Proverbs 10 in Sunwar
1 जोक्ब तुइक्ब तौमी आ आफ कली ग्येरपाइक्ब। तन्न मूर्ख तौमी चहिं आ ममा कली सुर्ता पपाइक्ब।
2 परमप्रभु यावे कली मटिथु, चेम्शो शोंप शोर गाक्ब। सु ठीक पाइब बाक्मे मेको बेक्तीक रे ब्रोंइब।
3 परमप्रभु यावेमी ठीक पाइब मुर आन कली शोव़लु बेक्पाइश्शा मवोइक्ब। तन्न आ अरेशो मटीब आन कली आन जत दाक्शो मगेब। भजन संग्रह ३७:१९,२५
4 सु अल्से बाक्मे, मेको प्रुङग दुम्ब। शुश गेय पाइब मुर चहिं शोंप पाइश्शो दुम्ब। हितोपदेस ६:६
5 सु अन्न खुप्ची ना खुप्बा, मेको होस पाइब तौ का बाक्ब। अन्न रुप्ची ना इप्ब तौमी आ आफ कली मुने तोक्ब।
6 ठीक पाइब मुर आसीक राइनीम। तन्न परमप्रभु यावे आ अरेशो मटीब आन कली आन मरिम्शो पशोमी सुम्ब।
7 ठीक पाइब कली मिम्शा आसीक गेब। परमप्रभु यावे आ अरेशो मटीब आन नें चहिं जाम्शा लाइब। अय्युब १८:१७; भजन संग्रह ९:६
8 जोक्ब तुइक्ब थुं पाइश्शो मुरुमी शेंशो लोव़ टीब। तन्न हेंथे लोव़ पाइब मूर्ख खतम दुम्ब।
9 गेना हना यो रिम्शो पाइब मुर कली सुइमी मारेइ मपाइनीम। सु चहिं दूली लां गाक्बा, मेको आ पर्बम नेल्लेमी “मरिम्शो पाइब” दे तुइक्नीम।
10 मिक्च रिक्बपुकीमी मुर आन कली श्येत गेनीम। तन्न सुमी महिंथु हुइक्बा मेकोमी थुं नाइश्शा बाक्चा गेब। हितोपदेस ६:१२-१३
11 ठीक पाइब मुर आन लोव़ पतीकेमी ब्रोंइनीम। तन्न परमप्रभु यावे आ अरेशो मटीब आंम आन लोव़ पतीकेमी खतम दुम्नीम।
12 मुर आन कली काइ मदाक्शोनु, जिचा बोक्ब। मुर आन कली दाक्शोनु चहिं, आन मरिम्शो पशो नेल्ल सुम्सीब। १पत्रुस ४:८
13 मिम्ब मुर आन लोव़ रुप्चा ङा बाक्ब। तन्न ममिम्ब मुरपुकी तुप्चा पुंइसीनीम।
14 जोक्ब तुइक्ब मुर नु जोक्तीक बाक्ब। तन्न हेंथे लोव़ पाइब मूर्खमी खतम दुम्तीक चाक्ब।
15 शोंप पाइश्शो मुर आन शोंप मेको आन बोल्यो दरवार खोदेंशो बाक्ब। प्रुङग मुर आन श्येत दुम्तीकेम मेको आन कली खतम सेल्ब। हितोपदेस १८:११
16 ठीक पाइब मुर आन गेय पतीकेमी ब्रोंइनीम। परमप्रभु यावे आ अरेशो मटीब आन चेम्शो नेल्ल मरिम्शो गेय पा नुप्शा लाइब।
17 सु सुमी अर्ती टीनीमी, मेको ब्रोंइचा गेब लां गाक्नीम। हुइश्शो मनेंब चहिं हेंथे लां गाक्नीम।
18 सुमी मुर काइ मदाक्बा, तन्न “दाक्नुङ” देंबा, मेको मुर जोल्फे बाक्ब। सुम मुर आन पर्बम जोल फ्राइबा, मेको मूर्खे बाक्ब।
19 शुश लोव़ पाइब मुरपुकीमी शुश गल्ती पाइनीम। होस पाइब मुर शुश मब्वाक्नीम।
20 ठीक पाइब मुर आन लोव़ रिम्शो चांदी खोदेंशो बाक्ब। परमप्रभु यावे आ अरेशो मटीब आन थुं शोर गाक्शो बाक्ब।
21 ठीक पाइब मुर आन लोव़मी शुश मुर आन कली रिम्शो दुम्ब। तन्न मूर्ख आन निप्स मपाइक्तीके बेक्शा लाइनीम।
22 परमप्रभु यावे आ आसीकम मुर आन कली शोंप पाइश्शो सेल्ब। मेकोमी मारेइ श्येत मतेम्ब। भजन संग्रह १२७:२
23 मूर्ख मरिम्शो पचा कली ग्येरसीनीम। रुप्ब मुर जोक्ब तुइक्ब गेय तशा ग्येरसीनीम।
24 परमप्रभु यावे आ अरेशो मटीब मुर आन हिंशोम श्येत जाइनीम। तन्न ठीक पाइब मुर आन दाक्शो ताइनीम। हितोपदेस १:२७; भजन संग्रह ३७:४
25 श्येत फश गिवार खोदेंशो पा जाक्मेनु परमप्रभु यावे आ अरेशो मटीबपुकी जाम्शा लाइनीम। तन्न ठीक पाइब मुर गेना हना यो ब्रोंइशा बाक्नीम। हितोपदेस १२:७
26 दोपा ग्युरशोमी ख्रुइ ग्रिम्बा नु कुनमी मिक्च दुक्बा, मोपा अल्सी पाइब आन होव़प आन कली दुम्नीम।
27 परमप्रभु यावे कली मान पा हिंतीकेमी ब्रोंइतीक नाक्त तेम्सीब। तन्न परमप्रभु यावे आ अरेशो मटीब आन ब्रोंइतीक नाक्ती ख्रोंइसीब।
28 ठीक पाइब आन आस पतीके तशा ग्येरसीनीम। तन्न परमप्रभु यावे आ अरेशो मटीब आन आस पतीके जाम्शा लाइब। भजन संग्रह ९:१९; अय्युब ८:१३
29 परमप्रभु यावे आ लां रिम्शो थुं पाइश्शो मुर आन कली ख्रुइश्शा ब्रोंइशा बाक्तीक बाक्ब। तन्न मरिम्शो पाइब आन कली मेको लां खतम दुम्तीक बाक्ब।
30 ठीक पाइब मुर गेनायो ग्येत्थ लुक्च मदुम्नीम। परमप्रभु यावे आ अरेशो मटीबपुकी चहिं रागीमी मलीनीम। हितोपदेस २:२२
31 ठीक पाइब मुरुमी तुइक्तीक लोव़ पाइब। तन्न दूली लोव़ पाइब मुर आ लें फेत्चा पुंइसीब। भजन संग्रह ३७:३०
32 ठीक पाइब मुरुमी रिम्शो लोव़ पस जोक्ब। तन्न परमप्रभु यावे आ अरेशो मटीबपुकी दूली ला ब्वाक्स जोक्नीम।