Numbers 9 in Sunwar
1 मिनु परमप्रभु यावेमी इस्राएलीपुकी इजीप्त रे जाक्मा आ बर्स निक्शी नोले ङोंइती ङा महिनाम सीनै ङा गोरशो रागीमी मोसा कली
2 “गे इस्राएलीपुकीमी आं देंशो नाक्ती पास्सा चाड मानेचा माल्नीनी।
3 मेको महिना ङा १४ नाक्त ङा नाक्नाक्दो मेको चाड मानेचा माल्नीनी। गेपुकीमी मेको आ पर्बम फुल्लुम मुशा ब्रेक्शो लोव़ नु शेंशो पतीके नेल्लेमी मानेचा माल्नीनी” देंत।
4 मिनु मोसामी इस्राएली आन कली “पास्सा चाड मानेचा माल्नीनी” दे अरेप्तु।
5 मिनु मेकोपुकीम ङोंइती ङा महिना ङा १४ नाक्ती ङा नाक्नाक्दो सीनै ङा गोरशो रागीमी पास्सा चाड मानेम्तेक्म। परमप्रभु यावेमी मोसा कली अरेशो खोदेंशो पा इस्राएलीपुकीमी पाम्तेक्म।
6 मिनु मेकेर मुर का निक्शी बेक्शो मुर थिशा, ग्रांग्रा दिशो दुम्शो बाक्तेक्म। मोपा मेकोपुकीमी मेको नाक्ती मेको पास्सा चाड मानेचा मतामे। मेकोपुकी मेको नाक्ती मोसा नु हारून आस ङोंइती जाक्तेक्म। गन्ती १९:११
7 मिनु मेको मुरपुकीमी “गो बेक्शो मुर थिशा ग्रांग्रा दिशो दुम्शो बाक्तक हना यो, मारदे मेको देंशो नाक्ती गोपुकीमी इस्राएली आन दातेमी आंइ परमप्रभु यावे कली चढ़ेतीके चढ़ेचा मताइनीकी?” देंतेक्म।
8 मिनु मोसाम मेको आन कली “रिम्दीन, परमप्रभु यावेमी इन पर्बम मार देंबा, गो मेको नेंचा माल्नुङ” देंत।
9 मिनु परमप्रभु यावेमी मोसा कली
10 “गे इस्राएली आन कली ‘सुइ इन दातेमी नु इन चच युइ आन दातेमी बेक्शो मुर थिशा ग्रांग्रा दिशो दुम्शो बाक्त हना यो, ङोन लत हना यो, मेकोमी परमप्रभु यावे कली पास्सा चाड मानेचा माल्ब।
11 मेकोपुकीमी महिना निक्शी ङा १४ नाक्ती नाक्नाक्दो मेको मानेचा माल्नीम। मिनु मेकोपुकीमी मेको पाठा कली बोरब ओख्ती मसुप्शो शोब्ले, कशो खाइ नु ब्वचा माल्नीम।
12 मिनु मेको आ दीसा सुनी सम्म मारेइ हेंचा मदुम्ब। मिनु मेको आ रुश का यो जिक्चा मदुम्ब। मिनु पास्सा चाड आ पर्बम फुल्लुम मुशा, मार ब्रेक्शो बाक्मे, मेको पचा माल्नीम।
13 तन्न तेको मुर ग्रांग्रा दिशो मदुम्शो बाक्बा, ङोन यो मलशो बाक्बा, मेकोमी पास्सा चाड ममानेप्तु हना, मेको मुर आ मुर आन दाते रे तिल्चा पुंइसीब। मारदे हना मेकोमी आ देंशो नाक्ती परमप्रभु यावे कली चढ़ेतीक मचढ़ेवो। मेको मुर आ पाप राइब।
14 मिनु इन दातेमी बाक्शो अर्को रागी ङा मुरुमी परमप्रभु यावे कली पास्सा चाड मानेचा दाक्ताक्व हना, मेकोमी मेको आ पर्बम ब्रेक्शो नेल्ल शेंशो पतीक खोदेंशो पा पचा माल्ब। मिनु अर्को रागी ङा मुर नु इन मुर नेल्ल आन कली पास्सा चाड आ पर्बम ब्रेक्शो लोव़ का दुम्चा माल्ब’ देनो” देंत।
15 मिनु ग्रुम्तीक ताम्बु वोइक्ने थुम्शो नाक्ती गोस्सुमी मेको कबल पशो सन्दोस वोइश्शो ताम्बु सुम्तु। मेको नाक्नाक्दो रे सुनी सम्म ताम्बु तारी बाक्त। मेको गोस्स मी खोदेंशो तांइसीशो बाक्त। प्रस्थान ४०:३४-३५
16 मेको मोदेंशो गेना हना यो दुम्शो बाक्त। गोस्सुमी मेको ताम्बु कली नाक्ती सुम्बाक्त। मिनु नाक्दो मी खोदेंशो दुम्बाक्त।
17 मिनु मेको गोस्स ताम्बु आ तार रे इर गे लमेनु, इस्राएलीपुकी गाक्चा गोम्तेक्म। मिनु तेकेर मेको गोस्स जुक्ता, मेकेर इस्राएलीपुकीमी आन बाक्तीक सेल्तेक्म। प्रस्थान ४०: ३६-३८
18 मिनु इस्राएलीपुकी परमप्रभु यावे आ अरेशोमी गाक्बाक्तेक्म। मिनु परमप्रभु यावे आ अरेशोमी मेकोपुकीमी आन बाक्तीक सेल्बाक्तेक्म। मिनु मेकोपुकी मेको गोस्स ग्रुम्तीक ताम्बु तार बाक्म सम्म मेकेर बाक्बाक्तेक्म।
19 मेको गोस्स शुश नाक्त सम्म ग्रुम्तीक ताम्बु तार बाक्त हना यो, इस्राएलीपुकी परमप्रभु यावे आ देंशो टिशा मगाक्बाक्तेक्म।
20 कोइ नाक्ती मेको गोस्स ग्रुम्तीक ताम्बु आ तार का निक्शी नाक्त सम्म ला बाक्बाक्त। मिनु मेकोपुकी परमप्रभु यावे आ अरेशो टिशा, बास बाक्बाक्तेक्म। मिनु परमप्रभु यावे आ अरेशो खोदेंशो पा गाक्बाक्तेक्म।
21 कोइ नाक्ती मेको गोस्स नाक्दो रे सुनी सम्म ला बाक्बाक्त। मिनु सुनी गोस्स इर लमेनु, मेकोपुकी गाक्बाक्तेक्म। नाक्ती बाक्त हना यो, नाक्दो बाक्त हना यो, मेको गोस्स इर लत हना, मेकोपुकी गाक्बाक्तेक्म।
22 मिनु मेको गोस्स नाक्त निक्शी, महिना का नु मेको क्येङा शुश नाक्त सम्म यो ग्रुम्तीक ताम्बु तार बाक्त हना, इस्राएली आन बाक्तीकेमी बाक्बाक्तेक्म। तन्न गोस्स इर गे लत हना, मेकोपुकी गाक्बाक्तेक्म।
23 मिनु मेकोपुकी परमप्रभु यावेमी अरेशो खोदेंशो पा आन बाक्तीक सेल्बाक्तेक्म। मिनु परमप्रभु यावे आ अरेशो खोदेंशो पा गाक्बाक्तेक्म। मेकोपुकीमी परमप्रभु यावेमी मोसा कली अरेशो खोदेंशो पा पाइबाक्तेक्म।