Revelation 14 in Sunwar
1 मिनु नोले गो मेको पाठा सियोन डांडामी राप्शो ताता। मिनु लाख का ४४ हजार मुर पाठा नु बाक्तेक्म। मेको आन कुप्फीमी येसु नु आ आफ आ नें ब्रेक्सीशो बाक्त। प्रकाश ७:४; प्रकाश ३:१२
2 मिनु गो स्वर्ग रे सेंदा का नेंता। मेको सेंदा दोदेंशो बाक्त देंशा हना, शुश ब्वाक्कु आ रेयके नु ठेयब बुंबु पशो रेयके खोदेंशो नेंता। तन्न शुश मुरपुकीमी ठेयब तार पाइश्शो ताप्तीके ताप्शो रेयके बाक्त। प्रकाश १:१५
3 मिनु मेको ठेयब ताप्तीके ताप्बपुकीमी ठेयब नित्तीक आ ङोंइती, मेको ४ ओटा सेस जन्तु नु शेंब खाल्पा आन ङोंइती नक कुम्सो का पाम्तेक्म। मेको कुम्सो सुइमी शेंसीने मचबेम। तन्न मेको लाख का ४४ हजार मुरुम ला मेको कुम्सो शेंसीने चाप्तेक्म।
4 मिनु मेको मुरपुकी रागी ङा पाप रे ङोन बाक्शो बाक्तेक्म। मिनु मेकोपुकी पाठा तेक तेक लमे, मेक मेक लाइबाक्तेक्म। मेकोपुकी रागी ङा मुर आन दाते रे ग्रुंइशा, परमप्रभु यावे नु पाठा आस ङोंइती ङा योव़सीशो मुर बाक्तेक्म। १कोरिन्थी ७:१,८
5 मिनु मेकोपुकीम काइ जोल मपशो बाक्तेक्म। मारदे हना पाप मपाइबपुकी बाक्तेक्म।
6 मिनु स्वर्ग आ दातेमी गो परमप्रभु यावे आ स्वर्ग ङा गेय पाइब का बेरशो ताता। मेको रागीमी लीशो मुर आन कली गेना हना यो पाप रे प्रोंइब जाक्त, दे ग्येरपाइक्ब लोव़ शेंथ यित। मेको नेल्ल रागी ङा, नेल्ल जात ङा, नेल्ल लोव़ पाइब नु शुश मुर आन कली शेंथ यित।
7 मिनु मेकोमी ठेयब सेंदामी “परमप्रभु यावेमी सरीङ, रागी, समुन्द्र नु ब्वाक्कु बुक्तीके नेल्ल सेल्तु। मोपतीके इन पोक्च थेक्शा, परमप्रभु यावे कली मान पा हिनीन। मेको कली ठेयब सेलीन। मिनु ‘गे नेल्ल सेल्ब ननी’ देंशा मान पने। मारदे हना मेको आ निसाफ पची ना दुम्त” देंत।
8 मिनु परमप्रभु यावे आ स्वर्ग ङा गेय पाइब अर्को कामी मेको ङोंइती ङा आ नोले खोइश्शा, मेकोमी “बेबीलोन माइश्शो ठेयब सहर खतम दुम्त। मारदे हना मेकोमी ङोंइती नेल्ल रागी ङा मुर आन कली पाप पपाइक्तु। रागी ङा मुरपुकी बेबीलोन आ पर्बम परमप्रभु यावे आ गाइश्शो ताम्तेक्म” देंत। प्रकाश १८:-; यसैया २१:९; येरमीया २५:१५-१६; येरमीया ५१:७
9 मिनु सां आन दाते ङा परमप्रभु यावे आ स्वर्ग ङा गेय पाइबमी अर्को निक्शी आस नोले खोइश्शा, ठेयब सेंदामी “सु सुमी मेको जन्तु नु आ मूर्ति कली सेउ पाइनीमी, मेको आन कुप्फीमी कि ग्युरा गुइमी चिन्ड वोइक्पाइक्नीमी, प्रकाश १३:१२-१७
