्था बग्गीम लाइक्ती।
13 शुलामीथ लेश्शा पिवो! लेश्शा पिवो! लेश्शा पिवो। मिनु गो इ कली कोव़ने चाप्कल। गे मारदे शुलामीथ कली लडाइ पाइब आन ङोंइती सिल पपाइश्शो खोदेंशो पा कोव़स ङा कोव़स बाक्चा दाक्नीनी?