Psalm 65 in Sunwar
1 कुम्सो पपाइक्ब कली। दाऊद आ कुम्सो। परमप्रभु, सियोनमी इन कली ठेयब सेल्तीक कुम्सो पाइनीमी। मिनु आंइ कसम जशो नेल्ल इन ङोंइती खाप्नीकी।
2 गे प्रार्थना नेंब बाक्नीनी। मोपतीके मुर नेल्ल इन ङोंइती जाक्नीम।
3 गो आंइ पापमी ग्रुम्कानु, आंइ मरिम्शो पशो माफ गेतीनी।
4 सु सु इन योव़चा पुंइसीशो बाक्नीमी, मेकोपुकी ग्येरसीशो बाक्नीमी। मेको आन कली इन खिंम बाक्पाइक्चा कली चाक्नीनी। गो इन खिं, इन आंम बाक्तीके ङा ब्रोव़शो थोव़कमी रूनीकी। भजन संग्रह ६३:३-४; भजन संग्रह ८४:२-५; ब्यवस्था ४:७
5 आंइ पुंइशो लोव़ इन ठेयब गेयमी आंइ कली प्रोंइशा लोव़ लेत्नीनी। परमप्रभु, आंइ कली श्येत रे प्रोंइब बाक्नीनी। गे ङोन बाक्ब रागी नु नेल्ल क्येङा ङोन ङा समुन्द्र आ नेक्था बाक्ब आन आस बाक्नीनी।
6 गे इन सक्तिमी डांडा नेल्ल सेल्तीनी। गे ठेयब सक्ति पाइश्शो बाक्नीनी।
7 गे समुन्द्र आन ग्रीशो सिक्सी पपाइक्तीनी। गे समुन्द्र आन बोक्शो नाइक्पाइक्नीनी। मिनु जात जात ङा मुर आन जिचा खेचा साम्नीनी। भजन संग्रह ८९:१०
8 मिनु ङोन ङोन रागीम बाक्बपुकी इन छक लाक्चा ङा गेय तशा हिंनीम। परमप्रभु, गे नां दाप्तीके नु नां पेरतीकेम बाक्ब आन कली ग्येरसीशा कुम्सो पपाइक्नीनी।
9 गे रागी हिरशा, रेउ यिपाइक्नीनी। गे मेको कली शुश ग्रेल्पाइक्नीनी। परमप्रभु आ खोला ब्वाक्कुम ब्रीशो बाक्नीम। मोपा मुर आन कली शुश अन्न ख्रेल्नीनी। मारदे हना मेकोन इन मिम्शो बाक्ब। भजन संग्रह ६७:७
10 गे रू नेल्ल ब्वाक्कुम जिप्पाइक्नीनी। मेको कली थेल्नीनी। रेउ यिपाइश्शा, मेको कली मार मार वापाइक्ब सेल्नीनी। मिनु मेकेर सिश्शो अन्न कली आसीक गेनीनी। भजन संग्रह १०४:१३-१६
11 गे इन गेना हना यो दाक्तीकेमी शुश अन्न ग्रेल्ब सेल्नीनी। इन बग्गी मारेइ मारेइम ब्रीशो बाक्नीम।
12 गोरशो रागी ङा बी ब्यफ योव़तीके गिग दुम्नीम। पहाड थाम्पा ग्येरसीशो बाक्नीम।
13 योव़तीके नेल्ल क्यारश भेडापुकीमी ब्रीशो बाक्नीम। दिंमपुकी अन्नमी सुम्सीशो बाक्नीम। मेकोपुकी शुश ग्येरसीशा कुम्सो पाइनीम।