10 मेको आन कली तशा, परमप्रभु यावे शुश गाइक्ब। मिनु मेको मुरपुकीमी आ गाइश्शो तचा माल्नीम। दोपा परमप्रभु आ गाइश्शो तचा माल्नीम देंशा हना, पाप रे ङोन बाक्ब परमप्रभु यावे आ स्वर्ग ङा गेय पाइब नु पाठा आस ङोंइती मेको मुरपुकी हुरुर पा ब्रशो मी नु गन्धकम श्येत जचा माल्नीम। भजन संग्रह ७५:७
11 मेको मी आ कुन गेनायो मकाप्ब। मेको जन्तु नु जन्तु आ मूर्ति कली सेउ पाइबपुकी नु जन्तु आ नें आ चिन्ड वोइक्पाइक्बपुकी नाक्दो नाक्ती श्येत जना जन बाक्नीम” देंत।
12 मेना रागीमी परमप्रभु यावे आ योव़शो थमा सुइक्बपुकीमी श्येत फाल्चा माल्नीम। मारदे हना मेकोपुकीमी परमप्रभु यावे आ अरेशो लोव़ पाइनीम। मिनु येसु कली थमा सुइक्नीम। प्रकाश १३:१०
13 मिनु गो स्वर्ग रे सेंदा का नेंता। मेकोमी “मुल रे सु सु प्रभु कली थमा सुइश्शा बेक्नीमी, मेकोपुकी ग्येरसमल। मेको लोव़ ब्रेक्तो” देंता। मिनु परमप्रभु यावे आ सोक्तीमी “थमा, मेको मुरपुकी ग्येरसीशो बाक्नीम। मारदे हना मेकोपुकीमी रागीमी परमप्रभु यावे आ गेय पशा नाइक्नीम। मिनु परमप्रभु यावेमी आन गेय तुइश्शा, आन तचा ङा गेब” देंत। फिलिप्पी १:२३; यसैया ५७:२; हिब्रू ४:३०; १तिमोथी ५:२४-२५
14 मिनु नोले गो बुश गोस्स का ताता। मिनु मेको गोस्स तारी मुर का निश्शो खोदेंशो ताता। मेको आ पियामी सुन के सिरपेच गुप्शा ङा मिन आ गुइमी हेश्शो गुये का ग्याइश्शो ताता। दानीएल ७:१३; मर्कूस १३:२६
15 मिनु गो अर्को परमप्रभु यावे आ स्वर्ग ङा गेय पाइब कली परमप्रभु यावे आ खिं रे ग्रूशो ताता। मिनु मेकोमी गोस्स तार बाक्ब कली ठेयब सेंदामी “रागी ङा बाली मीशो बाक्त। मुल रिक्ची ना दुम्त। मिनु मुल रिक्चा गोवो” देंत। योएल ४:१३; मत्ती १३:३९
16 मिनु गोस्सुमी निप्बमी गुये शेशा, रागी कली मीशो बाली खोदेंशो पा रिक्तु।
17 मिनु गो अर्को परमप्रभु यावे आ स्वर्ग ङा गेय पाइब कली परमप्रभु यावे आ खिं रे ग्रूशो ताता। मेको नु यो हेश्शो गुये का बाक्त।
18 मिनु नोले अर्को परमप्रभु यावे आ स्वर्ग ङा गेय पाइब का धूप चढ़ेतीके रे ग्रूशो ताता। मेकोमी मी कली अधिकार पाइबाक्त। मेकोमी ठेयब सेंदामी हेश्शो गुये शेयब कली “रागी अङगुर रू खोदेंशो पा मीशो बाक्त। मोपतीके गुयेमी फल सेक्चा गोवो” देंशो नेंता।
19 मिनु परमप्रभु यावे आ स्वर्ग ङा गेय पाइबमी आ गुयेमी रागी कली फल सेक्शो खोदेंशो पा सेक्तु। सेक्शा खुप्शा, परमप्रभु यावे आ ठेयब फल कोलमी वोइक्तु। मेको कोल चहिं मार बाक्त देंशा हना, परमप्रभु यावे आ गाइक्चा बाक्त।
20 मिनु ख्राक्तीके सहर रे ङोन बाक्त। ख्राक्ग्मेनु, मेको कोल रे रस खोदेंशो पा हुश शांइसाक्व। मिनु मेको हुश १६ हजार स्तादीयोन ङोन दोक राप्शो शारा आ शोव़ सम्म लत। स्तादीयोन का १८५ मिटर बाक्ब।यसैया ६३:३